Гурван удаагийн улирлын MVP, нэг удаагийн финалын MVP орчин цагийн хамгийн шилдэг тоглогч гэгдэж буй Никола Йокич өнөөдөр замналынхаа хамгийн оргил үзүүлэлт болох 56 оноог авсан ч энэ нь Лигийн хамгийн муу амжилттай, чөлөөт уналт хийж яваа, 16 дараалж ялагдаад байсан Уизардсыг хожиход харамсалтай нь хангалттай биш байлаа.

Жокер маань өнөөдөр нийт 38 удаа довтолж 22-г нь амжилттай болгож 56 оноо авахынхаа хажуугаар 16 самбар, 8 оновчтой дамжуулалт өгч багаа чирсэн ч Уашингтон Уизардс-д 122-113 харьцаатайгаар ялагдлаа.

Ингэсээр Нийслэл хотын баг өөрсдийн хожигдлын хар цувралаа зогсоож 3-18 гэсэн амжилттай болж байна.

Жордан Пүүл харин өнөөдөр улирлын шилдэг тоглолтоо үзүүлж багаа манлайлан нийт 26 довтолж 12-г нь амжилттай болгож 39 оноо авснаас гадна 9-н удаа алсын зайнаас амжилттай унагаж ээ.

Никола Йокич энэ улиралд бас л өөрийн гайхалтай MVP түвшний тоглолтоо үзүүлж 29.9 оноо, 13.4 самбар, 10.6 дамжуулалт 1.8 таслалт дундажлаж байгаа ч баг нь яг одоо 11-10 гэсэн тун тааруу амжилттайгаар бүсийнхээ 9-р байранд бичигдэж байна.

Өнөөдөр багийн гарааны тоглогчид болох Аарон Гордон, Жамал Муррей нар нь гэмтлийн улмаас оролцож чадаагүй ба багийн бусад үүргийн тоглогчид нь 56 удаа довтолж 24-г нь амжилттай болгож 10 бөмбөг алдалт хийж ээ. Энэ багийн гараа сэлгээний тэнцвэр алдагдаж гарааны аль нэг тоглогч нь байхгүй болоход маш хүнд байдалд орж байна даа.

Ямар сайндаа Лигийн адагт яваа багт Йокич 56 оноо аваад хожигдох вэ дээ.