Монголын Волейболын Үндэсний дээд лигийн 2024-2025 оны хоёрдугаар тойргийн тоглолтууд гал гарсан өрсөлдөөн дунд үргэлжлэн явагдаж байна. Энэ жил эрэгтэй 7 баг, эмэгтэй 9 баг өрсөлдөж байгаа ба одоогийн байдлаар эрэгтэйчүүд 10-11, эмэгтэйчүүд 13-14 тоглолт хийжээ. Хоёрдугаар тойргийн дунд үед багууд ямар амжилттай явааг тоймлон хүргэе. 

Эрэгтэй:

Энэ улиралд цоо шинэ өнгө төрхтэйгөөр орж ирсэн өмнөх жилийн дэд аварга SG Hawks баг энэ улиралд нэг ч хожигдол амсалгүй гайхалтай амжилт үзүүлсээр явна. 10 тоглолт дараалан ялсан 29 оноотой хүснэгтийн нэгт яваа. Hawks энэ жил довтлогч Ж.Энх-Эрдэнэ, К.Онолбек болон голын хаагч F.Lescay нараар хүч зузаатгасан. Тэгвэл бүсээ тэргүүлэгчдээс хэн ямар үзүүлэлтээр тэргүүлж байна вэ?

Багийн ахлагч Б.Батсуурь нэг тоглолтод 13.3 довтолгоогоо, 1.9 хаалт, 0.9 оноог давуулалтаар авч байна. Мөн импорт тоглогч К.Онолбек 14.7 довтолгоо, 1.9 хаалт, 1 амжилттай давуулалт дунджилж байна. 

Харин тэдний араас яваа лигийн хоёрдугаар байранд яваа Хасу Мегастарс клуб энэ жил мөн адил хүчээ зузаатгасан. Хуучин Хасу Б.Баярсайхан, Али Мохаммад нараас гадна ОХУ-аас С.Эвгенийг багтаа авчирсан. Тэд улиралд нэг л хожигдол амссан нь хүснэгтийг тэргүүлэгч SG Hawks-т 11-р сарын 23-ны өдөр 3-1 харьцаатай ялагдсан юм. Хасу Мегастарс клубээс Б.Баярсайхан нэг тоглолтод 12.4 довтолгоо амжилттай, 1.8 хаалт амжилттай гүйцэтгэж багтаа 14.8 оноогоор багтаа тусалж байна. Энэ жилийн шинэхэн импорт С.Эвгени 14.7 оноог авахдаа 12.7 довтолгоо, 1.1 давуулалт, 0.9 хаалт дунджилж байна. Хаалтын хувьд мэдээж А.Мохаммад 2.1 хаалт нэг тоглолтод дунджилж байгаа аж.

Энэ жилээс шинээр байгуулагдан лигт хүчтэй өрсөлдөөнийг үзүүлж буй Төв Миг клуб 6-4 амжилттай, 19 оноотойгоор хүснэгтийн 3-р байранд бичигдэж байна. Тус багаас Г.Цэнд-Аюуш 18 .9 оноо дунджилж буйгаараа багаа тэргүүлж байгаа ба 16.6 оноог довтолгоогоор, 1.1 давуулалт, 1.2 хаалт дунджилж байна. Мөн Б.Анхбаяр 16.1 оноо, М.Даниел 10.3 оноо авахдаа 2.3 хаалт дунджилж хүснэгтийн гуравдугаар байраа хадгалж байна. 

Эмэгтэй: 

2024-2025 оны улирлыг Улаанбаатар Финикс баг 11-хожил 2 хожигдолтой, нийт 33 оноотойгоор хүснэгтийг итгэл төгс тэргүүлж байна. Галт шувуунуудаас Ж.Баянжаргал нэг тоглолтод 18.2 оноо дунджлахдаа 16.2 довтолгоо, 1.2 хаалт гүйцэтгэж байна. Мөн П.Энххүслэн 12.1 оноо дунджлахдаа 8.6 довтолгоо, 2.8 хаалт гүйцэтгэсэн байна. Өнөөдөр тэд Хашхан Өвөрхангай багтай 14:30 цагаас тоглоно.

Волейболын Үндэсний дээд лигийг хүснэгтийн хоёр, гурав, дөрөвдүгээр байр тун өрсөлдөөнтэй үргэлжилж байна. Учир нь Ховд Ижил Алтай Торгууд 9-3 амжилттай, 25 оноотой, Хэнтий Уурхайчид 9-5 амжилттай 25 оноотой, өнгөрсөн жилүүдийн аварга Хөвсгөл Эрчим 9-4 амжилттай 24 оноотой тус бүр араасаа бичигдэж байна.

Ховд Ижил Алтай Торгуудаас багийн ахлагч Г.Саруулгэрэл 18.1 оноо, Я.Жастэйсү 23.2 дунджилж буйгаараа багаа тэргүүлж байна.

Хэнтий Уурхайчин багаас Z.Veronika 15.1 оноо, 1.4 хаалт, Ц.Баасандулам 10.9 оноо, 1.1 хаалт дунджилж байна.

Волейболын Үндэсний дээд лигийн хоёрдугаар тойргийн эрэгтэй тоглолтууд 12-р сарын 18-ны өдөр өндөрлөнө.