Монголын сагсан бөмбөгийн Үндэсний Дээд лигийн эхний тойргийн тоглолтууд өндөрлөх дөхөж байна. Энэ хугацаанд зарим багууд хүчээ зузаатгахаар хэд хэдэн солилцоо наймаа, өөрчлөлт хийснийг тоймлон хүргэж байна.

Улирал эхлэхэд BCH Knights багийн ахлах дасгалжуулагчаар ажиллаж байсан Ц.Эрдэнэбаясгалан сарын өмнө үүрэгт ажлаа хүлээлгэн өгсөн. Энэ удаад тэрээр BCH Knights багтай өнгөрүүлсэн аяллаа өндөрлүүлж байгаагаа өөрийн цахим хуудаснаа нийтэлжээ. Тэрбээр хуучнаар Гарьд багийн бүрэлдэхүүнд менежерээс эхлүүлээд туслах дасгалжуулагч, ахлах дасгалжуулагч хүртэл албан тушаалд томилогдон ажиллаж байсан юм.

Лигийн хэд хэдэн удаагийн аварга, туршлагатай тоглогч П.Болортулга өнгөрсөн долоо хоногт Эрдэнэт Майнерс багаас гарч буйгаа зарласан. Түүнтэй хэд хэдэн багууд холбогдсон ба Налайх Бизон баг түүнийг багтаа нэгтгэж чаджээ. Мөн 2024 оны драфтын 19 дэх сонголтоор Дархан Юнайтед багт сонгогдож улмаар Юнайтед багийн хөгжлийн лигийн багт тоглож байсан Э.Пүрэвдорж, М хөгжлийн лигийн Ёлууд багийн тоглогч Г. Дамдинжав нартай гэрээ байгуулсан байна.

Энэ жил MVP-ийн өрсөлдөөнд яригдаад буй А.Батхуяг ИНҮТ YES TLG багтай гэрээгээ өндөрлүүлэв. Улмаар түүнийг авахаар олон багууд хөөцөлдсөн сурагтай. Зарим шуумаас дурдахад анх Сэлэнгэ Бодонс баг түүнд 80 сая төгрөгийн санал, SG Apes баг ИНҮТ-тэй хийсэн 20 сая дээр нэмээд 40 саяын санал тавьсан байна. Эцэст нь Бишрэлт Металл баг түүнтэй гэрээ байгуулсан. Харин энэ үед А.Батхуяг нь BCH Knights багтай гэрээт тоглогч хэвээр байсан ба зээлээр ИНҮТ YES TLG багт тоглосон гэдгийг Knights баг мэдэгдэв. Харин Бишрэлт Металл баг тэр дор нь шуурхай холбогдож, BCH Knights багийн удирдлагуудтай тохиролцоонд хүрч, 2024-2025 оны улиралд А.Батхуягыг зээлээр Металл багт тоглуулахаар боллоо.