Эмэгтэйчүүдийн волейболын ДАШТ Тайланд улсын нийслэл Bangkok болон Phuket, Chiang Mai, Nakhon Ratchasima гэсэн 4 хотод зохиогдож байгаа билээ. Эмэгтэйчүүдийн ДАШТ-ий шөвгийн 16-ийн тоглолт болж өнгөрлөө.

Тэмцээний С хэсгийг тэргүүлсэн өнгөрсөн ДАШТ-ий дэд байрт шалгарсан Бразилын шигшээ баг болон F хэсгээс хоёрдугаар байраар шалгарсан дэлхийн чансааны №11 Доминиканы шигшээ багуудын хооронд тоглолт болж өнгөрлөө. Тоглолтын эхний сетэд Доминиканы шигшээ баг жигд сайн тоглож 18:25 харьцаатай хожиж чадсан ч хоёрдугаар сетэд Бразилын шигшээ баг гайхалтай байж 25:12 харьцаатай илүүрхэв. Гурав болон дөрөвдүгээр сетэд Бразилын шигшээ баг гайхалтай тоглолтоо үргэлжлүүлж 25:20; 25:12 харьцаатай хожиж ДАШТ-ий шөвгийн наймд шалгарч чадлаа. 

Тус тоглолтод Бразилын шигшээ багаас багийн ахлагч Gabriela Braga Guimaraes тун сайн тоглож 21 оноо авч багаа тэргүүллээ. Ингэснээр ДАШТ-ий дөрвөн удаагийн мөнгөн медальт Бразилын шигшээ баг шөвгийн наймд Францын шигшээ багтай тоглохоор боллоо.

Тэмцээний F хэсгийг тэргүүлсэн ДАШТ-ий хошой алтан медальт гурван удаагийн мөнгөн медальт Ази тивийн шилдэг багуудын нэг БНХАУ-ын шигшээ баг болон С хэсгээс хоёрдугаар байраар шалгарсан дэлхийн чансааны №13 Европын хүчирхэг Францын шигшээ багуудын хооронд сонирхолтой тоглолт болж өнгөрлөө. Тоглолтын эхнээс Францын шигшээ баг довтолгоо хамгаалалтдаа маш сайн жигд тоглож эхний хоёр сетэд 25:20; 27:25 харьцаатай хожиж сетийн харьцааг 2:0-ээр тэргүүлж эхлэв. Харин гуравдугаар сетэд БНХАУ-ын шигшээ баг эхнээсээ оноо холдож явсаар 25:22 харьцаатай хожив. Гэсэн ч дөрөвдүгээр сетэд Францын шигшээ багийн лидер Rotar 8 оноо авсан бөгөөд багийн ахлагч Cazaute 7 оноо авч гайхалтай тоглолтыг үзүүлэн 25:20 харьцаатай буулган авч шөвгийн наймд шалгарч чадлаа.

Тус тоглолтод Францын шигшээ багийн ахлагч Héléna Cazaute гайхалтай тоглож 23 оноо авсан бөгөөд багийн лидер Iman Ndiaye 21 оноо авч багтаа тус хүргэн хожил байгуулснаар Францын шигшээ баг шөвгийн наймд ДАШТ-ий 4 удаагийн мөнгөн медальт Бразилын шигшээ багтай тоглохоор боллоо.