Эмэгтэйчүүдийн волейболын ДАШТ Тайланд улсын нийслэл Bangkok болон Phuket, Chiang Mai, Nakhon Ratchasima гэсэн 4 хотод зохиогдож байгаа билээ. Эмэгтэйчүүдийн ДАШТ-ий шөвгийн 16-ийн тоглолт болж өнгөрлөө.

Тэмцээний B хэсгийг 3 хожиж тэргүүлсэн ДАШТ-ий алт, мөнгө, хүрэл медальт Италийн шигшээ баг болон тэмцээний G хэсгээс хоёрдугаар байраар шалгарсан Германы шигшээ багуудын хооронд тоглолт болж өнгөрлөө. Тоглолтын эхний сетээс эхлээд тоглолт дуусах хүртэл ДАШТ-ий иж бүрэн медальт Италийн шигшээ баг гайхалтай байж 25:22; 25:18; 25:11 харьцаатай гурван сет илүүрхэж чадсанаар ДАШТ-ий шөвгийн наймд шалгарч чадлаа. 

Тус тоглолтод Италийн шигшээ багаас Paola Ogechi Egonu гайхалтай тоглолтыг үзүүлж 21 оноо авсан бөгөөд 4-ийг нь хаалтаар оноо болгосон байна. Түүний араас Stella Nervini 11 авсан байна. Ингэснээр ДАШТ-ий иж бүрэн медальт Италийн шигшээ баг шөвгийн наймд хүчирхэг Польшийн шигшээ багтай тоглоно.

Тэмцээний G хэсгийг 3 хожиж тэргүүлсэн ДАШТ-ий мөнгө, хошой хүрэл медальт Польшийн шигшээ баг болон тэмцээний B хэсгээс хоёрдугаар байраар шалгарсан Бельгийн шигшээ багуудын хооронд үзүүштэй тоглолт болж өнгөрлөө. Тоглолтын эхний сетэд Бельгийн шигшээ баг 25:27 харьцаатай илүүрхсэн ч хоёрдугаар сетэд 25:20 харьцаатай Польшийн шигшээ баг хожиж сетийн харьцаа 1:1 болов. Гуравдугаар сетэд Польшийн шигшээ баг гайхалтай байж 25:17 харьцаатай хожсон бөгөөд дөрөвдүгээр сетэд Бельгийн шигшээ баг амар бууж өгөхгүй гэдгээ харуулж 22:25 харьцаатай хожиж чадсанаар сетийн харьцаа 2:2 болон тэнцэж ялагчийн хувь заяаг шийдвэрлэх тавдугаар сетийн тоглолтоор шийдэхээр болов. Тавдугаар сетэд эхнээсээ Польшийн шигшээ баг оноо илүү явсаар 15:10 харьцаатай хожиж шөвгийн наймд шалгарч чадлаа.

Тус тоглолтод Польшийн шигшээ багаас Martyna Lukasik тун сайн байж 20 оноо авсан бөгөөд багийн ахлагч Agnieszka Korneluk болон Magdalena Stysiak нар тус бүр 15 оноо авч чадсанаар багаа ялалтад хөтлөв. Ингэснээр Польшийн шигшээ баг шөвгийн наймд ДАШТ-ий иж бүрэн медальт Италийн шигшээ багтай тоглохоор боллоо.