Монголын сагсан бөмбөгийн Үндэсний дээд лигт тоглож буй гадаад тоглогчдыг цувралаар хүргэж байна. Энэ удаа Бишрэлт Металл багийн бүрэлдэхүүнд багтсан Жэйлен Блэндийг онцолж байна.

Жэйлен Жован Д Блэнд 1993 оны гуравдугаар сарын 29-нд АНУ-ын Калифорниа мужийн Лос Анжелес хотноо Кили Блэнд, Таша Мур нарын гэр бүлд мэндэлжээ. Түүний аав сагсан бөмбөг тоглоход нь хамгийн их нөлөөлсөн гэдэг. Учир нь түүнийг байж болох хамгийн шилдэг болоход нь үргэлж дэмжиж, түлхэц болдог ард нь хана мэт зогсдог байжээ. 

NBA-ийн хамгийн дуртай тоглогчид нь Леброн Жэймс, Дамиан Лиллард нар ба Кливленд Кавалиерс багийг дэмждэг байна. Түүний идэх дуртай хоол нь тако, пицца, лазанья гэнэ. Чөлөөт цагаараа хөгжим сонсох, видео тоглоом тоглох, кино үзэх дуртай. “Хайр ба сагсан бөмбөг”, “Оргил цаг”, “Дараагийн баасан гараг”, “Шинэ Ханхүү” зэрэг кинонуудыг үзэх дуртай. Монгол улс түүний зочлон тоглож буй гурав дахь улс болсон байна. 

Мэргэжлийн замнал

Түүний коллежийн замнал 2011 онд Мюррей Стэйтэд эхэлсэн ч хоёрдугаар курсээсээ UC Riverside-д шилжин оржээ. Сургуулийнхаа шигшээ багт тоглохдоо нэг улиралд алсын зайнаас 118 удаа амжилттай оруулж, дээд амжилт тогтоож байв. Мөн дивизоны нийт тоглогчдоос 3 онооны шидэлтээр 4-р байранд бичигдсэн байна. Коллежийн замналдаа 16.1 оноо, алсын зайнаас 40 хувьтай шидэж, Big West бүсийн хоёрдугаар багт нэрлэгдсэж байжээ. 

2016 онд коллежоо төгссөний дараа NBA-ийн драфтад нэрээ өгсөн ч сонгогдож чадалгүй G Лигийн драфтын 15 дахь сонголтоор Солт Лэйк Сити буюу Юта Жаззын хөгжлийн лигийн багтай гэрээ хийсэн байна. 2016-2017 оны улиралд 37 тоглолтод 18 минут талбайд гарахдаа 5.5 оноо, 2 самбар, 1 оновчтой дамжуулалт дунджилж байжээ. 

Ийнхүү NBA-д дэвшиж чадаагүй ч мэргэжлийн замналаа үргэлжлүүлэхээр 2018 онд Канадын дээд лиг болох NBL-ыг зорьсон байна. Тус лигийн Sudbury Five багтай гэрээ байгуулж, 2019, 2020, 2022, 2023 оны улирлуудад тоглосон байна. Канадын дээд лигт 4 улирал тоглохдоо 18.8 оноо, 5.9 самбар, 2.3 оновчтой дамжуулалт дундажлан 2019 оны улиралд авч Канад NBL-д есдүгээр байр эзэлсэн. Тэрээр 2018 оны 11-р сарын 18-нд долоо хоногийн шилдэг тоглогчийн шагналыг хүртсэн. 

Мөн элссэн жилдээ шилдэг шинэ тоглогчийн шагнал хүртэж, лигийн нүүр царай болсон байна. Хоёр жил тоглосны дараа түүнтэй Милаукий Баксын хөгжлийн лигийн баг болох Wisconsin Herd багтаа нэгтгэж, 2021-2022 оны улирал тоглосон байна. Тухайн улиралдаа 8.4 оноо, 2.2 самбар, 1 оновчтой дамжуулалт дунджилсан ба ирэх жил дахин Канадын Sudbury Five багтаа нэгдэн хоёр улирал тоглосон байна. 3D сагсан бөмбөгийн агентлагаар дамжуулан энэ улиралд Бишрэлт Металл багт нэгдсэн байна. 12-р сарын 25-нд тоглосон эхний тоглолтдоо 10 оноо, 3 оновчтой дамжуулалт, 2 бөмбөг таслалт гүйцэтгэж чадварлаг тоглогч гэдгээ Монголын үзэгчдэд батлан харуулсан юм.