Үндэсний дээд лигийн талбайд шинэ оны нээлтээр эмэгтэй нэг, эрэгтэй хоёр тоглолт өнөөдөр болох хуваарьтай байна.

Эмэгтэй тоглолтыг нэг ч хожигдолгүй 11-0 харьцаатай итгэл төгс хүснэгтийг тэргүүлж буй Улаанбаатар Амазонс багийнхан лигт шинээр нэгдсэн Старс клубынхантай тоглоно. Залуу бүрэлдэхүүнтэй Старс клуб улиралд нэг ч хожигдол авалгүй 0-10 амжилттай яваа. Хоёр баг өмнө нь хоёр удаа таарч тоглохдоо 10-р сарын 15-нд 110-45 харьцаатай, 11-р сарын 28-нд 99-61 харьцаатай Улаанбаатар Амазонсууд илт давуу ялалт байгуулсан байна. Старс багийнхан энэ улиралд багаараа 60.6 оноо, 12.2 дамжуулалт, 41.4 самбар, 25 бөмбөг алдалт дунджилж байгаа ба 32.9 хувьтай довтолж байна. Харин хүснэгтийг тэргүүлэгч Улаанбаатар Амазонс багийнхан энэ улиралд багаараа 81.8 оноо, 52.7 самбар, 21.2 дамжуулалт, 13.6 бөмбөг таслалт, 4.8 хаалт дунджилж, багаараа 44.2 хувьтай довтолж байна. Дээрх хоёр багийн тоглолт 15:40 цагаас эхэлнэ.

Өнөөдөр 18:10 цагаас 7 хожил 7 хожигдолтой 6-р байранд яваа Завхан Бродерс болон хүснэгтийн сүүл мушгиж буй Эрдэнэт Майнерс багууд тоглоно. Улиралд тэд ердөө нэг удаа учраа тааран тоглосон ба өндөр оноо авалттай тоглолт болж 104-96 харьцаатай Завхан Бродрес баг ялалт байгуулжээ. Дээд лигийг оноо авалтаар тэргүүлж буй Завхан Бродерс өмнөх тоглолтоос хойш М.Мүүрээр хүчээ зузаатгасан бол Эрдэнэт Майнес баг К.Ешо болон С.Пондс гэсэн импорт тоглогчдыг эгнээндээ нэгтгэсэн. Мөн М.Мүүр өмнөх гэрээ хийсэн багийнхаа эсрэг толгох сонирхолтой тоглолт хүлээж байна. Эрдэнэт Майнерс баг 11 хожигдолтойн дээр дахин хожигдол амсвал Плэй-оффын байрлалд орох зорилго нь улам бүр холдох бол Завхан Бродерс баг хожил авбал байрлалаа дээшлүүлж, улиралд 50%-иас дээш амжилт үзүүлэх боломжтой болох юм.

Өнөөдрийн оргил тоглолт Дээд лигийн дуэл гэгдээд буй SG Apes болон Сэлэнгэ Бодонс багуудын хооронд 20:40 цагаас болно. Өмнө нь 10-р сарын 26-нд болсон тоглолтод Сэлэнгэ Бодонс 80-72 харьцаатай хожиж, улирлын гурав дахь ялалтаа авсан. Тус тоглолтод Ахмад Гилберт 25 оноо, 10 самбар, 8 дамжуулалт гүйцэтгэж бараг л трипл дабл гүйцэтгэх шахаж, багтаа хожил байгуулахад том нэмэр болсон юм. 6-6 ажилттай яваа SG Apes сүүлийн хоёр тоглолт дараалан ялсан бол 9-5 амжилттай хүснэгтийн дэд байран яваа Сэлэнгэ Бодонс сүүлийн гурван тоглолт дараалан ялсан байна. Эхний тоглолтоос хойш гарсан өөрчлөлтүүд гэвэл Сэлэнгэ Бодонс багийн хувьд өмнөх улиралд Бишрэлт Металл багт тоглосон Ж.Силлагаар хүч нэмсэн. Харин SG Apes багийн импорт тоглогчдод бүрэн өөрчлөлт орсон ба Д.Акот, К.Клайябурн нар нэмэгдэж, сүүлийн тоглолтуудад ямар чадварлаг тоглогчид гэдгээ батлан харуулсан билээ. Мэдээж хоёр багийн цөм бүрэлдэхүүнүүд хэвээр байгаа бөгөөд өнөөдрийн тоглолтод ямар нэгэн гэмтэл бэртлийн мэдээлэл хараахан гараагүй байна.

Гэрэл зургийг Үндэсний Дээд лиг