Волейболын Үндэсний дээд лигийн эрэгтэйчүүдийн хоёрдугаар тойргийн тоглолт үргэлжлэн явагдаж байна. Өчигдөр оройн оргил тоглолтоор хүснэгтийг тэргүүлэгчид болох SG Hawks болон Хасу Мегастарс клубүүд хоорондоо туллаа. Б.Батсуурь ахлагчтай SG Hawks клуб энэ улиралд нэг ч хожигдол амсаагүй байсан ба тэд 11-0 амжилттай, 32 оноотой лигийг тэргүүлж байсан бол А.Даваажаргал ахлагчтай Хасу Мегастарс клуб 10-1 амжилттай тэдний араас нэхэж явсан юм. Тоглолтын эхний сетэд Хасу 25-22 харьцаатай, хоёрдугаар сетэд SG Hawks 25-15 харьцаатай, гуравдугаар сетэд ширүүн өрсөлдөөн өрнөж 28-26 харьцаатай Хасу, дөрөвдүгээр сетэд 25-18 харьцаатай SG Hawks хожиж, таван сетэд тоглолтын ялагч шийдэгдэхээр болов. Шийдвэрлэх тавдугаар сетэд С.Нямсүх гялалзаж, дөрвөн довтолгоо, нэг хаалт гүйцэтгэж 15-9 харьцаатай Хасу Мегастарс клуб хожил байгууллаа. Ийнхүү 11-1 харьцаатай хоёр багийн хожил хожигдол тэнцэж, хоёулаа 32 оноотой хүснэгтийг тэргүүлж байна.

Үндсэн тоглолтод Хасу Мегастарс клубээс С.Нямсүх 29 оноо, Б.Баярсайхан 14 оноо, С.Эвгений 6 оноогоо авсан бол Амирали Мохаммад 5 хаалтаар багаа тэргүүлжээ. Нөгөө талд Б.Батсуурь 31 оноо, Ж.Энх-Эрдэнэ 16 оноо, Б.Батсуурь 6 хаалт гүйцэтгэж багаа тэргүүлжээ.

Сонирхуулахад Хасу Мегастарс клуб 2019 онд 11 дараалан хожиж лигийн дээд амжилтыг тогтоож байсан бол SG Hawks баг энэ улиралд мөн адил 11 дараалан хожиж тэдний амжилттай тэнцсэн юм.