Зүүн Азийн эмэгтэйчүүдийн волейболын аварга шалгаруулах тэмцээн Хонконгт үргэлжилж байна. Энэ удаагийн тэмцээнд бүсийн шилдэг багууд оролцож байгаа бөгөөд Монголын эмэгтэй шигшээ баг эх орноо төлөөлөн өрсөлдөж буй.

Манай шигшээ баг наймдугаар сарын 11-нд эхний тоглолтоо БНСУ-ын багийн эсрэг хийж, 0:3-аар хожигдсон юм.

Харин наймдугаар сарын 13-нд талбайн эзэн Хонконгийн шигшээ багтай тоглолоо. Эхний сетэд манай охид сайн тоглолт үзүүлж, 26:24-өөр ялалт байгуулснаар тоглолтыг 1:0-ээр тэргүүлж эхэлсэн.

Хоёрдугаар сетэд Хонконгийн баг тоглолтын хэмнэлийг өөрчилж, 25:14-өөр сетийг авлаа. Гуравдугаар сетэд хоёр баг оноо оноогоороо өрсөлдөж, шийдвэрлэх мөчид Хонконг 25:23-аар илүүрхсэн юм.

Дөрөвдүгээр сетэд Монголын баг тоглолтыг тэнцүүлэхийн төлөө хичээсэн ч Хонконгийн баг 28:26-аар ялалт байгуулж, улмаар тоглолтыг 3:1-ээр өндөрлүүлсэн.

Ийнхүү Монголын шигшээ баг хоёр дахь тоглолтоо мөн хожигдлоор өндөрлүүлсэн ч Хонконгийн эсрэг нэг сет авч, тоглолтын турш нэлээд сайн өрсөлдөж чадсан байна. Ялангуяа эхний сетэд 26:24-өөр ялсан, дөрөвдүгээр сетэд 28:26 хүртэл тоглосон нь манай багийн тоглолт ямар өрсөлдөөнтэй байсныг харууллаа.

Монголын эмэгтэй шигшээ баг тэмцээний дараагийн тоглолтоо наймдугаар сарын 15-нд хийхээр товлогдсон. Тус тоглолтоор манай баг тэмцээнд эзлэх байр сууриа тодорхойлохын төлөө өрсөлдөнө. Ямар улсын багтай, хэдэн цагаас тоглох нь одоогоор тодорхойгүй байгаа юм.

Манай охидын хувьд Зүүн Азийн бүсийн хүчтэй багуудтай тоглож, туршлага хуримтлуулахын зэрэгцээ өөрсдийн боломжийг харуулах чухал тэмцээн үргэлжилж байна.

Гэрэл зургийг: Монголын Волейболын Холбоо - Mongolian Volleyball Association MVA