Сенегалын Бамбали хэмээх жижигхэн тосгонд нэгэн жаал хүү мөрөөдлөөрөө амьдарч байлаа. Түүний нэр нь Садио Мане. Хөлбөмбөгийн пүүзгүй хуучин цоорхой гуталтай тэр хүү нутгийнхаа тоос шороотой талбай дээр өдрөөс өдөрт бөмбөг өшиглөнө. Хөлбөмбөг бол зүгээр нэг тоглоом биш харин түүний ирээдүйн амьдралыг өөрчлөх цорын ганц гарц байв.  

Хүндхэн эхлэл

Мане багаасаа л ядуу амьдралд өссөн. Эцэг эх нь хүүгээ хөлбөмбөгт зүтгэхийг огтхон ч дэмждэггүй байлаа. Сургуулиа дүүргэж “жинхэнэ ажил” хийхийг тэд хүсдэг байв. Гэвч Садио өөрийн мөрөөдлөө хамгаалж 15 настайдаа гэрээсээ нууцаар зугтан Дакар хотыг зорьсон гэдэг. Халаасандаа мөнгөгүй хэн ч танихгүй хөлбөмбөгийн академийн хаалгыг тогшин орсон тэр үедээ мөрөөдөлдөө амьдарч эхэлжээ.  

Анхны том боломж

Сенегалын залуучуудын шигшээд тоглох болсон нь Мане карьерынх нь эргэлтийн цэг болов. Талбай дээрх түүний хурд ур чадвар Европын скаутуудын нүдэнд өртөж 2011 онд Францын Metz клубт очсон юм. Гэвч тэр үед ч амжилт нь баталгаатай байсангүй. Танихгүй орчин хэлний бэрхшээл дасгалжуулагчдын өндөр шаардлага гээд олон сорилттой тулгарсан ч Мане шантраагүй.  

Европт нэрээ цуурайтуулсан нь

2014 онд Австрийн Зальцбург хотын “Ред Булл”-тэй гэрээ байгуулж дараа нь Премьер лигийн “Southampton”-д тоглохдоо хурд тэсрэлт тоглолтын ухаанаараа гайхагдсан. 2016 онд Ливерпүүлтэй нэгдэн дэлхийн хамгийн аюултай довтлогчдын нэг болж Юрген Клоппын тактикийн гол зэвсэг болов. Түүний тоглолт зөвхөн гоол болон дамжуулалтаар хязгаарлагдаагүй. Хэн ч үл тоодог нэгэн тосгоноос ирсэн хүү Английн Премьер лигийн хамгаалагчдыг сөхрүүлж дэлхийн шилдэг клубийн гол од болсон нь өөрөө домог байлаа.  

Амжилтын оргил:

·        Английн Премьер лигийн аварга (2019/20)

·        Аваргуудын лигийн түрүү (2018/19)

·        Африкын үндэстний цомын аварга (2021) шигшээ тоглолтын шийдвэрлэх 11 метрийн торгуулийн цохилтыг амжилттай гүйцэтгэн Сенегалыг анхны түрүүтэй болгосон 

·        Африкийн оны шилдэг тоглогч (2019, 2022)

Өөрийгөө мартдаггүй даруу зан

Садио Мане дэлхийд алдартай болсон ч төрсөн тосгоноо хэзээ ч мартсангүй. Эмнэлэг барьж өгсөн Сургуулийг засаж хүүхдүүдэд ном тоног төхөөрөмж хандивласан. Авто зам спортын талбай байгуулахад хөрөнгө оруулсан. Тэрээр нэгэн ярилцлагадаа: “Би хувцас машин онгоцны буудлын зурагтай байхын оронд тосгондоо эмнэлэг барихыг илүүд үзнэ.” хэмээн хэлсэн байдаг.  

Өдгөө 33 настай түүний хувьд карертаа:

·        Metz B- 12 тоглолтод оролцож 2 гоол оруулсан

·        Metz- 22 тоглолтод оролцож 2 гоол оруулсан

·        Red Bull Salzburg- 63 тоглолтод оролцож 31 гоол оруулсан

·        Southampton- 67 тоглолтод оролцож 21 гоол оруулсан

·        Liverpool- 196 тоглолтод оролцож 90 гоол оруулсан

·        Bayern Munich- 25 тоглолтод оролцож 7 гоол оруулсан

·        Al Nassr- 64 тоглолтод оролцож 27 гоол оруулсан

·        Senegal- шигшээ багийнхаа өмнөөс 113 тоглолтод оролцож 45 гоол оруулсан байна.