Бүх Оддод 6 удаа сонгогдсон Жимми Батлер нь багийн удирдлагуудад солилцоогоор явах хүсэлтэй байгаагаа илэрхийлсэн тухай эх сурвалжууд мэдээлээд байна.

Тэрээр багтаа үлдэх сонирхолгүй байгаа бөгөөд Майами Хит багаас өөр хаана ч тоглоход нээлттэй бөгөөд очсон багаа аваргад өрсөлдөхүйц болгож чадна гэдэгтээ итгэлтэй байгаа аж. Мөн тэрээр солилцоогоор явах хүртлээ багийнхаа бүхий л үйл ажиллагаанд оролцохоо мэдэгдсэн. 

Хит багийн зүгээс түүний хүсэлтэд одоогоор хариу өгөөгүй байна.

Баасан гарагт Индиана Пэйсэрс багийн эсрэг хийсэн тоглолтод Батлер ердөө 9 оноо авч 128-115 харьцаатай тоглолт Пэйсэрсийн талд өндөрлөсөн юм. Тоглолтын дараа тэрээр Майамид тоглох хүсэл нь унтарсан тухайгаа хэлээд амжив. 

Одоогийн багтаа тоглохдоо баяр хөөрөө эргүүлж олох уу гэж асуухад Батлер: “Үгүй л байх даа” гэж хариулсан байна.

Пүрэв гарагт Пэликанс багтай хийсэн тоглолтод Батлерийг хангалттай сайн хичээгээгүй гэж багийн удирдлагуудын зүгээс хийсэн шүүмжилсэн нь түүнийг ийм шийдвэр гаргахад хүргэсэн гэж эх сурвалж мэдээлсэн. Өвчний улмаас 13 хоног өнжсөний дараах анхны тоглолтдоо 25 минут тоглохдоо ердөө 5 удаа л шидэлт гүйцэтгэсэн.

Өмнөх 2 тоглолт хоёуланд нь дасгалжуулагч Эрик Споэлстра Батлерийг 4-р үед тоглуулаагүй байна. 

Батлер гаргасан шийдвэр нь багийн ашиг сонирхолд нийцэхгүй байгаа бөгөөд ердөө 7 хоногийн өмнө Маями Хит багийн ерөнхийлөгч Пэт Раяли Батлерийг солилцоогоор явуулах төлөвлөгөөгүй гэж мэдэгдэж байсан.

Раяли болон Хит багийн эзэн Микки Арисон нар Батлерийн бие төлөөлөгчтэй уулзан талууд хоорондын үл ойлголцол зэргийг шийдвэрлэх гэж оролдсон боловч бүтэлгүйтсэн.

Өнгөрсөн хавар Раяли улирал эхлэхээс өмнө Батлерийн гэрээг сунгахгүй гэж зарласнаас хойш Батлер болон багийн харилцаа муудаж эхэлсэн юм. Тэрээр 2 жилийн $113 сая доллароор гэрээгээ сунгах боломжтой байжээ.

Өмнөх улирлын плэй-иний тоглолтод ялан плэй-оффт орох эрхээ авсан ч Батлер өвдөгний гэмтлийн улмаас плэй-оффт тоглож чадалгүй Маями Хит баг Бостон Сэлтикс багт эхний тойрогт ялагдсан юм. Уг цувралд ялагдсаны дараа Батлер өөрийгөө гэмтээгүй тоглолтод оролцсон бол Хит ялах байсан гэж цахим сүлжээнд хийсэн ярилцлагадаа хэлсэн байна.

Үүний хариуд улирлын төгсгөлд хийсэн хэвлэлийн хурал дээрээ

“Хэрэв чи талбай дээр байгаагүй бол амаа хамхих хэрэгтэй” гэж хариулжээ.

Батлерийн хувьд гэрээнийхээ сүүлийн жил дээр байгаа бөгөөд гэрээгээ жилийн $52 саяар сунгах боломжтой байгаа билээ. 2021 онд мөн л сүүлийн жил дээрээ гэрээгээ сунгаж байсан удаатай.

Солилцоо амжилтгүй болсон тохиолдолд Батлерыг гэрээгээ сунгалгүй чөлөөт агент болно хэмээн багууд дунд яригдах болсон байна.

Батлер нь өдгөө 35 настай бөгөөд энэ улирал 18.0 оноо, 5.7 сба, 4.7 оновчтой дамжуулалт дунджлахын хажуугаар карьерынхаа хамгийн өндөр хувь болох 55.3%-тай довтолгоогоо гүйцэтгэж байгаа билээ. Тэрээр НБА-гийн элит тоглогчдын нэг, плэй-оффт гялалздаг од тоглогч юм. Батлер 13 улирал тоглохдоо нэг л удаа плэй-оффоос мултарч байсан ба Маями Хит багт өнгөрүүлсэн 5 улиралдаа тус багийг 2 НБА Финал руу хөтөлсөн билээ.