NBA-ийн шинэ улирлын тоглолтууд гурав дахь өдрөө үргэлжилж байна. Энэ зуны солилцоо, наймаа, шинэ гэрээнүүдийн хамгийн том шуугиануудын нэг болсон Клэй Томпсон энэ зуны финалд шалгарсан Даллас Маверикс багтай нэгдсэн. Кайри Ирвинг, Лука Дончич зэрэг лигийн элит тоглогчидтой нэгдсэн Клэй Далласын хүссэн хүн нь байж чадах эсэх талаар олон хэлэлцүүлэг, шүүмжлэлүүд гарч байсан. Өнөөдөр Сан Антонио Спөрс багтай хийсэн улирлын нээлтийн тоглолтод Клэй Томпсон энэ багт хэрэгтэй хүн гэдгээ батлан харууллаа.

Клэй 22 оноо, 7 самбар, 1 оновчтой дамжуулалт гүйцэтгэж, Лука Дончичын араас /28 оноо, 10 самбар, 8 дамжуулалт/ багийнхаа хамгийн өндөр онооны хоёрт жагссан байна.

Мөн шинэ багийн анхны тоглолтоо хийсэн Клэй алсын зайнаас 6 удаа амжилттай довтолсон нь тус багт анхны тоглолтоо хийж буй тоглогчдын хамгийн өндөр үзүүлэлт болсон байна. Алсын зайнаас 10/6 буюу 60%-тай довтолсон. Энэ нь Маверикс багт дутагдаад буй найдвартай шидэгчийн орон зайг хангалттай нөхөж чадна гэдгийг түүн рүү дамжуулалт өгөөд, хамгаалалт руу буцаж буй Лука Дончичийн царайнаас харж болохоор байлаа.

Даллас Маверикс баг Сан Антонио Спөрс багийг үндсэн цагт 120-109 харьцаатай үндсэн цагт буулгаж аван улирлын эхний хожлоо байгуулж байна.