Волейболын Үндэний Дээд лигийн 2024-2025 оны улирын аваргын төлөө эрэгтэй, эмэгтэй 8 баг энэ амралтын өдрүүдээс өрсөлдөж эхэллээ. Хагас шигшээн эхний тоглолтууд эхнээсээ гал гарсан өрсөлдөөнтэй эхэлж, олон таамаглашгүй тоглолтууд болж өнгөрлөө.

Хагас шигшээн эхний “Апсет” Хэнтий Уурхайчин таван сетэд хүснэгтээ тэргүүлэгчдыг буулгаж авлаа. 

Өнгөрсөн бямба гарагийн эхний тоглолтод хүснэгтийн нэгдүгээр байраар шалгарсан Улаанбаатар Финикс баг Хэнтий Уурхайчин багтай учраа таарсан. Таван сет үргэлжилсэн ширүүн өрсөлдөөнд 25-23 | 24-26 | 17-25 | 25-18 | 15-10 харьцаатайгаар Хэнтий Уурхайчин баг хожил байгуулж анхны шуугианыг тарилаа. Уурхайчин багаас Z.Veronika Vladimirovnа 20 оноогоор багтаа туслахдаа, 16-г нь довтолгоогоор, 2 хаалт, 2 давуулалтаар оноо авч, ялалт байгуулахад том үүрэг гүйцэтгэлээ. Харин нөгөө талд өнгөрсөн жилийн шилдэг гадаад тоглогч M.Sierra тоглолтын дундуур гэмтэл авсан нь Финикс багт багагүй хохирол амсууллаа. Тус хоёр багийн дараагийн тоглолт 01-р сарын 15-ны 12:00 цагаас.

Төв Миг клуб өнгөрсөн жилийн дэд аваргуудыг эхний тоглолтод “Нар үзүүлсэнгүй” 

Улиралд хоёрдугаар байраар шалгарсан SG Hawks баг хагас шигшээд Төв Миг клубтэй учраа тааран өрсөлдөж байна. Энэ жил цоо шинэ бүрэлдэхүүнтэйгээр байгуулагдсан Төв Миг клуб хагас шигшээн эхний тоглолтоос ямар зорилготой орж ирсэн гэдгээ харууллаа. Тэд гурван SG Hawks багийг гурван сетэд 25-21 | 27-25 | 25-19 харьцаатай буулган авч, нэг ч сет эсрэг багтаа алдсангүй. Тус тоглолтод D.Evandro 15 довтолгоо амжилттай болгож багаа тэргүүлсэн бол Б.Анхбаяр, M.Dadial нар 3, 3 хаалт гүйцэтгэж, хамгаалалтад идэвхтэй тоглов. Нөгөө талд SG Hawks багийн ахлагч Б.Батсуурь 17 довтолгоо, 1 хаалт гүйцэтгэж багаа тэргүүлсэн ч багийн бусад тоглогч хангалттай тоглолт үзүүлж чадалгүй анхны ялагдлаа амслаа. Тэдний дараагийн тоглолт 01-р сарын 15-нд 19:30 цагаас болно.

Аваргуудаас амаргүй хожил авсан Ховд Ижил Алтай Торгууд

Өнгөрсөн жилийн аварга Хөвсгөл Эрчим клуб энэ улирал 3 дахь дараалсан аваргын цомоо авахаар өрсөлдөж буй. Харин нөгөө талд Г.Саруулгэрэл ахлагчтай Ховд Ижил Алтай Торгууд багийнхан тэдэнд тийм ч амар бууж өгөхгүй гэдгээ ням гарагт баталлаа. Эхний сет Алтай Торгууд авсан ч хоёр болон гурав дахь сетэд Эрчим илүүрхэн 2-1 харьцаатай болоход Алтай Торгууд хүнд байдалд орж эхлэв. Дөрөв дэх сетэд 14-7 харьцаатай Эрчим илүүрхэж явсан ч Алтай Торгууд бууж өгөлгүй багаараа тун нягт тоглож, улмаар онооны харьцааг ойртуулж, 25-20 харьцаатай буулган авч, улмаар хэмнэлээ олсон Алтай Торгууд 5 дахь сетэд 15-10 харьцаатай хүчирхэг Эрчмийг хожсоноор цувралд 1-0 харьцаатай илүүрхэж эхэллээ. Алтай Торгууд багаас Y.Jasuteisu өчигдөр зогсоогдошгүй байсан гэхэд болно. Тэрбээр нийт 29 оноогоор багтаа туслахдаа 27 довтолгоо, 2 хаалт гүйцэтгэж талбай дээрх нийт тоглогчдыг тэргүүлжээ. Тэдний дараагийн тоглолт 01-р сарын 15-нд 14:30 цагаас учрах хуваарьтай байна.

Өнгөрсөн жилүүдийн Аваргуудын өрсөлдөөн хагас шигшээг чимж байна.

Энэ жилийн эрэгтэй хагас шигшээд сүүлийн гурван улиралд аварга болцгоосон Хасу Мегастарс болон Натур Бакс клуб учраа таарсан. Өчигдөр болсон цувралын эхний тоглолт үзэгчдийг суудлаас нь өндөлзүүлсэн сонирхолтой тоглолт болж өндөрлөлөө. Эхний хоёр сетэд 25-23, 25-14 харьцаатай Хасугийн ялалтаар өндөрлөсөн бол Натур Бакс тийм ч амар бууж өгөхийг хүссэнгүй. Дараагийн хоёр сетэд 25-23, 25-22 харьцаатай хожиж 2-2 болгон сетийн харьцааг тэнцүүллээ. Шийдвэрлэх 5 дахь сет оноо дээр доороо орсон ширүүн өрсөлдөөн дунд өрнөж, С.Нямсүх, Э.Энх-Амгалан гэсэн багын найзуудын дуэль болж өнгөрөв. Онооны харьцаа 1-ээс салахгүй явсаар 17-17 дээр тэнцэхэд Хасу Мегастарс клуб хоёр довтолгоо дараалан амжилттай болгож, 19-17 харьцаатайгаар ялалт байгуулан цувралын эхний тоглолтын хожлоо авлаа.

Тус тоглолтод С.Нямсүх 25 оноогоор багаа тэргүүлэхдээ 21 довтолгоо, 2 хаалт, 2 давуулалт амжилттай гүйцэтгэсэн бол Натур Бакс клубээс багийн ахлагч Э.Энх-Амгалан 21 довтолгоо, 2 давуулалт, 1 хаалт гүйцэтгэж 24 оноогоор багаа тэргүүлсэн ч харамсалтай нь эцсийн мөчид хожигдол хүлээлээ. Тэдний дараагийн тоглолт 01-р сарын 15-нд 14:30 цагаас Степпе Аренад болно.