2024 оны Эмиратын нэрэмжит НБА-ийн цомын тэмцээний Дорнод бүсийн хагас шигшээд шалгарах эрхийн төлөө Атланта Хокс, Нью-Йорк Никс багийн талбайд зочлон тоглолоо. Өнөөдрийн хожих багаар Нью-Йорк Никсийг хэмээн нэрлэж байсан ч Атланта Хокс баг энэ улиралд өөр түвшинд байгаа гэдгээ дахин батлан харууллаа. Эхний хагаст тэд оноогоор дутуу өнгөрсөн ч гуравдугаар үед гайхалтай тоглолт үзүүлж, улмаар 108-100 харьцаатай Никсийг үндсэн цагт буулгаж авлаа.

Атланта Хоксоос Трэй Янг 22 оноо, 11 дамжуулалттай, Жэйлен Жонсон 21 оноо, 15 самбартай, Клинт Капела 11 оноо, 13 самбартай, Оньека Окунгву 12 оноо, 11 самбартай тус тус дабл дабл гүйцэтгэсэн бол Де’Андре Хантер 24 оноо авч багаа тэргүүлжээ. Атланта Хоксын хамгаалалт, хурдан довтолгоо, алсын зайн шидэлтүүд гээд тэд өнөөдөр өөрсдийн талбай дээр тоглож байгаа мэт гайхалтай тоглолоо.

Харин нөгөө талд Жош Харт 21 оноотойгоор багаа тэргүүлж, гарааны таван тоглогч 10 болон түүнээс дээш оноо авсан ч хожил байгуулахад хангалтгүй байлаа. НБА-ийн цомын тэмцээний Дорнод бүсийн аваргын төлөө Атланта Хокс 12-р сарын 14-ний 08:30 цагаас Милаукий Бакс багтай тоглоно.