Олон улсын сагсан бөмбөгийн холбооноос зохион байгуулдаг 16 хүртэлх насны Ази тивийн аварга шалгаруулах 8 дахь удаагийн тэмцээн манай улсад болж байна.

Манай шигшээ багийн хувьд хэсгийн эхний тоглолтоо БНХАУ-ын шигшээ багийн эсрэг хийж 103:45 харьцаатай хожигдсон бөгөөд хэсгийн хоёр дахь тоглолтоо БНСУ-ын шигшээ багтай өчигдөр хийж 85:59 харьцаатай хожигдлоо. Тус тоглолтод манай шигшээ багаас Д.Сүхбат 16 оноо 14 самбараас бөмбөг авалт хийж дабл-дабл гүйцэтгэн багаа тэргүүлсэн бол М.Мөнх-Эрдэнэ 12 оноо авч чадлаа. Харин БНСУ-ын шигшээ багаас онооны лидер Beomyoun Park 25 оноо 9 самбараас бөмбөг авалт хийж багаа тэргүүллээ.

Өнөөдөр манай улсын шигшээ баг Малайзын шигшээ багтай тоглох бөгөөд аль хожсон баг нь хэсгээс гуравдугаар байраар шалгарч нэмэлт плей-оффын тоглолт хийх эрхтэй болно. Харин БНСУ-ын шигшээ баг болон БНХАУ-ын шигшээ багуудын хооронд тоглолт болох бөгөөд аль хожсон баг нь хэсгээ тэргүүлнэ. 

Өнөөдөр манай шигшээ баг Малайзын шигшээ багтай 19:00 цагаас М Банк Аренад тоглоно. Монголын шигшээ багтаа АМЖИЛТ ХҮСЬЕ.