12-р сарын 12 буюу маргааш өглөө болох NBA-н цомын төлөөх тоглолтын хасагдах шат нь залуусын гарах гэж буй хамгийн том тайз билээ. Тус тоглолтод тэд өөрсдийгөө олон нийтэд баталж харуулах хамгийн том боломж нь гэж харж болно. Гайхалтай нягт хамгаалалт, атлетик чанар, дотоод уур амьсгал, эерэг хандлага, олон талт бүрэлдэхүүн болон 7 жилийн туршлагатай, домогт дасгалжуулагч Грегг Поповичтой хүртэл харьцуулагдаж байгаа хамгаалалтын мэргэжилтэн Име Удока нь тэдний 16-8 гэсэн амжилттайгаар бүсийнхээ гуравт эрэмбэлэгдэж яваа гол хүчин зүйл болоод байна.
25-26 оны улирлын Пуужингууд хамгаалалтын үзүүлэлтээрээ Лигт хоёр дугаар байранд бичигдэж байгаа ба тэд өрсөлдөгч багтаа дунджаар ердөө 105.4 оноог нэг тоглолтод алдаж байна. Тэдний өмнө бичигдэж байгаа ганц баг бол мэдээж Оклахама Сити Тандер (103.4)
Хамгаалалтад нөлөөлж буй үүрэг нөлөө, хичээл зүтгэл нь ихэвчлэн Амен Томпсон болон Алперен Шенгүн нараас эхлэлтэй байдаг. Лигийг хувь тоглогчийн хамгаалалтын үзүүлэлтээр нийт 500 гаруй тоглогчдоос 2-т Шенгүн (102.7) байдаг бол яг түүний ардаас Амен Томпсон 3-т (103.8) тус тус бичигддэг байна.
Энэ багийн лидер бол маргаангүй Алперен Шенгүн
Энэ улирал Турк залуу бүх-одод хэмжээний тоглолтыг үзүүлж байна. Түүнийг Йокичийн арай жижиг хувилбар ч гэж хочлох нь цөөнгүй. Тэрээр 18.5 оноо, 10.6 самбар болон 5.3 оновчтой дамжуулалтыг нэг тоглолтод дундажлаж байна.
Түүний өрсөлдөгч багийн дасгалжуулагч Тайрон Лью тоглолтын дараа ингэж хэлж ээ: "Үнэхээр олон талт тоглогч. Оноог хэрэгтэй үед төвөггүй авна, самбарын дор хаалт гүйцэтгэнэ, талбайг бүхэлд нь харах авьяастай тул тоглолтыг найруулна, бөмбөг эзэмшилт сайн, өндөр хувьтай чөлөөт шидэлт болон мэдээж хамгийн чухал нь орчин цагийн сагсан бөмбөгийн шаардлага болох гурваас шидэх чадвартай. Түүний эсрэг тоглох нь тун амаргүй даваа" гэж магтаж ээ.
