Энэ улиралд нэг ч хожигдол амсаагүй, аваргаа хамгаалагч Хасын Хүлэгүүд баг болон өмнөх улиралд эхний шатанд 7 тоглолт гаргасан BHC Knights багуудын энэ улирлын хоёр дахь өрсөлдөөн 20:40 цагаас эхэлнэ. Улирлын эхлэлд буюу 10-р сарын 20-нд хийсэн тэдний эхний тоглолтод Хасын Хүлэгүүд 75-58 харьцаатай BCH Knights багийг буулгаж авсан. Өнөөдөр BCH Knights баг даагаа нэхэх, хүснэгтийн хоёрдугаар байраа хадгалах чухал ач холбогдолтой тоглолт болох юм. 

Өмнөх тоглолтод юу болсон бэ?

Улирлын өмнөх тоглолтод Ч.Ихбаяр 15 оноо, 4 самбар, Б.Барсболд 14 оноо, 7 самбар, Жордан Толберт 13 оноо, 13 самбартайгаар Хасын Хүлэгүүд багийг тэргүүлсэн. Харин нөгөө талд О.Эрдэнэцогт 23 оноо, 4 самбар, Пендариус Уиллиамс 12 оноо, 8 самартайгаар багаа тэргүүлсэн.

Багийн статистик үзүүлэлтээр Хүлэгүүд багаараа 45.6 хувьтай, алсын зайнаас 11 удаа амжилттай довтолж, 50 хувьтай довтолсон байна. Харин BCH Knights баг 28.8 хувьтай, довтлохдоо алсын зайнаас 22 довтолж, ердөө 5 удаа амжилттай довтолжээ. Аваргаа хамгаалагчид 41 самбар, 11 самбар, 5 бөмбөг таслалт, 5 хаалт гүйцэтгэж хамгаалалтад онцгой тоглолт гүйцэтгэсэн юм. Тиймдээ ч тэд дөрвөн үеийн турш нийтдээ 58 оноо алдсан байна.

Тус тоглолтоос хойш багуудад ямар өөрчлөлт орсон бэ?

Хасын Хүлэгүүд багийн хувьд багтаа нэгтгэхээр импорт тамирчдаа авчирсан ч бэлтгэлийн шалгаруулалтаас одоогоор тодорхой болоогүй байна. Мөн багийн холбон тоглогч Б.Барсболд өмнөх долоо хоногт авсан бэртлийн улмаас өнөөдрийн тоглолтод оролцох эсэх нь эргэлзээтэй байна.

Харин BCH Knights багийн хувьд хэд хэдэн өөрчлөлт хийсэн. Тэд өөрсдөд хэрэгтэй байсан төвийн тоглогчийн байрлалаа импорт тоглогчоор зузаатгаж, 2009 онд НБА-д элсэн хэд хэдэн багуудад тоглож явсан Байрон Мулленсийг багтаа нэгтгэсэн. Мөн Налайх Бизон багаас гэрээгээ цуцлаад байсан Г.Лхагвацэндтэй тохиролцоонд хүрч багийн хойд шугамны хамгаалалтаа сайжруулсан билээ.

Тус багуудаас ямар тоглогчид энэ улирал онцгой байгаа вэ?

Хасын Хүлэгүүд багаас 10-аас дээш оноо дунджил буй гурван тоглогч байгаа нь Жордан Толберт, А.Азбаяр, Ч.Ихбаяр нар юм. Оновчтой дамжуулалтаар Э.Саруул-Эрдэнэ 3.3 болон Б.Барсболд 2.8-ыг дунджилж буйгаараа багаа тэргүүлж явна. Харин алсын зайнаас нэг тоглолтод Э.Саруул-Эрдэнэ 2.6, Ч.Ихбаяр 2.1 удаа амжилттай шидэж лигийн шилдэг мэргэн буучдын жагсаалтад яваа. Харин самбарын тэмцэлд Жордан Толберт 9.3, А.Азбаяр 5.8 удаа самбараас бөмбөг авч багаа тэргүүлжээ. Жордан Толбетын хувьд зөвхөн самбар гэлтгүй 2.0 бөмбөг таслалт, 1.1 хаалт гүйцэтгэж лигийн цөөхөн тоглогчдын нэг юм.

BCH Knights багаас багийн ахлагч О.Эрдэнэцогт 22.0 оноо, П.Уиллиамс 15.4 оноотойгоор багаа тэргүүлж байна. П.Уиллиамс 5.7, Б.Төгөлдөр 2.7 дамжуулалт дунджилсан бол О.Эрдэнэцогт 6.8, Д.Дөлгөөнмөрөн 6.1 самбар тус тус дунджилжээ. О.Эрдэнэцогт энэ улиралд онцгой байгаа ба алсын зайнаас нэг тоглолтод 3.5 удаа шидэж, 2.9-ийг нь амжилттай болгосон өндөр гүйцэтгэлтэй тоглож байна. Мөн тэрбээр 1.3 бөмбөг таслалт, 5.4 самбар гүйцэтгэж байгаа юм.

Гэрэл зургийг: Үндэсний Дээд Лиг