Монголын Волейболын Үндэсний дээд лигийн 2024-2025 оны улирлын сүүлийн тойрог буюу 3-р тойрог ирэх долоо хоногт өндөрлөнө. Гэхдээ хэдийнээ хагас шигшээд өрсөлдөх дөрвөн баг тодорхой болжээ. Харин байрлалын хувьд эхний хоёр болон гурав дөрөвдүгээр байраар аль баг гарах нь ирэх долоо хоногт шийдэгдэнэ.

Энэ жил Дээд лигт эрэгтэй долоон баг өрсөлдсөнөөс эрэгтэй гурван баг шинээр өрсөлдөөнд орж ирсэн. Тэдний нэг болох Төв Миг клуб анх оролцсон жилдээ хагас шигшээд өрсөлдөх эрхээ халааслаад буй. Харин Өмнөговь Энержи, шинэ залуу бүрэлдэхүүнтэй Минтонетт Говь багууд туршлага суусан нэг улирлыг өнгөрүүллээ.

Та бүхэнд 01-р сарын 03-ны өдрийн байдлаарх багуудын амжилтын хүснэгтийг танилцуулбал:

Өнгөрсөн жилийн аварга Натур Бакс клуб энэ улиралд илүү залуу, шинэлэг бүрэлдэхүүнээр орж ирсэн. Э.Энх-Амгалан ахлагчтай Бакс өнөөдрийн байдлаар 8 хожил, 8 хожигдолтой 24 оноотойгоор хүснэгтийн 4-р байранд бичигдэж байна. Өчигдөр тэд Хасу Мегастарс клубт 3-1 харьцаатай хожигдсон 50%-ын амжилттай яваа. Харин тэдний ард яваа Өмнөговь Энержи Клуб 4-11 амжилттай байгаа ба багуудад хоёр тоглолт үлдсэн тул эхний дөрвөн байр ийнхүү баталгаажиж байна. Натур Бакс 01-р сарын 05-нд Өмнөговь Энержи багтай, 10-р сарын 07-нд Минтонетт Говь багтай тус тус учраа таарснаар улирлын тоглолт нь өндөрлөх юм.

Хүснэгтийн гуравдугаар байранд яваа Төв Миг клуб энэ улиралд шинээр байгуулагдан орохдоо лигийн туршлагатай тоглогчдоор багаа бүрдүүлэн дээд лигт элссэн. Ц.Анхбаяр ахлагчтай Миг клуб өнөөдрийн байдлаар 9 хожил 6 хожигдолтой яваа тэдэнд одоо гурван тоглолт үлдсэн байна. Мөн адил Төв Миг клуб хасагдах шатанд шалгарах нь баталгаажсан. Маргааш буюу 01-р сарын 04-ны өдөр Хилчин Алтайн Барстай, 01-р сарын 07-нд Хасу Мегастарс клубтэй, 01-р сарын 09-нд Өмнөговь Энержи клубтэй тус тус тоглож, тэдний Дээд лигийн анхны улирлын тоглолтууд өндөрлөх юм.

Лигийн хамгийн тогтвортой багуудын нэг Хасу Мегастарс клуб энэ улиралд БНСУ-ын дасгалжуулагчаар удирдуулж, эгнээндээ Б.Баярсайханг дахин нэгтгэж хүчээ зузаатгасан. Мөн улирлын дундуур Алтайн Барс клубээс М.Косаг нэгтгээд амжсан. Улиралд тэд 14-1 амжилттай, 41 оноотойгоор хүснэгтийн хоёрдугаар байранд бичигдэж байгаа ба тэдэнд гуравхан тоглолт үлдээд байна. Тус гурван тоглолт болон SG Hawks багийн үлдсэн тоглолтын үр дүнгээс шалтгаалж нэгдүгээр байраар гарч чадах эсэх нь тодорхой болох юм. Хасу Мегастарс клубийн үлдсэн гурван тоглолт 01-р сарын 04-нд Минтонетт Говь багтай, 01-р сарын 07-нд Төв Миг клубтэй, 01-р сарын 09-нд энэ жилийн цорын ганц хожигдлыг амсуулсан SG Hawks багтай тоглох юм. 

Энэ жил лигт цоо шинэ өнгөр төрх, нэртэйгээр орж ирсэн өнгөрсөн жилийн дэд аварга SG Hawks баг 15-1 амжилттай 44 оноотойгоор хүснэгтийг тэргүүлж байна. Б.Батсуурь ахлагчтай Хокс багийнхан энэ улиралд Ж.Энх-Эрдэнэ, Ф.Лескэй, К.Онолбек зэрэг чадварлаг тоглогчдоор хүчээ зузаатган өрсөлдөж буй. Улиралд нэг ч хожигдолгүй явсан тэдний анхны хожигдлыг Хасу Мегастарс клуб 12-р сарын 17-нд 3-2 харьцаатай амсуулсан. Одоо тэдэн хоёр тоглолт үлдсэн ба 01-р сарын 05-нд Хилчин Алтайн Барс клубтэй, 01-р сарын 09-нд Хасу Мегастарс клубтэй тус тус тоглоно. Улирлын сүүлийн тоглолтод Хасу Мегастарс клубыг буулгаж авбал тэд энэ улирлын амжилтын хүснэгтийг тэргүүлж 4-р байраар шалгарсан багтай хагас шигшээд өрсөлдөх эрхийн төлөө өрсөлдөх юм.