10 сарын 21
Спортын ертөнц хүн төрөлхтний тэсвэр тэвчээр, хүнд хэцүү нөхцөлөөс амжилтад хүрсэн гайхалтай түүхүүдээр дүүрэн байдаг. Энэ байдал нь хүүхэд залууст урам зориг өгөхөөс гадна тэдний олон сорилт, асуудлыг хэрхэн давж туулсан түүх бусдад үлгэр дуурайлал болж урагшлахад нь тус дэм болдог билээ.
Энэхүү бичвэрт дэлхий дахинаа нөлөөлсөн 5 тамирчны түүх, тэдэнд тулгарсан саад бэрхшээлийг хэрхэн туулсан талаар товчлон хүргэж байна.
Асуудал: Бейсболын спортод маш их байсан арьс өнгөөр ялгаварлан гадуурхалтад өртөж байсан.
Жеки Робинсон Бейсболын мэргэжлийн дээд лигт тоглосон анхны Африк-Америкийн хар арьст тамирчин бөгөөд арьс өнгөөр ялгаварлан гадуурхалтад ихээр өртөж байсан гэдэг. Олон тамирчин энэ асуудал хүндээр тусч, зарим нь замналаа өндөрлүүлж байсан бол Робинсон сэтгэл гутралд оролгүй зөвхөн тоглолтдоо анхаарлаа төвлөрүүлж, саад бэрхшээлийг алхам алхмаар туулан гарчээ. Хожим тэрбээр бейсболын нүүр царай болтлоо супер амжилт гаргаж, уг спортод байсан арьс өнгөний үзлийг өөрчилсөн алдартай тамирчин болсон юм.
Робинсоны эр зориг, шийдэмгий байдал нь тоо томшгүй олон өнгөт арьст тамирчдад мэргэжлийн спортоор мөрөөдлөө биелүүлэх замыг нээж өгсөн.
Асуудал: Хүүхдийн полиомиелит буюу саа өвчин
Вилма Рудольф хүүхэд байхдаа полиомиелит өвчнөөр өвчилсөн тул түүний зүүн хөл нь саажсан байна. Гэвч тэрбээр шаргуу хөдөлмөр, тууштай байдлынхаа ачаар хөгжлийн бэрхшээлээ даван туулж, хөнгөн атлетикийн төрөлд дэлхийд данстай од тамирчин болсон юм.
Мөн арьс өнгөөр ялгаварлан гадуурхах үзэлтэй тулгарч байсан ч огтхон ч тоолгүй тэвчээртэй байж, нэг олимпоос гурван алтан медаль хүртсэн анхны Америк эмэгтэй тамирчин болж байсан юм.
Акулын дайралтад гараа алдсан ч бууж өгөөгүй Бетани Хэмилтон.
АНУ Серфингийн тамирчин Бетани Хэмилтон 13 настайдаа бэлтгэл хийж байх үед нь акул дайр ч зүүн гараа алджээ. Хэдийгээр нэг гараа алсдан ч тэр спортын замналаа орхисонгүй. Нэг гараараа серфингээр хичээллэх нь маш хэцүү бөгөөд үүнээсээ үүдэн маш олон бэртэл авч байсан гэдэг. Тэрбээр бие махбодын хувьд хүнд хэцүү, бэрхшээлтэй байсан хэдий ч спортдоо эргэн ирж, мэргэжлийн серфингчин болсон юм. Түүний эр зориг, тууштай байдал нь дэлхий даяар сая сая хүмүүст итгэл найдвар болсоор байна.
Саад бэрхшээл: Нурууны хэвийн бус мурийлттай
Дэлхийн хамгийн хурдан хүн хочит Усэйн Болт нурууны хэвийн бус мурийлт үүсгэдэг сколиозтой төрсөн. Түүнийг амжилттай тамирчин болж чадах эсэхэд олон хүн эргэлзэж байсан боловч Болт тэвчээртэй байж, өөрийн өвчиндөө санаа зоволгүй хөнгөн атлетикийн спортоор хичээллээсээр 100, 200 метрийн гүйлтийн төрөлд дэлхийн дээд амжилтыг тогтоож, Олимп, Дэлхийн тавцанд мөнхөлсөн алдартай тамирчин болсон юм.
Сагсан бөмбөгийн домогт тамирчин Майкл Жордан ахлах сургуулийнхаа сагсан бөмбөгийн багаас хасагдаж байсныг мэдэх үү?
Майкл Жорданыг бүх цаг үеийн хамгийн агуу сагсан бөмбөгчдийн нэг, магадгүй хамгийн шилдэг нь ч гэж үздэг. Гэвч түүний амжилтад хүрэх зам тийм ч дардан байгаагүй. Жордан ахлах сургуулийнхаа сагсан бөмбөгийн багаас хасагдсан бөгөөд үүнээсээ шалтгаалж маш их сэтгэлээр унаж байсан гэдэг.
Гэвч тэрээр огт бууж өгөөгүй бөгөөд энэ бүтэлгүйтлээсээ улам хурцлагдаж шаргуу бэлтгэл хийж, их сургуулийн багт амжилттай тоглож, NBA-ийн домогт карьераа эхлүүлэх томоохон сэдэл болсон юм.
