Аваргуудын лигийн 25/26 оны улирлын эхний тойргийн тоглолтууд явагдаж өндөрлөлөө. Урьд шөнө Аваргуудын лигийн хүрээнд зургаан тоглолт явагдлаа.

Newcastle United 1:2 Barcelona

Дэлхийн хамгийн баян эзэнтэй Английн Newcastle клуб өөрсдийн “St. James' Park” цэнгэлдэхдээ каталоны алдарт Barcelona клубийг хүлээн авч тоглолоо. Тус тоглолтын эхний хагас тун сонирхолтой өрнөж байсан ч хаалганы тор хөдөлсөнгүй. Харин хоёрдугаар хагасын 58 дахь минутад Barcelona клубт зуны наймааны цонхоор нэгдсэн Англи жигүүр Marcus Rashford мөргөж гоол оруулан тооны харьцааг 0:1 болгон нээв. Улмаар тоглолтын 67 дахь минутад эхний гоолийн эзэн Marcus Rashford 16метрийн торгуулийн шугамын гаднаас баруун хөлийн ганган цохилтоор гоол оруулж 0:2 болгон холдуулав. Тоглолтын үндсэн цаг дуусахтай зэрэгцэн талбайн эздийн сөрөг довтолгоо амжилттай хэрэгжиж баруун жигүүрээс Jacob Murphy-ийн гоёмсог дамжуулалтаар Англи жигүүр Anthony Gordon гоол оруулж 1:2 болгон ойртуулж, шүүгч долоон минут сунгасан ч дахин хаалганы тор хөдлөлгүй 1:2 харьцаатайгаар талбайн зочин Barcelona клуб ялалт байгуулж маш чухал гурван оноо авч чадлаа.

Manchester City 2:0 Napoli

Английн Manchester city клуб өөрсдийн “Etihad Stadium” цэнгэлдэхдээ Италийн аварга Napoli клубийг хүлээн авч тоглолоо. Тоглолтын 18 дахь минутад талбайн эздээс Erling Haaland хаалгачийн эсрэг гарч ирэх үед Napoli клубийн баруун жигүүрийн хамгаалагч Giovanni Di Lorenzo алдаа гарган зогсоож, улмаар шүүгч улаан хуудас өргөснөөр Giovanni Di Lorenzo талбайг чөлөөлөхөөр болов. Ингэснээр талбайн зочид нэг хүний дутуу болж, эхний хагасыг маш сайн хамгаалж, эхний хагасыг 0:0 харьцаатай өндөрлүүлэв. Тоглолтын хоёрдугаар хагасын 56 дахь минутад талбайн эздээс Phil Foden-ий маш гоё дамжуулалтаар Норвег довтлогч Erling Haaland гоол оруулж, Аваргуудын лигийн 49 тоглолтод оролцож, 50 дахь гоолоо оруулж чадлаа. Улмаар тоглолтын 65 дахь минутад Бельги жигүүр Jérémy Doku гоёмсог гоцлон тоглолт хийж, гоол оруулан 2:0 болгов. Улмаар тоглолтын үндсэн цагт талбайн эзэн Manchester City клуб 2:0 харьцаатай хожил байгуулан гурван оноо авч чадлаа. Тус тоглолтод Manchester City клубийн өмнөөс арван улирал тоглож, 422 тоглолтод оролцож, 108 гоол оруулсан Бельги хагас хамгаалагч Kevin de Bruyne хуучин багийнхаа эсрэг тоглосон ч ердөө 26 минут л талбайд тоглосон бөгөөд үзэгч фанатууд түүнийг халуун дотноор хүлээн авч, хүндэтгэл үзүүллээ.

Бусад тоглолтын үр дүн:

Eintracht Frankfurt 5:1 Galatasaray

Sporting 4:1 Kairat

Club Brugge 4:1 Monaco

Copenhagen 2:2 Bayer Leverkusen