Үндэсний дээд лигийн ПО-д хоорондоо учраа таарах магадлалтай багууд.

Үндэсний дээд лигийн багуудын улирлын тоглолт дуусахад 2-4 тоглолт дутуу байна. Одоогийн байдлаар ПО-оос 2 баг албан ёсоор хасагдсан бол хүснэгтийн 1-3р байр, 4-7-р байрын байгуудын байрлал улирлын сүүлийн тоглолтуудаас хамаарах маш өрсөлдөөнтэй, чухал ач холбогдолтой тоглолтууд багуудад үлдээд байна. 

Хүснэгтийн байрлал болон завсарлагааны дараа тоглох хуваарь:

1. Хасын Хүлэгүүд 18 хожил, 6 хожигдол /vs - SG Apes, Юнайтед, Brothers/

2. SG Apes 15 хожил, 8 хожигдол /vs - Хүлэгүүд, TLG, Metall, Miners/

3. Бишрэлт Металл 16 хожил, 9 хожигдол /vs - Бизон, SG Apes/

4. Сэлэнгэ Бодонс 13 хожил, 11 хожигдол /vs - Knights, TLG, Brothers/

5. Эрдэнэт Майнерс 13 хожил, 12 хожигдол /vs - Knights, Apes/

6. BCH Knights 13 хожил, 12 хожигдол /vs - Бодонс, Майнерс/

7. Завхан Бродерс 12 хожил, 12 хожигдол /vs - TLG, Хүлэгүүд, Бодонс/

8. Darkhan United 10 хожил, 14 хожигдол /vs - Хүлэгүүд, Бизон, TLG/

9. Налайх Бизон 6 хожил, 19 хожигдол /vs - Металл, Юнайтед/

10. ИНҮГ YES TLG 5 хожил, 19 хожигдол /vs - Knight, Металл, Юнайтед/

1. Хасын Хүлэгүүд багт 3 тоглолт үлдсэн. Тэд үлдсэн 3 тоглолтоос 1 хожил авахад бусад тоглолтын үр дүнгээс үл хамааран хүснэгтийн 1-р байраар ПО-д шалгарна. Хэрвээ тэд 3 хожигдож SG Apes баг 4 дарааллан хожвол хүснэгтийн 2-р байрлуу унах эрсдэл бий.  

1.1. Хүснэгтийн 2-р байрт яг араас нь нэхэж буй SG Apes багтай хийнэ. Импортоор авсан холбон тоглогч Josh Grey-тэй гэрээгээ цуцалсан тэд завсарлагааны үеэр холбон тоглогчийн байрлалд шинэ импорт тоглогч авч ирэхээр ажиллаж буй. Хүлэгүүд улиралд SG Apes багийг 81-76, 65-55 харьцаагаар 2 ялсан, SG Apes баг сүүлийн 13 тоглолтондоо 11-2 амжилттай бөгөөд энэхүү 2 хожигдлын 1-ыг Хүлэгүүд тэдэнд амсуулсан. 4 дарааллан ялагдал хүлээгээд байгаа Хүлэгүүдийн хувьд ялагдлын цувралаа зогсоох тоглолт юм.

1.2. Улиралд 2 удаа таарч 79-73, 73-67 харьцаагаар 2 ялсан Дархан Юнайтед багтай тоглоно. Магадлалын хувьд ПО-ын эхний шатанд хоорондоо таарах магадлал маш өндөр байгаа тэдний хувьд ПО-д таарах тоглолтын өмнөх маш хариуцлагатай, харилцан бие биенийхээ тоглолтыг судалсан тоглолт болох болно.

1.3. Тэд улирлын сүүлийн тоглолтоо Завхан Бродерс багтай хийнэ. Улиралд /86-80, 90-84/ харьцаагаар 2 хожсон. Хүлэгүүдийн хувьд өмнөх 2 тоглолтын аль нэгт хожил байгуулсан тохиолдолд, эсвэл SG Apes баг 1 хожигдсон тохиолдолд хүснэгтийн 1-р байраар гарах нь баталгаатай болох учраас энэ тоглолт тэдний хувьд ач холбогдлын хувьд бага. Тэд ПО-доо бэлдэж хувилбар, багийн ойлголцол, ПО-ын бэлтгэлээ энэхүү тоглолтонд базаах бол Завхан бродерсын хувьд энэ тоглолт хүснэгтийн байрлалд чухал ач холбогдолтой учраас хожихыг хүссэн тоглолт болно. 

2. SG Apes багт 4 тоглолт үлдсэн. Тэдний хувьд улирлын 2-р хагас эхэлсэнээс хойш буюу сүүлийн 13 тоглолтынхоо 11-г ялж 2 ялагдсан /Хүлэгүүд болон Металл/. Ахлах дасгалжуулагч Лала буцаж ирсэн, мөн олон талт тоглолтой Клайбөрн, будагтай талбайн хамгаалалт сайтай Акаут нарыг эгнээндээ нэгтгэж багийн ойлголцож сайтай болж, довтолгоо илүү аюултай болсон. 10 болон түүнээс дээш оноо дундчилж буй 4 тоглогч, довтолгоонд идэвхитэй, довтолгооны сонголт /9/ олон байгаа нь тэдний довтолгоо ямар аюултай байгааг илтгэж байна. SG Apes багийн хувьд 1-7р байрын хэдээр ч ПО-д шалгарах боломжтой цор ганц баг. Тэдний үлдсэн 4 тоглолт байрлалыг тодорхойлно. Гэхдээ зарим байрлалаар ПО-д шалгарах магадлал маш бага.

2.1.  Улиралд 76-81, 55-65 харьцаагаар 2 хожигдсон Хүлэгүүдтэй тоглоно. Хүснэгтийн 1-р байраар шалгарах боломжийг одоог хүртэл хадгалж байгаа хоёрхон багийн хоорондын учраа. Улирлын сүүлийн учраандаа маш ойрхон тоглолтыг үзүүлж 4-р үед Хүлэгүүдийн Б.Барсболдыг зогсоож чадаагүй тэдний хувьд энэ удаад хожихыг маш ихээр хүсч буй нь гарцаагүй. Аваргын амбиц өндөртэй, аварга авах магадлалтай тэдний хувьд хамгийн гол өрсөлдөгч нь маргаангүй Хасын Хүлэгүүд, тиймээс маш сонирхолтой тоглолт биднийг хүлээж байна.

2.2.  Улиралд 2 таарч /80-88, 84-74/ 1-1 байгаа ТЛЖ багтай хайнаа хагалах тоглолт болно. Гэхдээ маш хүч тэнцвэргүй тоглолт болно. Учир нь ТЛЖ багийн хувьд үлдээд байсан ганц импорт тоглогч болох Кени Вүүтэн ЖР-ыг нутаг буцаасан талаар ТЛЖ багийн ахлах дасгалжуулагч С.Тулга цахим хуудсаараа мэдэгдсэн. Гэхдээ ТЛЖ-ийн залуусыг басч үл болно. Улирлын хэд хэдэн тоглолтонд Монголчуудаараа сайн тоглолтыг нэг биш удаа гаргасан.

2.3.  Тэдний 3 дах учраа улиралд 2 таарч /75-82, 75-80/ 2 ялагдсан Бишрэлт Металл байх болно. Хүснэгтийн 2-3р байранд 1 хожигдлын зөрүүтэй бичигдэж байгаа тэдний хувьд хүснэгтийн байрлал доош унах эрсдэлтэй тоглолт болно. Учир нь амжилт тэнцсэн тохиолдолд хоорондын 3 тоглолтын үр дүнг харна. Хожлын цувралыг нь зогсоосон Металл багтай тоглолтын арга барил таардаггүй бололтой. Энэ тоглолт маш сонирхолтой болох нь гарцаагүй.

2.4.  Улирлын сүүлийн тоглолтоо тэд сүүлийн 7 тоглолт дарааллан ялалт байгуулж, сүүлийн 11 тоглолтондоо 10-1 амжилттай байгаа Майнерсын эсрэг хийнэ. Улиралд 2 таарч 2 хожсон /96-64, 66-62/. Сүүлийн учраандаа олон онооны зөрүүгээр хожсон хэдий ч Майнерсынхан сүүлийн 7 тоглолтондоо ялалт байгуулж багийн ойлголцол уур амьсгал ПО-д хэдийнээ бэлэн болсон аюултай баг болсоныг мартаж болохгүй. Тун сонирхолтой тоглолт биднийг хүлээж байна. 

3. Бишрэлт Металл багт ердөө 2 тоглолт үлдсэн. Сүүлийн 5 тоглолтоо дарааллан хожиж, хүчтэй өрсөлдөгч өнгөрсөн жилийн финалд ялагдсан Хасын Хүлэгүүд багийг сүүлийн тоглолтондоо 78-74 харьцаагаар ялсан тэдний хувьд хүснэгтэнд байр ахих ч боломжтой. Харин тэдэнд хүснэгтийн 3-р байраас доош унах эрсдэл байхгүй.

3.1.  Улиралд 2 таарч 1-1 /78-93, 91-73/ байгаа Налайх Бизон багтай тоглоно. Улиралд 2 таарахдаа 1-1 болж хайнаа хагалах тоглолт хэдий ч Налайх Бизон багийн хувьд хэдийнээ ПО-д шалгарах боломжгүй болсон, тиймдээ ч сүүлийн тоглолтуудад залуу бүрэлдэхүүнээ түлхүү ашиглаж байгаа учраас Металл-д хожих магадлал илүү өндөр. Металын хувьд 2-р байраар гарах боломжоо нэмэгдүүлэх боломжтой тоглолтонд учраас тэд хожихыг илүү хүсч байгаа нь гарцаагүй.

3.2.  Тэд улирлын сүүлийн тоглолтоо хүснэгтийн яг дээрээ буюу 2-р бичигдэж буй SG Apes багтай тоглоно. Улиралд 2 таарч 2 хожсон /82-75, 80-75/. Энэ тоглолт тэдний хүснэгтийн байрлалыг бараг л шийдэх тоглолт гэхэд болно. Apes-ын хожлын цувралд 2 баг л саад болсон. Тэдний нэг нь Металлыхан, мөн улиралд 2 хожсон, тиймээс Металл-д илүү хожих магадлал өндөр. Маш сонирхолтой, маш үзүүштэй, маш чухал тоглолт болно. 

4. Сэлэнгэ Бодонс багт 3 тоглолт үлдсэн. Тэдний хувьд 13-7 амжилттай хүснэгтийн 2-р байрнаас 4 дарааллан хожигдож огцом уналт хийж 4-р байрт бичигдэх болсон. 4-р байр ч тэдний хувьд баталгаатай биш 4-7р байрны хэдээр ч ПО-д шалгарах магадлал өндөр.

4.1.  Эхний тоглолтоо хүснэгтийн 6-р байрт 1 хожигдлын зөрүүтэй бичигдэж буй Найтс багтай хийнэ. Улиралд 2 таарч 1-1 /76-73, 66-70/ байгаа хайнаа хагалах, хүснэгтийн байрлалаа хоорондоо солих эрсдэлтэй тун чухал хариуцлагатай тоглолт. Магадлалын хувьд энэ тоглолтонд Найтсыг илүү боломжтой гэж бодож байна. Учир нь Бодонсынхон сүүлийн тоглолтуудад маш муу тоглогч байгаа бол Найтсынхан бүрэн бүрэлдэхүүнээ болж хамгаалалт давамгайлсан тоглолтыг үзүүлж байгаа. Найтсын хамгаалалыг тэд нэвтэлж чадах уу? Мөн тэдний О.Эрдэнэцогт тэргүүтэй довтолгоог хэр хязгаарлах бол? Тэд энэ тоглолтонд хожигдвол хүснэгтийн 6-7р байрлуу унах эрсдэлтэй.

4.2.  Дараагийн тоглолтоо улиралд 2 таарч /93-84, 102-98/ 2 хожсон ТЛЖ багтай тоглоно. Импорт тоглогчоо нутаг буцаасан ТЛЖ багаас хожил салгаж хүснэгтийн байрлалаа дээшлүүлэх боломжоо нэмэгдүүлэх чухал тоглолт. Хожих магадлал бол Сэлэнгэ бодонс илүү.  

4.3.  Улирлын сүүлийн тоглолтоо Завхан Бродерс багтай хийнэ. Улирлын харьцаа 1-1 /87-108, 72-67/ хайнаа хагалах, хүснэгтийн байрлалаа шийдэх чухал ач холбогдолтой тоглолт. МаКэнзи Мүүрийг авсаны дараах Завхан Бродерс багтай хийсэн тоглолтонд маш олон онооны зөрүүтэй хожигдсон тэдний хувьд энэ тоглолтонд хариугаа авах, байрлалаа дээшлүүлэх чухал бөгөөд үзэгчдийн хувьд үзүүштэй тоглолт болох болно.    

5.Он гарсанаас хойш 10-1 амжилттай, хүснэгтийн 10-р байраас 5-р байр хүртэл дэвшсэн Майнерсынханд 2 тоглолт л үлдсэн. Энэ 2 тоглолт тэдний хүснэгтийн байрлалыг шийдэх, анхны улиралдаа ахлах дасгалжуулагчаар ажиллаж буй Анар дасгалжуулагчийн шилдэг дасгалжуулагчид өрсөлдөх, Г.Болор-Эрдэний MVP өрсөлдөөнд нөлөөлөх зэрэг маш олон ач холбогдолтой заавал хожих 2 тоглолт байх болно. Гэхдээ тэдний өрсөлдөгчид амар биш байх болно.

5.1.  Хожил хожигдлын харьцаа ижил 13-12 байгаа Найтстай эхний тоглолтоо хийнэ. Улиралд 2 хожсон /96-78, 82-76/. Улирлын хоорондын тоглолтондын үр дүнгээр дээр нь бичигдэж байгаа Майнерсын хувьд энэ тоглолт тэднээс 1 хожил илүү гарах боломжтой бөгөөд 2 багт 2 ууланд нь ердөө 2 тоглолт үлдсэн. Майнерсынхан хэрвээ хожиж чадвал дараагийн тоглолтондоо хожигдсон ч улирлыг Найтсын дээр дуусгах боломжтой. Өөрөөр хэлбэл хүснэгтийн байрлал 6-аас доош унахгүй болно. Дээшлээд 4 рүү ч гарах боломжтой. Мөн энэ тоглолт MVP өрсөлдөөний өнгийг ч тодорхойлно гээд үзэхэд уйдамгүй тоглолт болно.

5.2.  Улирлын сүүлийн тоглолтоо хүснэгтийн 2-р байранд бичигдэж буй SG Apes багтай хийнэ. Улиралд 2 таарч 2 хожигдсон /64-96, 62-66/. Хурдан хэмнэлтэй тоглодог SG Apes багтай тоглолтын арга барил таардаггүй бололтой. Он гарсанаас хойш 10-1 амжилттай байгаагийн 1 хожигдол нь SG Apes багт 32 онооны зөрүүгээр хожигдсон хожигдол юм. Байрлалаа дээшлүүлэхийн тулд Майнерсынхан Эйпс-ийн тоглолтыг судалж тэдний хурдан хэмнэлийг хэрхэн барих, довтолгоог хэрхэн зогсоох учраа олохгүй бол хожих магадлал тэдний эсрэг байна. Бас л үзүүштэй гоё тоглолт болох нь гарцаагүй. 

6. Улирлаа маш тааруу эхэлж, хэд хэдэн удаа ахлах дасгалжуулагч сольсон BCH Knight багт 2 тоглолт үлдсэн. Сүүлийн 5 тоглолтынхоо 4т хожиж хүснэгтийн 6-р байранд бичигдэж байгаа тэдний хувьд үлдж буй тоглолт маш чухал. Багийн лидер О.Эрдэнэцогтын хувьд ч маш чухал тоглолт болно. Хувь тоглогчийн хувьд гайхалтай байгаа улирлаа MVP шагналаар мялайхын тулд заавал 2 хожих ёстой. MVP шагналын хувьд хүснэгтийн байрлал маш чухал.

6.1.   Улиралд 2 таарч 1-1 /73-76, 70-66/ байгаа Сэлэнгэ Бодонс багтай эхний тоглолтоо хийнэ. Багийн гол хамгаалагчдын нэг Г.Билгүүн бэртлээсээ эргэн ирж багийн хамгаалалтанд чухал нөлөө үзүүлж байсан боловч завсарлагааны өмнө цээжний булчин сэмэрсэн гэх харамсалтай мэдээтэй. Азаар Азийн аваргын тоглолтын үеийн завсарлагаа урт байж түүний бэртлийг эдгээх хугацаа олгож буй. Хүснэгтийн байрлалд чухал нөлөөтэйгөөс гадна энэ улиралд маш сайн байгаа, Бүх Ододын тоглолтонд үзэгчдээс хамгийн олон санал авсан О.Эрдэнэцогтын MVP болох магадлалыг хадгалж үлдэх чухал ач холбогдолтой тоглолт болно.

6.2.  Дараагийн тоглолтоо хүснэгтийн яг дээрээ бичигдэж буй Эрдэнэт Майнерс багтай хийнэ. Улиралд 2 таарч /78-96 76-82/ 2 ялагдсан. Хүснэгтийн байрлал шийдэх чухал тоглолтоос гадна О.Эрдэнэцогт vs Г.Болор-Эрдэнэ нарын сонирхолтой учрааг бид харах болно. Тэдний хувьд баг нь хүснэгтийн байрлал дээшилвэл гарцаагүй MVP-д яригдах учиртай. Хамгийн гоё нь тэд улирлын сүүлийн тоглолтонд хоорондоо таарна. Магадгүй хожсон нь MVP-д хүчтэй яригдаж уг шагналыг авах магадлал өснө.  

7.  12-12 буюу 50 хувийн амжилттай хүснэгтийн 7-р байранд бичигдэж байгаа Завхан Бродерс багт 3 тоглолт үлдсэн. Тэдний хувьд 4-р байрлуу дэвших боломжтой ч 8-р байрлуу унах ч эрсдэл бий. Сүүлийн 3 тоглолтонд хүснэгтийн байрлалыг ахиулах тэдэнд амаргүй байх болно.

7.1.  Эхний тоглолтоо тэд улиралд 2 таарч /106-100, 89-86/ 2 хожсон ТЛЖ багийн эсрэг хийнэ. ТЛЖ багийн хувьд импорт тоглогчоо нутаг буцаасан учраас хожих магадлалын хувьд мэдээж хэрэг Завхан Бродерс илүү байх болно. Улиралд ч мөн адил 2 хожсон. Гэхдээ нэгэнт айх айдасгүй болсон ТЛЖ багийг хэзээ ч дутуу үнэлж болохгүй.

7.2.  Тэдний дараагийн учраа хүснэгтийг тэргүүлэгч Хасын Хүлэгүүд. Улиралд 2 таарч /80-86, 84-90/ харьцаагаар 2 хожигдсон. Энэ тоглолт Хүлэгүүдийн хувьд улирлын сүүлийн тоглолт байх болно. Магадгүй тэдний хувьд хүснэгтийг 1-р байраар дуусгах нь тодорхой болсон байх ч боломжтой. Харин Бродерсын хувьд хүснэгтийн байрлалаа дээшлүүлэх үү гэдэг хариуцлагатай тоглолт. Хүлэгүүдийн хувьд импорт холбон тоглогч Josh Grey-г нутаг буцаасан. Түүнийг орлон авч ирэх холбогчтойгоо ПО-ын өмнө учраа олох, системдээ уусгах тоглолт болно. Шинэ импортын хувьд ч шинэ багтайгаа нэгдээд хожигдож эхлэхийг хүсэхгүй байх болов уу. Үзүүштэй сонирхолтой тоглолт болох нь гарцаагүй шүү.

7.3.  Тэдний улирлын сүүлийн тоглолт Сэлэнгэ Бодонс байх болно. Улирлын харьцаа 1-1 /108-87, 67-72/. Улирлын сүүлийн тоглолтондоо олон онооны зөрүүтэй Сэлэнгэ Бодонсыг буулгаж авсан ч тайвширч үл болно. Олон онооны зөрүүтэй хожсон тоглолтын араас хожсон баг тайвширч хожигдсон баг илүү судалж дараагийн тоглолтоо бэлддэг. Мөн энэ тоглолтын үр дүн энэ 2 багийг хүснэгтийн аль байраар гарах, ямар багтай ПО-ын эхний шатанд таарахыг шийднэ. 

8. ОУ-ын мэргэжлийн карьераа МУ-аас эхлүүлсэн Тае Хардиг нутаг буцаасан Дархан Юнайтед баг шинэ импорт тоглогчтойгоо завсарлагааний дараах 3 тоглолтоо хийнэ. Онолын хувьд тэдэнд хүснэгтийн байрлалаа дээшлүүлэх боломж байгаа хэдий ч тэд үлдсэн 3 тоглолтоо заавал хожиж бусад багуудыг хожигдохыг хүлээх шаардлагатай болно. Ер нь бол тэдний хүснэгтийн байрлал бараг тодорхой болчихсон гэж хэлж болно.

8.1.  Улиралд 2 удаа таарч /73-79, 67-73/ харьцаагаар 2 ялагдсан аваргаа хамгаалагч Хасын Хүлэгүүд багтай шинэ импортынхоо хамт эхний тоглолтоо хийнэ. Энэ тоглолт бол ПО-ын өмнөх тэдний халаалтын тоглолт гэж хэлж болно. Мөн шинэ импорт тоглогчдоо ...Бид ПО-д эдний эсрэг тоглоно шүү... гэж хэлэхэд ч болохоор бэлтгэл болох тоглолт юм. 2 баг судалгаагаа хийж ПО доо бэлдэцгээх биз ээ.

8.2.  Дараагийн 2 тоглолтоо Налайх Бизон, ТЛЖ багуудтай хийнэ. Хэрвээ тэдний хувьд Хасын Хүлэгүүд багийг хожиж чадвал дараагийн 2 учраа ПО-оос мултарсан 2 баг юм. Хожих магадлал тэдний хувьд өндөр. /Налайн Бизон, ТЛЖ багуудыг басч байгаа хэрэг биш, тэд улирлаа ерөнхийдөө өндөрлүүлсэн, залуу тамирчдаа ашиглаж тоглож байгаа/ Тиймээс Хүлэгүүдийг хожиж чадвал 3 хожил авч улмаар 13-14 амжилттай болж байрлал ахих боломжоо бага ч гэсэн хадгалж үлдэнэ. 

9. Бүрэлдэхүүний хувьд тун давгүй бүрэлдэхүүнтэй, улирлыг 3-3 амжилттай эхлүүлсэн хэдий ч Налайх Бизон баг улирал дундын Монгол тоглогчдын солилцоо, импорт тоглогчдын солилцоогоор буруу шийдвэр удаа дараа гарсаны улмаас 6-18 амжилттай ПО-оос мултарч ПИ-д тоглох тоглолтоо хүлээж байна. Харин тэдэнтэй хуучин багийн анд Brandis Raley Ross ПИ-д тоглохоор Ховд Шонхорууд багаа чирсээр М хөгжлийн лигийн финалд гараад ирлээ. Тэд хоорондоо таарах боломжтой. 

10. ИНҮГ YES ТЛЖ багийн хувьд импорт тоглогчоо арай л эрт сольсоноос болж импорт тоглогч авах эрхгүй болж улирлаа ПО-оос гадуур дуусгахаар боллоо. 3-0 гэж улирлыг эхлүүлсэн баг сүүлийн 20 тоглолтоос ердөө 2 хожил авч 5-18 болтлоо унасан нь маш харамсалтай. Гэхдээ ТЛЖ багийн хувьд лигийн хамгийн залуу бүрэлдэхүүнтэй баг учраас тэдэнд маш том сургамжтай улирал болсон гэж хэлж болно.     

Улирлын төгсгөлд хүснэгтийн байрлалын таамаглал:

1.    Хасын Хүлэгүүд         21 хожил, 6 хожигдол  

2.    Бишрэлт Металл       18 хожил, 9 хожигдол      

3.    SG Apes              17 хожил, 10 хожигдол                    

4.    Эрдэнэт Майнерс      14 хожил, 13 хожигдол   

5.    BCH Knights                14 хожил, 13 хожигдол  

6.    Завхан Бродерс         14 хожил, 13 хожигдол      

7.    Сэлэнгэ Бодонс          14 хожил, 13 хожигдол            

8.    Darkhan United            12 хожил, 15 хожигдол       

9.    Налайх Бизон              6 хожил, 21 хожигдол           

10. ИНҮГ YES TLG             5 хожил, 22 хожигдол      

Урьд нь манай дээд лигт байгаагүй 4 багийн хожил хожигдол тэнцэх тохиолдол гарч магадгүй байна. 4 багийн хоорондын тоглолтын үр дүнгээр Майнерс 4-р байрлуу, Найтс 5-р байрлуу, Бродерс 6р байрт, Бодонс 7р байрт дуусах боломжтой байна.

Хэрвээ ингэж дуусвал бид эхний шатанд:

1.    Хасын Хүлэгүүд vs Дархан Юнайтед

2.    Бишрэлт Металл vs Сэлэнгэ Бодонс

3.    SG Apes                vs Завхан Бродерс

4.  Эрдэнэт Майнерс vs BCH Knight гэсэн цувралыг харах магадлал өндөр байна.

Нийтлэл бичсэн: Н.Энхмандах