Хойд Америкийн сагсанбөмбөгийн NBA-ийн бүсийн финалын тоглолтууд эхэллээ. Өнөөдөр зүүн бүсийн шигшээд шалгарсан Бостон Селтикс болон Индиана Пэйсерс багуудын тоглолт Бостон хотын ТД Гарденд болж өнгөрлөө. Энэхүү тоглолтын хамгийн өндөр хожих магадлалтайгаар нэрлэгдэж байсан Бостон Селтикс эхний хагаст 13 оноогоор тэргүүлж явсан ч тэргүүллээ алдаж, улмаар эхний хагас 64-64 харьцаатай өндөрлөв.

Гуравдугаар үед оноо салалгүй явсаар дөрөвдүгээр үед аль аль багуудын хамгаалалт илүү нягтарч, бөмбөг алдалтууд их болж байв. Индиана Пэйсерс баг энэ тоглолтод багаараа 21 удаа бөмбөг алдсан бол Бостон Селтикс 14 удаа алджээ. Оноо Индиана Пэйсерс тэргүүллийг гартаа авч 5 онооны зөрүү үүсгэхэд Бостон Селтикс тун хэцүү байдалд орсон байлаа. 

Бостончууд онооны харьцааг 3 болгон ойртуулж довтолсны дараа тоглолт дуусахад 8 секунд дутуу байхад Индиана Пэйсерс бөмбөг алдсанаар талбайн эздэд боломж олдлоо. Завсарлагааны дараа Жэйлен Броун дээр зурсан хувилбар амжилттай болж алсын зайны довтолгоо орсноор 117-117 дээр оноо тэнцэв. 

Нэмэлт цагт талбайн эзэд, тэр дундаа дөрөвдүгээр үед хэд хэдэн сул довтолгоо алдсан Жэйсон Тэйтумын тоглолт багаа сэргээж, нэмэлт цагт 128-133 харьцаатай Дорнод бүсийн нэгдүгээр байраар шалгарсан Бостон Селтикс ялалт байгууллаа. Бостон Селтикс багаас Жэйсон Тэйтум 36 оноо, 12 самбар, 4 дамжуулалт, 3 бөмбөг таслалт гүйцэтгэсэн бол Жрү Холидэй 28 оноо, 7 самбар, 8 дамжуулалт, 3 бөмбөг таслалт хийж багаа тэргүүлжээ. 

Индиана Пэйсерс багаас залуу од Тайрис Халибөртон 25 оноо, 3 самбар, 10 дамжуулалт, 3 бөмбөг таслалт, Паскал Сиакам 24 оноо, 12 самбар, 7 дамжуулалт гүйцэтгэсэн ба талбайд гарсан 7 тоглогч 10-аас дээш оноо авсан ч харамсалтай нь ялагдал хүлээлээ. Цувралын харьцаа 1-0 болсон хоёр дахь тоглолт энэ сарын 24-ны 08:00 цагаас болох хуваарьтай байна.