Сагсан бөмбөгийн Үндэсний Дээд лигийн 2024-2025 оны улирлын тоглолтууд үргэлжилж байна.

Өнөөдөр Плэй-оффоос мултрах аюулд ороод буй ИНҮТ YES TLG баг хүснэгтийн 6-р байранд 50 хувийн амжилттай яваа Дархан Юнайтед багтай.

Сүүлийн гурван тоглолтдоо дараалан хожигдож, хүснэгтийн ёроолд унасан Налайх Бизон өнгөрсөн жилийн аваргуудын эсрэг.

Хожил ус агаар мэт хэрэгтэй байгаа Завхан Бродерс баг Демаркус Казинсийг хүлээх зуур хүснэгтийн хоёрдугаар байраа хадгалахыг хүсэж буй Сэлэнгэ Бодонс багтай тус тус тоглох нь ээ.

Дархан Юнайтед, ИНҮТ YES TLG багууд лигийн эхний тойрогт 10-р сарын 26-нд тоглсоно. Тус тоглолтод ИНҮТ багийнхан 80-66 харьцаатай буулгаж авсан ба одоо тэдний бүрэлдэхүүнд байхгүй А.Харрис, А.Батхуяг нар 26, 27 оноогоор багаа тэргүүлжээ. Харин Дархан Юнайтед багаас багийн гол тоглогчид бүгд байсан ч хожил байгуулж чадаагүй байна. Багийн голлох үзүүлэлтүүд болох самбар, оновчтой дамжуулалт, бөмбөг таслалт, хаалт гээд үзүүлэлтүүдээр Дарханчууд илүү байсан ч тэд багаараа ердөө 68 хувьтай шидэж, 28 хувьтай довтолсон нь хожигдлын шалтгаан болсон байна.

Өнөөдрийн тоглолтын хувьд ИНҮТ YES TLG багт Монгол улсын иргэн болохоор шийдсэн К.Вүүтен Жр тэдэнд буй. Харин Дархан Юнайтед баг аль хэдийн хоёр импорттойгоо хэрхэн тоглох учраа олсон ба 8-8 амжилттай яваа. ИНҮТ YES TLG баг 5-12 харьцаатай Плэй-оффт шалгарахад тун хэцүү байдалд орсон бөгөөд өнөөдрийн тоглолт тэдэнд маш чухал тоглолт байх нь гарцаагүй.

Улирал эхлэхээс өмнө Ж.Мосс, К.Уалкер нартай Налайх Бизон баг гэвэл тэднийг багадаа 50%-ын амжилттай явна гэж харах байсан байх. Харамсалтай нь тэд 5-13 амжилттайгаар яг одоо хүснэгтийн хамгийн доор бичигдэж байна. Тэд сүүлийн 10 тоглолтынхоо ердөө 2-т нь хожил байгуулсан гэхээр шинэ дасгалжуулагч, шинэ импорт тоглогчдын арга барилууд хараахан зохицоогүй байгаа гэлтэй. Өнөөдөр тэдний эсрэг өнгөрсөн жилийн аварга, улиралд ердөө хоёр хожигдол амссан хүчирхэг Хасын Хүлэгүүд тоглох болно.

Эхний тойрогт 91-86 харьцаатай Хасын Хүлэгүүд, хоёрдугаар тойрогт 74-65 харьцаатай мөн Хасын Хүлэгүүд баг ялалт байгуулсан байна. Өнөөдөр Налайх Бизон баг хоёр дараалсан хожигдлын цувралаа зогсоох уу, Хасын Хүлэгүүд лигийн тэргүүллээ улам бүр баталгаажуулах уу? 18:10 цагаас тус хоёр багийн тоглолт эхэлнэ. 

Монголын сагсан бөмбөгийн түүхэнд бас нэгэн шинэ хуудас нээхэд гар бие оролцож буй Сэлэнгэ Бодонс баг Демаркус Казинсыг багтаа нэгтгэх нь тодорхой болсон. Тэд НБА-ын супер одыг хүлээх зуураа лигт чамлахааргүй амжилттай буюу 11-6 амжилттай хүснэгтийн 2-р байранд бичигдэж байгаа. Өнөөдөр тэдний өрсөлдөгчөөр хүснэгтийн байрлалаа ахиулахыг хүсэж буй Даймонд Стөүн тэргүүтэй Завхан Бродерс баг хүч үзнэ. Яг одоогийн хүснэгтийн байрлалаар Плэй-оффт багууд шалгарана гэж төсөөлбөл хасагдах шатны эхий өрсөлдөөнд Даймонд Стөүн, Демаркус Казинс гэсэн нэгэн цагт Тайваны лигт өрсөлдөж явсан том залуусын өрсөлдөөнийг үзэх боломжтой.

Улирлын эхний тойрогт 72-67 харьцаатай Сэлэнгэ Бодонс баг буулгаж авсан ба А.Гилберт 18 оноо, 14 самбар, 4 дамжуулалт, Э.Цэрэнбаатар 18 оноо, 7 самбар, 4 дамжуулалтаар багаа тэргүүлжээ. Харин Завханаас Д.Стөүн 24 оноо, 14 самбар, 5 дамжуулалт, М.Баасандорж 11 оноо, 2 самбар, 2 дамжуулалт өгсөн ч баг нь дөрөвдүгээр үед багаараа ердөө 12 оноо авсан нь хожигдлын шалтгаан болжээ. М.Мүүрийг нэгтгэсэн тэд өнөөдөр өөр төлөвлөгөөтэй гарч ирэх нь дамжиггүй биз ээ.