Т.ТУЛГА: "ААШТ-д 65 кг-д барилдлаа. Бэлтгэл маш сайн хангасан байсан. Финалын барилдаан яг санасанд хүрсэн барилдаан болсонгүй гэхдээ мэдрэмжийг нь авчихлаа, дараа нь яаж барилдахаа ойлгочихлоо. Барьц, мэхээ ерөнхийдөө ойлгоод авчихлаа.

Азийн аваргын дараа болох Азийн тамирчдад олимпын эрх олгох тэмцээнд оролцох тамирчдадаа амжилт хүсье. Бүгдэнд нь боломж байгаа шүү. Бид бүгд нэг баг, бүгдээрээ хичээгээд олимпод олон жил тасарсан чөлөөт бөхийн медалийг авчирцгаая"

Т.Тулга Ази тивийн аварга шалгаруулах тэмцээнд эрэгтэйчүүдийн 65 кг-ийн жинд өрсөлдөж, эхний тойрогт Японы тамирчин Оно Масаносүкэ-г 32 секундэд гарт эргэх мэхээр цэвэр ялж, дараа нь БНАСУ-ын тамирчин Хён Сон Ханг 5-0, хэсгийн аваргын төлөө Энэтхэгийн бөх Рохитыг 7-0 харьцаатай ялж финалд шалгарсан юм. 

Финалд  Ираны тамирчин Рахман М.Амоудзадхалилитай учраа таарсан. Хоёр тамирчин өнгөрсөн 9-р сард Ханжоу хотноо болсон Азийн наадмын финалд таарч барилдахад манай тамирчин 11-1 харьцаатай оноогоор цэвэр ялж байсан билээ. Харин энэ удаад манай тамирчин Рахман Амузидхалилид 2:1-ээр ялагдал хүлээн мөнгөн медалийн тавцанд зогслоо. Энэ нь түүний Ази тивийн хоёр дахь мөнгөн медаль байв.