Монголын Волейболын Дээд лигийн 2024-2025 оны улирлын хасагдах шатны хариуцлагатай тоглолтууд өнөөдөр үргэлжилнэ. Монголын эрэгтэй, эмэгтэй шилдэг волейболчид, дасгалжуулагч, менежерүүдийн бэлтгэл сургуулилт, ур чадвар, хөдөлмөр, ур ухаан жил ирэх тусам улам бүр сайжирч буй. Үүнийг ч бид лигт өрсөлдөж буй багуудын эн тэнцүү өрсөлдөөн, гал гарсан тоглолтуудаар нотлон харж байна.

Тэгвэл өнөөдөр Финалд шалгарах эрхийн төлөөх эрэгтэй эмэгтэй шилдэг 8 багийн хариуцлагатай тоглолт AIC Steppe Arena-д үргэлжлэх гэж байна.

Энэ улиралд хүснэгтийг тэргүүлсэн ч эхний тоглолтод хожигдсон Улаанбаатар Финикс клуб өнөөдөр цувралын харьцааг тэнцүүлэх шаардлагатай. Тэд энэ улиралд 6 хожигдол амссан түүний хоёр хожигдлыг Хэнтий Уурхайчид тэдэнд өгсөн гэхээр ямар хүнд өрсөлдөгчидтэй учраа таарсан нь ойлгомжтой. Цувралын эхний тоглолтод Уурхайчид 5 сет гарсан хүнд тоглолтод 3-2 харьцаатай хүснэгтийг тэргүүлэгчдийг буулгаж авсан. Гол импорт тоглогч М.Sierra бэртэж тэдэнд том хохирол учирсан бол энэ удаа тэрээр талбайд гарна. Мөн П.Энххүслэн, Ж.Баянжаргал, Э.Анударь тэргүүтэй тоглогчид бууж өгөхийг хүсэхгүй нь ойлгомжтой. Харин эсрэг талд Ц.Баасандулам, П.Буянжаргал тэргүүтэй Уурхайчдын гадаад тоглогчид тун онцгой байгаа. Өнөөдөр Мөнгөн медаль баталгаажуулах эсхүл цувралыг тэнцүүлж гурав дахь тоглолт гаргах маш чухал тоглолт эхэлж байна.

Өнгөрсөн хоёр жил дараалан аварга авсан Хөвсгөл Эрчим энэ жил үзээгүй зүйлтэйгээ нүүр туллаа. Учир нь тэд лигийн хагас шигшээ тоглолтуудад хожигдож үзээгүй байсан. Харин энэ удаа өнгөрсөн улирал хагас шигшээд тэдэнд хожигдсон Ховд Ижил Алтай Торгууд баг өнгөрсөн жил дуусгаагүй ажлаа дуусгахаар шийджээ. Учир нь тэд эхний тоглолтод 2-1 харьцаанаас эргэн ирж 5 сетэд аваргуудыг буулгаж авсан. Өнгөрсөн жил хожигдлын нулимстай нутаг буцсан Y.Jusuteisu тус тоглолтод өөрийгөө бүрэн харуулж, шийдвэрлэх 5 дах сетэд 7 оноо авсан билээ. Нөгөө талд өнгөрсөн жилийн аваргууд тийм ч амар бууж өгөхгүй болов уу. Мэдээж тэдэнд туршлага, чадвар, сэтгэлзүй гээд бүх зүйл бий.

БНСУ-аас Lee Sun Kyu дасгалжуулагчаар энэ улиралд удирдуулсан Хасу Мегастарс клубын энэ улирлын цор ганц зорилго мэдээж аваргын цом. Хагас шигшээд өнгөрсөн жилийн аваргуудтай нүүр тулсан. Цувралын эхний тоглолтод Хасу Мегастарс 2-0 харьцаатай тэргүүлсэн ч Натур Бакс багийнхан ямар нөөцтэй баг гэдгээ харуулж, 2-2 болгон тэнцүүлсэн. Улмаар шийдвэрлэх 5 дахь сетэд дээр доороо гарсан өрсөлдөөний төгсгөлд 19-17 харьцаатай Хасу-ын ялалтаар өндөрлөсөн ч аль аль багуудад хожих боломж бий гэдгийг харуулсан чухал тоглолт болж өнгөрсөн. Өнөөдөр 17:00 цагаас аваргуудыг мулталж, аваргын цувралд орж ирэх үү, Натур Бакс цувралыг тэнцүүлж, дахин гал гарсан өрсөлдөөнийг бидэнд бэлэглэх үү гэдгийг харах болно. 

Энэ улирлын шилдэг апсетыг харуулж, шинэ багийн шилдэг тоглолтыг толилуулсан Төв Миг өнгөрсөн жилийн дутуугаа гүйцээхээр ирсэн SG Hawks багийг дахин буулгаж авах уу, SG Hawks өмнөх тоглолтын алдаагаа засч, цувралыг сунгах уу гэдгийг 19:30 цагаас эхлэх тоглолтоос мэдэж авах нь.

SG Hawks баг энэ улиралд хоёрхон хожигдол амссан ба нэг ч тоглолтод 3-0 харьцаатай “шүүрдүүлж” байгаагүй. Тэдний эхний хүнд цохилтыг Төв Миг клуб цувралын эхний тоглолтод өгсөн ба өнөөдөр тэд анхны жилдээ аваргын төлөө өрсөлдөхөөр сэтгэл шулуудан орж ирэх биз ээ. Өнгөрсөн тоглолтод тун хангалтгүй тоглолт үзүүлсэн SG Hawks багийнхан тэр дундаа импорт тоглогчид хоёр өдөр дараалан муу тоглолт үзүүлэхгүй нь лавтай.