Цахис спортын СS2 төрлийн дэлхийн хамгийн томоохон тэмцээн буюу “Дэлхийн аварга” гэгдэх “Perfect World Shanghai-2024” мажор тэмцээн 11-р сарын 30-аас 12-р сарын 15 хүртэл Шанхай хотноо үргэлжилнэ. Тус тэмцээнд манай улсаас “The Mongolz” баг оролцох гэж байна. 11-р сарын 12-нд манай баг шалгарсан ба Blitz, Techno, Maaraa нар хамтдаа тав дахь мажортоо шалгарч, залуу гишүүд болох 910, Mzinho, Senzu нар хоёр дахь мажор тэмцээндээ оролцох гэж байна. Монгол баг ийнхүү тав дахь мажор тэмцээндээ оролцож буй бахдам амжилтыг үзүүлж буй.

Shanghai Major 2024 нь Counter-Strike 2 төрлийн хоёр дахь аварга шалгаруулах тэмцээн, нийт хорин нэг дэх Counter-Strike-ийн Мажор тэмцээн болох гэж байна. “Рио-2022”-оос хойш анх удаа тэмцээний шат бүрийг олон үзэгчдийн өмнө зохион байгуулах гэж байгаагаараа онцлогтой. Нээлтийн болон хасагдах шатны тоглолтууд Шанхайн Дэлхийн яармагийн үзэсгэлэн, хурлын төвд болох бол плей-оффын тоглолтууд Шанхайн Дорно дахины спортын төв ордонд болно. Нийт 1,250,000 ам.долларын шагналын сантай тус тэмцээнд 24 баг бүсийн сонгон шалгаруулалтаас шалгарч хасагдах шатанд өрсөлдөнө.

Тэмцээнд оролцож буй сэтгэгдлийнхээ талаар багийн тоглогч Mzhinho “Үзэгчид нилээн дарамт үзүүлж чадсан шүү. Хүмүүс багагүй мөнгөөр Major үзнэ гээд тасалбар авсан болохоор тэгсэн байх. Бид хэд хожигдоод энд ирсэн хүмүүст үзэх Монгол баг байхгүй болчихвол яанаа гэсэн хүүхдийн сандрал байсан. Гэхдээ одоо гайгүй ээ. Шанхай Мажор дээр уулзацгаая” гэжээ. 

The Mongolz баг эхний шатанд тэмцээний зохион байгуулагч БНХАУ-ын “Rare Atom” багтай BO1 журмаар тоглоно. Эхний шатнаас шалгарсан 8 баг хасагдах Round 2-т дахин Bo1-ээр өрсөлдөж, Round 3-т Bo3-аар өрсөлдөн шалгарна. Цаашлаад хасагдах журмаар плэй-оффт өрсөлдөх юм.