Кливлэнд Кавалиерс улиралд нэг ч хожигдоогүй цорын ганц баг хэвээр явна. Тэд өнөөдөр Чикаго Буллсыг талбай дээр нь 119-113 харьцаатай буулгаж авлаа. Донован Митчелл 36 оноо, 8 самбар, 2 дамжуулалт, 4 таслалт гүйцэтгэж, МВП-ийн өрсөлдөөнд яагаад яригдаж буй гэдгээ дахин нотлов. Чикаго Буллс өнөөдөр тийм ч муу байсангүй. Багийн зургаан тоглогч 10 болон түүнээс дээш оноо авсан ч төгсгөлийн үед Кавсын хамгаалалт онцгой байлаа.

Сан Антонио Спөрс бүсийнхээ өрсөлдөгч Сакраменто Кингсийг 20 онооны зөрүүтэй талбай дээрээ бут ниргэв. Виктор Вембаньяама 34 оноо, 14 самбар, 6 дамжуулалт, 3 хаалт гүйцэтгэсэн ба хоёр тоглолт дараалан 6 удаа алсын зайнаас амжилттай шидэж, замналынхаа дээд амжилттай дахин тэнцсэн байна. 

Чет Холмгренээ 8-10 долоо хоног алдсан Оклахома Сити Тандер эхний хагасын тэргүүллээ алдалгүй явсаар 134-128 харьцаатай Лос Анжелес Клипперст ээлжит ялагдлыг нь амсууллаа. Өнөөдөр талбай дээр Канад залуу Шай Гилжиус-Александрыг зогсоох хүн байсангүй. Тэрбээр 45 оноо, 9 дамжуулалт, 5 таслалт, 3 самбар, 2 хаалт гэсэн замналынхаа дээд оноог авсан аймшигтай тоглолт толилуулсан байна. МВП-ийн өрсөлдөөн ч улам бүр ширүүсэж байна даа.

Кам Томасын клатч оноогоор Брүүклин Нетс Нью Орлеанс Пеликансыг талбай дээр нь 107-105 харьцаатай буулгаж аван улирлын 4 дэх хожлоо байгууллаа. Зион Уиллиамс болон энэ зун авч ирсэн Дежоунте Муррэй, Херберт Жонс нараа бэртэлд алдсан Нью Орлеанс Пеликанс улирлыг тун муу эхлүүлж, 4 дараалан хожигдлоо. Брүүклин Нетсийн 7 тоглогч 10 болон түүнээс дээш оноо авч, багаараа жигд тогложээ.

Алферен Шенгүний гайхалтай тоглолтоор Хьюстен Рокетс улирлын 6 дахь хожлоо байгууллаа. Уашингтон Визардсыг талбай дээрээ 107-92 харьцаатай хожив. Шенгүн 27 оноо, 17 самбар, 3 дамжуулалтаар нийт тоглогчдыг тэргүүлсэн байна.