Хойд Америкийн сагсан бөмбөгийн НБА-ийн талбайд нийтдээ 11 тоглолт болж өндөрлөлөө. 11-р сарын 11-ний өдрийн байдлаар багууд 9-өөс 11 тоглолт хийгээд байна. Өнөөдрийн тоглолтуудаас онцлоход:

Жимми Батлергүй Майами Хит Никола Иовичийн хожлын довтолгоогоор Миннесота Тимбервулвсийг талбай дээр нь 95-94 харьцаатай буулгаж авлаа. Энэхүү тоглолтод Тайлор Херро 26 оноо авсан ч 8 удаа бөмбөг алджээ. Сүүлд зурсан Эрик Спойлстрагийн хувилбарийг биширмээр. Нөгөө талд найман хүний бүрэлдэхүүнтэй Миннесота Тимбервулвс баг улирлын дөрөв дэх хожигдлоо амслаа.

Өрнөдийн хоёр хүчирхэг багийн өрсөлдөөнд Голден Стэйт Уарриорс ялалт байгууллаа. 1 хожигдолтой явсан Оклахома Сити Тандерс багийн талбайд зочилсон Дайчид 127-116 харьцаатай буулгаж авахад Стефен Көрри 36 оноо, 7 дамжуулалт, 5 самбар гүйцэтгэхээс гадна талбай дээр +21 үзүүлэлттэй тогложээ. Мөн тэд багаараа нийт 21 удаа амжилттай довтолсон байна.

ОКС Тандерын залуу од Чет Холмгрен тоглолтын эхний үед хүчтэй газар унаж, баруун ташаандаа хүнд бэртэл аван алхаж чадалгүй талбайг орхив. 

Бостон Селтикс Милаукийг талбай дээр нь буулгаж авлаа. Эхний хагаст 8 оноотой явсан Жэйсон Тэйтум тус тоглолтод 31 оноо, 12 самбартай дабл дабл гүйцэтгэж, 113-107 харьцаатай хожил байгуулахад том тус хүргэжээ. Харин нөгөө талд Яннис 43 оноо, 13 самбартай улирлын дээд амжилтаа үзүүлсэн ч эцсийн мөчид ялагдал хүлээлээ.

Баксийн энэ улирал тун хэцүүхэн эхэлж байна. Тэд хоёрхон хожил 8 хожигдолтой Дорнод бүсийн 14-р байранд бичигдэж байна. Яннис явах Док Ривэрс халагдах хоёрын аль нэг шийдвэр тун удахгүй гарах бололтой. 

Индианагийн гурвал Нью-Йоркийн эсрэг 99 оноо авч, талбай дээрээ 132-121 харьцаатай хожил байгууллаа. Бенедикт Матурин 38 оноо, Тайрис Халибөртон, 35 оноо, Майлс Турнер 26 оноо тус тус авсан байна.

Нью-Йоркийн наймхан хүний бүрэлдэхүүнтэй сагсан бөмбөг үргэлжилсээр. Өнөөдөр мөн л гарааны таван тоглогч 36-42 минут тоглосон байна.

Орландо Мэжик талбай дээрээ Уашингтон Визардсыг 27 онооны зөрүүдтэй буулгаж авлаа. Франз Вагнер 23 оноо, 7 дамжуулалтаар багаа тэргүүлэв. Уашингтон улирлын 7 дахь хожигдлоо амслаа. 

Жоэл Эмбийдгүй Филадельфиа нэмэлт цаг сунгасан хүнд тоглолтын эцэст Шарлотт Хорнетсийг 107-105 харьцаатай буулгаж авлаа. Энэ жилийн шинэ цэрэг Жаред МкКэйн 27 оноо авч гялалзсан бол Ябуселе 20 оноо, 8 самбараар тусалжээ.

МПЖ-ийн хожлын шидэлт, Кайри Ирвингийн 43 оноо авсан тоглолтыг үгүй хийлээ. Өрнөдийн хүчирхэг багуудын нэг Денвер Наггетс болон Даллас Маверикс багуудын өрсөлдөөнд Денвер 122-120 харьцаатай илүүрхлээ. Никола Йокичийг зогсоох хүн өнөөдөр Далласт байсангүй. Йокич 37 оноо, 18 самбар, 15 оновчтой дамжуулалт гэсэн аймшигтай үзүүлэлт үзүүлжээ. Денвер ийнхүү 5 дараалсан хожлоо байгуулж байна.

Тобиас Харрис тоглолтын төгсгөлд хоёр чөлөөт шидэлт алдсанаар Детройт 101-99 харьцаатай Хьюстен Рокетс багт ялагдал хүлээлээ. Алферен Шенгүн 27 оноо, 10 самбартай дабл дабл гүйцэтгэв. 

Өнөөдрийн бас нэг нэмэлт цаг сунгасан тоглолт Сакременто Кингс, Финикс Санс багуудын хооронд болж өндөрлөлөө. Супер од Кевин Дурант бэртэлтэй байсан ч Санс тоглолтын төгсгөлд нэмэлт цаг руу хөтөлж чадав. Харин Кингст тоглолтын сүүлийн мөчийг атгахаар ирсэн Демар Дерозан өөрийгөө яах гэж ирсэнээ баталлаа. Өнөөдөр тэрбээр 34 оноо авахдаа нэмэлт цагт 7 оноо авсан байна. Улмаар 127-118 харьцаатайгаар Кингс 6 дахь хожлоо байгууллаа. 

Жа Морантгүй ч Мемфисчүүд Портланд Трэйл Блэзерсийг 45 онооны зөрүүтэй буулгаж авлаа. Тэдний долоон тоглогч 12 болон түүнээс дээш оноог багтаа нэмэрлэжээ.