Монголын Волейболын Дээд лигийн 2024-2025 оны улирлын Аваргын төлөө өрсөлдөх багууд тодроход ганцхан хоног үлдлээ.

Улаанбаатар Финикс 1-1 Хэнтий Уурхайчид 13:00 цагаас

Ховд Ижил Алтай Торгууд 1-1 Хөвсгөл Эрчим 15:30 цагаас

SG Hawks 1-1 Төв Миг 18:00 цагаас тус тус тоглох хуваарьтай байна. 

Улаанбаатар Финикс баг энэ жил хүснэгтийг тэргүүлж 1-р байраар шалгарсан ч хагас шигшээ цувралын эхний тоглолтод Хэнтий Уурхайчин багт 3-2 харьцаатай хожигдсон бол 01-р сарын 15-ны өдөр цувралыг тэнцүүлэх шаардлагатай тоглолтод 3-2 харьцаатай хожсон юм. Өмнөх тоглолтод бэртлийн улмаас тоглоогүй Финикс багийн гол тоглогч М.Sierra эргэн ирсэн нь тэдэнд том тус хүргэсэн. Sierra нийт 5 ээлжийн тоглолтод 20 довтолгоо, 1 хаалт, 2 давуулалтаар оноо авсан байна. Мөн багийн гол довтлогчдын нэг Ж.Баянжаргал 24 довтолгоо, 2 хаалт гүйцэтгэж 23 оноо авснаар талбай дээрх бүх тоглогчдыг тэргүүлжээ.

Хэнтий Уурхайчин багийн хоёр импорт тоглогч 15-аас дээш оноо авсан ч шийдвэрлэх 5 дахь ээлжид П.Энххүслэнгийн довтолгоог зогсоож чадалгүй улмаар, 15-7 харьцаатай хожигдсон юм.

Өнгөрсөн хоёр жилийн аварга Хөвсгөл Эрчим баг энэ жил гурав дараалсан аварга авах боломжоо хадгалж үлдлээ. Ховд Ижил Алтай Торгууд клуб өнгөрсөн жилийн хариугаа авахад ердөө 1 тоглолт үлдлээ. Лигийн шилдэг багуудын эхний тулаанд Алтай Торгууд клуб 2-1 харьцаанаас эргэн ирж, улмаар 5 ээлж гарган аваргуудыг буулгаж авсан. Харин 01-р сарын 15-нд болсон тоглолтод Эрчим Алтай Торгуудад боломж олголгүй 3-1 харьцаатай хожиж, цувралыг тэнцүүллээ. Эрчимийн импорт тоглогч C.Hechavarria 4 ээлжийн тоглолтод 20 довтолгоо, 3 хаалт гүйцэтгэж, багаа тэргүүлсэн бол туршлагатай тоглогч Г.Энхнаран, лигийн шилдэг довтлогчдын нэг Г.Хонгорзул нар 13 оноогоор багтаа тусалжээ.

Харин нөгөө талд цувралын эхний тоглолтод зогсоогдошгүй байсан Y.Jasuteisu, багийн ахлагч Г.Саруулгэрэл нар хийх зүйлээ хийсэн ч хожил авахад хараахан хангалттай байсангүй. Гэхдээ тэд хасагдах шатанд нэг ч ялагдал амсаж үзээгүй Хөвсгөл Эрчим клубт анхны цочроог нь өгсөн тул маргаашийн тоглолт тун сонирхолтой болох нь дамжиггүй. Тоглолтын дараа Хөвсгөл Эрчим клубын холбогч Л.Хосбаяр:

SG Hawks баг дахин финалд шалгарах уу, Төв Миг клуб анхны жилдээ финалд шалгарч шуугиан тарих уу?

Цувралын нээлтийн тоглолтод Төв Миг клуб волейбол сонирхогчдод гэнэтийн бэлэг барьсан. Өнгөрсөн жилийн дэд аваргуудад нэг ч ээлж алдалгүй 3-0 харьцаатай буулгаж аван ямар чансаатай баг гэдгээ харуулав. Цувралын хоёр дахь тоглолтод хожигдох эрхгүй болсон SG Hawks багийн шатрын нүүдэл амжилттай болж 3-1 харьцаатай Төв Миг клубийг буулгаж авлаа. Энэ удаа Төв Миг клубийн довтолгоог тэд багаараа бүрэн няцаасан ба нийт 18 хаалт гүйцэтгэж, тор давуулалгүй оноо түүсэн юм. Багийн ахлагч Б.Батсуурь 18 довтолгоо 1 хаалт, К.Онолбек 11 довтолгоо 3 хаалт гүйцэтгэсэн ба F.Lescay 5 хаалт, О.Чойжилсүрэн 4 хаалт тус тус гүйцэтгэжээ.

Төв Миг клубээс шилдэг довтлогчид болох Г.Цэнд-Аюуш 19 оноо, Б.Анхбаяр 10 оноо авсан ч 4 ээлжийн тоглолтод хожигдол амссан юм. Маргааш 18:00 цагаас Хасу Мегастарс клубтэй аваргын төлөө өрсөлдөх баг тодрох болно.