Оклахама Сити Тандер Орландо Мэжикийг 16 онооны зөрүүтэй хожсоноор улиралд нэг ч хожигдол амсалгүй 7-0 харьцаатай Өрнөд бүсийг тэргүүлсэн хэвээр явна.

Паоло Банкеро, Вендел Картер Жр-оо бэртэлд алдсан Орландо Мэжик гурав дараалан ялагдлаа.

Брэндон Инграмаа явуулах шум гаргаад байсан Нью Орлеанс Пеликанс улирлыг тун тааруу эхлүүлж байна. Өнөөдөр Портланд Трэйл Блэйзерст 118-100 харьцаатай ялагдал хүлээж хоёр дараалсан хожигдол амслаа. 

Шилдэг зургаа дахь тоглогчийн шагналд энэ жил хүчтэй яригдах Миннесота Тимбервулвс багийн тоглогч Наз Рейд гарааны шилдгүүдээсээ илүү оноо авав. Шарлотт Хорнетс багийн эсрэг өнөөдөр тоглохдоо 25 оноо, 9 самбар, 2 дамжуулалттайгаар багаа тэргүүлэн 114-94 харьцаатай ялалт байгууллаа.

Энэ жилийн томоохон солилцоог хийсэн Нью-Йорк Никс улирлын 4 дэх ялагдлаа амслаа. Жэйлен Брансон 29 оноо, 8 дамжуулалт гүйцэтгэсэн ч баг нь хожиход хангалттай байсангүй. Тэднийг хожсон Хьюстон Рокетсийн Турк залуу Алферен Шенгүн 25 оноо, 14 самбартай дабл дабл гүйцэтсэн байна. 

Өнгөрсөн жилийн драфтын 16 дахь сонголт Юта Жазз багийн хамгаалагч Кеяонте Жорж гэх залууг эсрэг багууд анхааралдаа авах цаг болжээ. 20 настай залуу тоглогч өнөөдөр Чикаго Буллс багийн эсрэг 33 оноо, 9 дамжуулалттайгаар багаа тэргүүлэн 135-126 харьцаатай ялалт байгуулахад том тус хүргэжээ. Энэ залуу шинэ улиралд 16.4 оноо, 2.9 самбар, 6.9 дамжуулалт дунджилж байна.

Сакраменто Кингс баг Домантис Сабонисын хожлын довтолгоогоор Майами Хитыг талбайд нь эцсийн мөчид буулгаж авлаа. Шинэ багтаа нэгдээд удаагүй Демар Дерозан энэ улиралд 25/4/4/2 дунджилж clutch оноо, оруулсан довтолгоогоор лигийг тэргүүлж байна.

Дэсмонд Бэйн, Маркус Смарт зэрэг чухал тоглогчдоо хүлээж буй Мемфис Гриззлес Брүүклин Нетс багт 106-104 харьцаатай ялагдаж, улирлын 4 дэх хожигдлоо амслаа. Брүүклин Нетсийн гарааны таваас гадна сэлгээний хоёр ч тоглогч 10 болон түүнээс дээш оноо цуглуулж жигд тоглолтыг үзүүлсэн байна.

Бостон Селтиксийн гайхалтай улирал үргэлжилсээр. Өнөөдөр Атланта Хоксыг талбай дээр нь 30 онооны зөрүүтэй буулгаж авав. Энэ улирлын MVP-ийн өрсөлдөөнд хүчтэй яригдах Жэйсон Тэйтум энэ улирал 30 оноо, 7.4 самбар, 5.1 оновчтой дамжуулалт дунджилж, баг нь 7-1 амжилттай Дорнод бүсийн хоёрдугаар байранд явж байна.

Стеф Көрри бэртлээсээ эргэн ирлээ. Уашингтон Визардсын эсрэг Көрри 24 оноо, 6 дамжуулалт, 4 удаа алсын зайнаас амжилттай довтолж улирлын 6 дахь хожлоо байгууллаа. Тэд Өрнөд бүсийн 2-р байранд бичигдэж байна.

Дорнод бүст Кливлэнд Кавалиерс баг дангаараа нэг ч хожигдолгүй бүсийг тэргүүлж байна. Өнөөдөр Милаукий Бакс багийг эсрэг Дариус Гарланд сүүлийн 6 минутад 12 оноо авч гайхалтай тоглолт үзүүлсэн ба нийтдээ 39 оноо, 8 оновчтой дамжуулалтаар багаа тэргүүлсэн байна. Нөгөө талд Милаукий Бакс улирлын тун тааруу эхлүүлж байна. 1-6 амжилттай Дорнод бүсийн хамгийн сүүлд бичигдэж байна. Яннис явах талаар яриа яригдаж буй энэ үед Док Риверс ч мөн ажлаа хүлээлгэж өгч магадгүй юм.

Улирлыг гайхалтай эхлүүлсэн Лос Анжелес Лэйкерс өнөөдөр Детройт Пистонс багийн талбайд зочилсон тоглолтод 115-103 харьцаатай ялагдал амслаа. Зогсоогдошгүй гэмээр байгаа Энтони Дэвис 37 оноо, 9 самбар, 4 дамжуулалт гүйцэтгэж гайхалтай тоглосон ч багаараа жигд тоглосон Пистонсыг хожиж чадсангүй. Пистонс энэ дасгалжуулагч солигдсон Тобайс, Бийзли, Хардуэй хэмээх гурван үүргийн тоглогчид авчирсан нь өнгөрсөн жилтэй харьцуулахад өөр баг болсон байна.

Пол Жорж Филаделиагийн өмсгөлтэй анхны тоглолтдоо оролцлоо. 31 минутыг талбай дээр өнгөрүүлэхдээ 15 оноо, 5 самбар, 4 оновчтой дамжуулалт гүйцэтгэсэн байна. Финикс Санс багтай хийсэн өнөөдрийн тоглолт тун өрсөлдөөнтэй өнгөрч, оноо дээр доороо орон явсаар эцсийн мөчид 116-118 харьцаатай Санс багийн ялалтаар өндөрлөв. Энэ жил мөн адил MVP түвшинд тоглож буй Кевин Дурант 35 оноо, 4 самбар, 6 дамжуулалттай тоглогчдыг тэргүүлсэн байна. Финикс Санс 6-1 амжилттай Өрнөд бүсийн 3-р байранд бичигдэж байна.

Ахлах дасгалжуулагчгүй тоглосон Сан Антонио Спөрс эхний үед Лос Анжелес Клипперсийг 40-14 харьцаатай 26 оноогоор тэргүүлж эхлэв. Нэг үеийн тэргүүллээр энэ улирлын дээд амжилтыг тогтоосон боловч үлдсэн гурван үед Клипперс багаараа нэхэж явсаар 104-113 харьцаатай ялалт байгуулав.

Тус тоглолтод Виктор Вембаньяама 24 оноо, 13 самбар авахаас гадна 9 хаалт гүйцэтгэж энэ улирлын цоо шинэ амжилтыг тогтоосон байна. Дөрвөн аравт ч тун ойрхон харагдаад эхэллээ дээ.