Польшийн теннисчин Ига Швитек, нутаг нэгт Агнешка Радванска, Украины Элина Свитолина нар Украинд хүмүүнлэгийн тусламж үзүүлэх үйлсэд дэмжлэг үзүүлэх зорилгоор 7-р сарын 23-нд Краков хотод болох үзэсгэлэнгийн тоглолтонд оролцохоор болжээ. Польшийн залуу тоглогч Мартын Павелски, Украины Сергей Стаховский нар мөн холимог хосын тэмцээнд оролцохоор уригдан оролцох бол Швитек, Радванскатай ганцаарчилсан тоглолт хийх болно. Дэлхийн номер нэг Швитек твиттер хуудсандаа "Би хэдэн сарын турш багийнхаа хамтаар дайны улмаас зовж шаналж буй хүмүүсийг дэмжих Украйны төлөөх буяны санаачилга дээр ажиллаж байна" гэж бичжээ. "Бид бие биенээ олноор нь харж чадна гэж найдаж байна ... Спорт нь биднийг нэгтгэж, бага ч гэсэн баяр баясгаланг өгөх үед спортын хүч чадлыг харуулах болно." гэсэн байна.

Украйны болон "Милан"-ын хуучин хөлбөмбөгчин Андрей Шевченко мөн тус арга хэмжээнд хүрэлцэн ирэх онцгой зочдын тоонд багтаж байгаа бол анхны хүүхдээ өлгийдөж буй Свитолина шүүгчээр ажиллах юм. Тоглолтуудаас олсон орлогыг бүхэлд нь дайнд нэрвэгдсэн хүүхдүүдийг дэмжихэд зориулж Свитолинагийн буяны сан, НҮБ-ын Хүүхдийн сангийн Польш, Юнайтед 24 зэрэг байгууллагуудтай хамтран хандивлах болно. Их Британийн Энди Мюррей өмнө нь Уимблдоноос олсон орлогоо Украины дайнд нэрвэгдсэн хүмүүст хандивлахаа амласан. Мюррей "Украинд гэр бүл, хүүхдүүд эх орноо орхин гарахыг оролдож байна. Гэр орон нь сүйрч байгаа айлууд бас бий. Миний хувьд боловсрол бол хүнд хэцүү нөхцөлд байгаа хүүхдүүдэд туслахад маш чухал зүйл байсан. Энэ нь надад сайн тоглож, тоглолтонд ялах нэмэлт урам зориг өгдөг. Тийм учраас би туслахааршийдсэн." гэжээ. 

Н.Бэлгүүн