Тэд яг одоо 23-53 амжилттай дорнод бүсийн 13-р байранд бичигдэж байгаа бөгөөд хамгийн сүүлд 2016/17 улиралд 28-54 гэсэн муу амжилттай бүсийнхээ 14-р байранд улирлаа өндөрлүүлж байсан түүхтэй.

Тухайн улиралд Philadelphia 76ers баг гарааны бүрэлдэхүүнээ нийтдээ 42 удаа сольсон. Шалтгаан нь тоглогчдын гэмтэл бэртэл болон Brett Brown дасгалжуулагчийн бүрэлдэхүүн дээрх тактикийн туршилтуудтай холбоотой. 

Мөн тухайн цаг үеийг "The Process" хэмээн нэрлэсэн нь шалтгаантай байсан. 

Тэд 2013 оны 11 дэх сонголт - Michael Carter-Williams

2014 оны 3 дах сонголт - Joel Embiid

2015 оны 3 дах сонголт - Jahlil Okafor

2016 оны 1 дэх сонголт - Ben Simmons

2017 оны 1 дэх сонголт - Markelle Fultz

2018 оны 10 дах сонголт - Mikal Bridges (солигдсон) гэх 6 жил дараалан lottery pick сонгох боломж гарч ирсэн. 

Гэвч тэдний "The Process" эцэс болсон мэт харагдаж байна.

Дээрх драфтын сонголтуудаас Joel Embiid багтаа үлдэж, өнөөдрийг хүртэл түүн дээр тулгуурлан багаа бүрдүүлж байсан. 

Энэ улирлын хувьд гарааны бүрэлдэхүүнээ тоглогчдын бэртэл гэмтлийн улмаас 35 удаа сольсон. Улирал эхлэхийн өмнө Joel Embiid болон Tyrese Maxey дээр нэмээд Paul George-г аван бүрэлдэхүүнээ үлэмж хэмжээгээр сайжруулж, дорнод бүсийн аваргын төлөө Boston Celtics-тэй өрсөлдөх бүрэн боломжтой баг хэмээн мэргэжилтнүүд дүгнэж байсан. 

Тэдний дасгалжуулагчаар лигийн аваргын цом болон шилдэг дасгалжуулагчийн шагналт Nick Nurse ажиллаж байгаа нь тэдэнд итгэх фенүүдийн итгэлийг улам бүр нэмэгдүүлж байсан. 

Гэвч яг өнөөдрөөр харвал магадгүй Philadelphia 76ers багийн уналтын үеийн эхлэл байж болно. 

Joel Embiid болон Tyrese Maxey нар 2028/29 улирал дуустал баталгаатай макс гэрээ хийсэн ба улиралд дунджаар хоёр тоглогч нийлээд $100 саяыг авна. 

Үүн дээр Paul George-ын 2027/28 улиралд дуусах жилийн $52 саяын гэрээ нэмэгдэнэ.

Бүх одод түвшний 3 тоглогч урт хугацааны гэрээтэй байхад яагаад уналтын үе гэж үзэж байгаа бэ гэвэл:

Joel Embiid - Лигт элсэж орж ирсэн эхний 2 улиралдаа гэмтлийн улмаас өнжиж байсан. Яг одоо түүнийг зовоож байгаа гэмтэл нь бүтэн 2 улирал амарж орж ирсний дараах гэмтэл байсан.

Замналынхаа турш улиралд дээд тал нь 68 тоглолтод оролцож байсан бол сүүлийн хоёр улирлын хувьд нийтдээ 58 тоглолтод оролцсон.

Paul George - Энэ жил 35 настай ба өнгөрсөн улирлыг эс тооцвол 2019/20 улирлаас хойш нэг улиралд дунджаар 46 тоглолтод оролцож байгаа.

Дээр дурдсан гол тоглогчид багийн нийт цалингийн цэсийн 50%-аас дээш хувийг эзэлж байна.

Гэвч тэдний талбайд өнгөрүүлэх минут, үр ашиг жил ирэх тусам буурч байгаа нь багийн ирээдүйд эргэлзээ төрүүлж байна.