Монгол улсын нийслэл Улаанбаатар хотноо зохиогдсон 3х3 сагсан бөмбөгийн Дэлхийн аварга шалгаруулах тэмцээн өнгөрсөн долоо хоногт амжилттай үргэлжилж, өндөрлөлөө.

Тус тэмцээнд дэлхийн шилдэг 27 орны эрэгтэй, эмэгтэй 40 баг өрсөлдөж аваргуудаа тодрууллаа.

Та бүхний мэдэж байгаачлан Монгол улсын эмэгтэй шигшээ баг түүхэн амжилт байгуулж тэмцээний Дэд аваргаар тодорсон гайхалтай тэмцээн болж өнгөрөв. Тодруулбал Олимпын төрлийн тэмцээнд багийн төрлөөр ДАШТ-ээс анх удаа медаль авсан нь энэ болж, спортын түүхийн цоо шинэ хуудсанд бичигдэж байна. Бахархалт охидууддаа хамгаас том баяр хүргэе!

Зөвхөн Монгол улс гэлтгүй энэхүү ДАШТ-д олон улсын багууд түүх бүтээсэн гайхалтай тоглолтууд болж өнгөрлөө. Тодруулбал

Эрэгтэй:

Аваргаа хамгаалагч хүчирхэг Сербичүүд ес дэх удаагаа тэмцээнд оролцож, анхныхаа хүрэл медалийг хүртэн ДАШТ-ий багц медальтнууд болов. ДАШТ-д зогсоодошгүй байж, зургаан удаагийн алтан медальт, нэг удаагийн мөнгөн медальтай байсан тэд энэ удаа хүрэл медальтайгаар тэмцээнээ өндөрлүүллээ.

Швейцарийн шигшээ баг мөн адил түүх бүтээлээ. Учир нь энэхүү тэмцээний хамгийн отгон буву хоёр дахь удаагаа оролцохдоо Латви, Сербийн шигшээ багуудыг ялан гарч аваргын төлөө өрсөлдсөж, эцсийн мөчид ялагдал хүлээн ДАШТ-ий анхны мөнгөн медалиа хүртэж байна.

Энэ тэмцээнд нэг ч хожигдол хүлээлгүй, босоо байсан Испаний шигшээ баг аваргын цом өргөлөө. Сүүлийн таван ДАШТ өнжөөд байсан Испаничууд энэ жил аварга авах зорилготой эргэн ирсэн гэдгээ баталлаа. Өмнө нь ямар ч медаль хүртэж байгаагүй тэд анх удаа финалд шалгарч, улмаар эцсийн мөчид Швецарийг буулган авч 2025-оны Дэлхийн аваргаар тодорлоо.

ЭМЭГТЭЙ

Медаль хүртсэн эмэгтэй шигшээ багууд бүгд цоо шинэ түүх бүтээсэн баяр мөч тохиолоо. Учир нь ДАШТ-д гурав дахь удаагаа оролцож байгаа Канадын шигшээ баг өмнө нь Мөнгөн медаль хүртэж байсан бол энэ удаа хүрэл медалийн төлөө Польшийн шигшээ багийг илүүрхэж, ДАШТ-ий хос медальтнууд боллоо.

Монгол улсын эмэгтэй шигшээ баг Дэлхийг донсолгосон гайхалтай өдрүүд болж өнгөрлөө. Хэсгийн шатанд Олимпын аварга Германы шигшээг буулгаж авсан бол шигшээ 4-т шалгарах эрхийн төлөө Дэлхийн аварга БНХАУ-ын хүчирхэг багийг буулган авч, улмаар Польшийг буулгаж аван финалд шалгарлаа. Финалын тоглолтод энэхүү ДАШТ-д нэг ч хожигдол амсаагүй явсан Нидерландын шигшээ багт хожигдол хүлээж, түүхэндээ анх удаа Мөнгөн медалийн эзэд болж байна.

Дээр дурдсанчлан Недерландын шигшээ багийн хувьд бас нэгэн түүхэн мөч тохиолоо. ДАШТ-д тасралтгүй буюу есөн удаа оролцоу нэг ч медаль хүртээгүй байсан тэд энэ удаа Аваргын цом өргөж, ДАШТ-ий тайзанд төрийн дууллаа эгшиглүүллээ.

Ийнхүү бүтэн долоо хоног үргэлжилсэн Дэлхийн хамгийн нэр хүндэй спортын тэмцээнүүдийн нэг болох ДАШТ Монгол улсын нийслэл Улаанбаатар хотын төв талбайд амжилттай үргэлжилж өндөрлөлөө. Энэхүү тэмцээнийг зохион байгуулахад үнэтэй хувь нэмэр оруулсан Монголын сагсан бөмбөгийн холбоо, Монголын 3х3 сагсан бөмбөгийн холбоо, арын алба, нийт ажилчидад гүн талархал илэрхийлье!