Урьд шөнө Европын хөлбөмбөгийн хамгийн нэр хүндтэй тэмцээн болох Аваргуудын лигийн урьдчилсан шатны гурван тоглолт явагдаж дууслаа. Тэдгээрээс хамгийн онцлох тоглолт Казахстан улсын Кайрат клуб өөрсдийн “Ortalyq stadıon” цэнгэлдэх хүрээлэндээ Brendan Rodgers-оор удирдуулсан Шотландын алдарт Селтик клубийг хүлээн авч тоглолоо.

Хоёр багийн эхний тоглолт Шотландын Селтик клубийн талбайд болоход 0:0 харьцаатай эвийн гэрээ байгуулсан бөгөөд хариу тоглолт ч мөн адил 120 минутын турш үргэлжлэхэд 0:0 харьцаатай тэнцэж ялагчийн хувь заяаг 11 метрийн торгуулийн цохилтоор тодруулахаар болов. Улмаар Кайрат клубийн хоёрдугаар хаалгач 21 настай Temirlan Anarbekov онцгой сайн байж Селтик клубийн гурван торгуулийн цохилтыг амжилттай хааж 3:2 харьцаатай хожиж чадсанаар Казахстаны Кайрат клуб Аваргуудын лигийн хэсгийн шатанд анх удаа оролцох эрхээ авч чадлаа.

Аваргуудын лигийн урьдчилсан шатанд өрсөлдөж буй Австрийн Sk Sturm Graz клуб өөрсдийн талбай дээрээ Норвегийн FK Bodø/Glimt клубийг хүлээн авч тоглон 2:1 харьцаатай хожиж чадсан ч өмнөх тоглолтод 0:5 харьцаатай хожигдсон байсан тул нийлбэр дүн 2:6 харьцаагаар Норвегийн FK Bodø/Glimt клуб Аваргуудын лигийн хэсгийн шатанд өрсөлдөх эрхээ авч чадлаа.

Аваргуудын лигийн урьдчилсан шатанд өрсөлдөж буй Киприйн Pafos клуб өөрсдийн талбай дээрээ Сербийн FK Crvena zvezda клубийг хүлээн авч тоглосон бөгөөд 1:1 харьцаатай тэнцсэн ч өмнөх тоглолтод Киприйн Pafos клуб 2:1 харьцаатай хожсон байсан тул нийлбэр дүн 3:2 харьцаагаар ялж чадсанаар Аваргуудын лигийн хэсгийн шатанд өрсөлдөх эрхээ анх удаагаа авч чадлаа.

Одоогийн байдлаар Аваргуудын лигийн хэсгийн шатанд өрсөлдөх 32 баг тодорсон байгаа бөгөөд өнөөдөр шөнө үлдсэн 4 эрхийн төлөөх тоглолтууд явагдана.