Үндэсний Волейболын дээд лигийн энэ улирлын эмэгтэй Плэй-оффын тоглолтууд үзэгчдийг уйдаамгүй, таамаглашгүй гайхалтай тоглолтуудаар үргэлжилж байна.

Өнөөдөр:

Хүрэл медалийн төлөөх сүүлийн тоглолт

Хэнтий Уурхайчин 1-1 Хөвсгөл Эрчим 14:00 цагаас

Улаанбаатар Финикс аваргын цом өргөх үү, Ховд Ижил Алтай Торгууд цувралыг тэнцүүлэх үү?

Улаанбаатар Финикс 2-1 Ховд Ижил Алтай Торгууд 17:00 цагаас

Дээрх багууд цувралд ямар үзүүлэлтээр онцгой байна вэ?

Өнгөрсөн хоёр жил босоо аварга авсан Хөвсгөл Эрчим клуб энэ удаа хүрэл медалийн төлөө Хэнтий Уурхайчин клубтэй учраа таарсан. Түрүүлж хоёр хожил авсан баг медалийн эзэд болох цувралын эхний тоглолт 4 ээлжийн тоглолтод тун өрсөлдөөнтэй өрнөж 17-25 / 25-22/ 25-20 / 25-19 харьцаатай Хэнтий Уурхайчин багийн ялалтаар өндөрлөсөн юм. Тус тоглолтод Уурхайчдаас Б.Нинжболор гайхалтай тоглолт үзүүлж 25 оноо авахдаа 21 довтолгоо, 2 хаалт, 2 давуулалтаар оноо авч цувралыг тэргүүлэх боломжийг багтаа үүсгэжээ. Хоёр багийн нийт статистик үзүүлэлтийн хувьд бараг энэ тэнцүү байсан ба аль аль багууд 64 довтолгоо, 6 хаалт гүйцэтгэсэн бол багийн алдааг Хөвсгөл Эрчим клуб арай илүү гаргаж, эхний тоглолтод хожигдсон байна. Цувралын хоёр дахь тоглолтод мөн адил оноо дээр доороо орсон өрсөлдөөн дунд өрнөв. Хөвсгөл Эрчим хожигдох эрхгүй тоглолтод 22-25 / 25-18 / 24-26 / 17-25 /-аар дөрвөн ээлжид Уурхайчдыг буулгаж авлаа. Тэд энэ удаа өмнөх алдаануудаа зассанаас гадна багаараа тун жигд тоглолт үзүүлсэн байна. Учир нь талбай дээр гарсан бүх тоглогчид үүргээ биелүүлэхийн сацуу дөрвөн ч тоглогч 13 болон түүнээс дээш оноо авчээ. Тэд багаараа 60 довтолгоо, 7 хаалт, 4 давуулалт амжилттай гүйцэтгэхээс гадна эсрэг багаасаа 23 алдаа салгасан байна. Ийнхүү цувралыг 1-1 харьцаатай тэнцүүлж, шийдвэрлэх 3 дахь тоглолтыг гаргаж чадлаа. Өнөөдөр хоёр баг 14:00 цагаас энэ оны хүрэл медалийн эзэд хэн болохыг AIC Steppe Arena-д шийднэ.

Энэ улирлын Волейболын Дээд лигийг чимж буй хоёр баг болох Улаанбаатар Финикс, Ховд Ижил Алтай Торгууд клубүүдийн цувралын дөрөв дэх тоглолт өнөөдөр болно. Цувралд 2-1 харьцаатай Галт Шувуунууд тэргүүлж байгаа ба тэдэнд аваргын цом өргөхөд ердөө ганцхан хожил хэрэгтэй. Харин нөгөө талд Г.Саруул-Эрдэнэ ахлагчтай Алтай Торгууд багийнхан хожигдох эрхгүй хариуцлагатай тоглолт тэднийг хүлээж байна. 

Цуврал 1

Улаанбаатар Финикс 3-2 Ховд Ижил Алтай Торгууд /30-28/ 25-21/ 20-25/ 18-25/ 15-13/

Цуврал 2

Ховд Ижил Алтай Торгууд 3-2 Улаанбаатар Финикс /20-25/ 25-23/ 19-25/ 25-20/ 15-17

Цуврал 3

Улаанбаатар Финикс 3-0 Ховд Ижил Алтай Торгууд /27-25/ 25-21 / 25-20/ харьцаатай тус тус ялалт байгуулжээ. Цувралд Улаанбаатар Финикс багаас Ж.Баянжаргал 22 оноо дундажлахдаа 17.8 довтолгоо 2.8 хаалт, 1.4 давуулалт амжилттай гүйцэтгэж багаа тэргүүлж байна. Харин Ховд Ижил Алтай Торгууд клубээс Y.Jasuteisu 26.4 оноогоор багтаа туслахдаа 23 довтолгоо, 2 хаалт, 1.4 давуулалт дунджилж багаа тэргүүлжээ. Мөн хоёр багаас M.Sierra 18.6 оноо, Г.Саруулгэрэл 12.2 оноо дунджилж, гайхалтай тоглолтуудаа толилуулсаар байна. Хагас шигшээ болон Шигшээ цувралд Улаанбаатар Финикс багийн эсрэг багууд дунджаар 19.6 алдаа гаргаж байгаа бол Ховд Ижил Алтай Торгууд багийн эсрэг 26.4 алдаа гаргаж байгаа үзүүлэлт бичигджээ. Өнөөдөр тэдний 4 дэх тулаан 17:00 цагаас эхэлнэ.