Монголын Волейболын Үндэсний дээд лигийн 2024-2025 оны улирлын сүүлийн тойрог буюу 3-р тойрог энэ долоо хоногт өндөрлөнө. Энэ улирлын аваргын төлөө өрсөлдөх дөрвөн баг аль хэдний тодорсон. Харин байрлалын хувьд нэг хоёрдугаар байр болон гурав дөрөвдүгээр байраар аль баг гарах нь үлдсэн гурван тоглолтоор шийдэгдэх гэж байна.

2024-2025 оны улиралд эмэгтэй 9 баг өрсөлдөж, волейбол сонирхогчдод олон гайхалтай тоглолтуудаар бэлэг барилаа. 

Үндэсний дээд лигийн эмэгтэй гурван тоглолт үлдсэн байгаа ба тус тоглолтуудаас шалтгаалж хагас шигшээд аль багууд хоорондоо өрсөлдөх нь шийдэгдэнэ.

Тодруулбал өнөөдөр 12:00 цагаас болох Хөвсгөл Эрчим болон Хобби Эйс багуудын тоглолтоор Хөвсгөл Эрчим баг хожвол 3-р байраа баталгаажуулна. Өнгөрсөн жилийн аваргууд хэдий 3-р байраар шалгарсан ч тэд аваргын төлөө өрсөлдөхүйц хүчирхэг баг хэвээр буй.

Тэдний араас хүснэгтийн байрлал шийдэх чухал тоглолт явагдах нь П.Буянжаргал ахлагчтай Хэнтий Уурхайчид болон Г.Саруулгэрэл ахлагчтай Ховд Ижил Алтай Торгууд багуудын тоглоно. Хэрвээ Хөвсгөл Эрчим хожвол Уурхайчид хожсон ч 4-р байраар гарах бол Ховд Ижил Алтай Торгууд хожвол Улаанбаатар Финиксын тоглолтоос шалтгаалж 1-р байрлуу ч орох боломжтой.

Хүснэгтийн 1-р байр 01-р сарын 09-ны өдөр болох Улаанбаатар Финикс Хашхан Өвөрхангай багуудын тоглолтоос хамаарна. Учир нь өнөөдөр Ховд Ижил Алтай Торгууд баг хожвол 15 хожилтой болбол Улаанбаатар Финикс зайлшгүй хожиж байж 1-р байраа баталгаажуулах юм.

Үндэсний Волейболын Дээд лигийн сүүлийн тоглолтууд өнөөдөр 12:00 цагаас эхэлнэ. Та бүхэн Дээд лигийн стандинг, тоглолтын хуваарь, үр дүн, тамирчдын үзүүлэлтийг ЭНД даран харах боломжтой.