Улирлын эхэн хэсгийг маргаангүй сонирхолтой, өрсөлдөөнтэй болгож байгаа өөрчлөлт бол түрүү жилээс хэрэгжиж эхэлсэн NBA-ийн цомын тэмцээн мөн билээ. Ердөө хоёр дахь удаагаа зохиогдож буй уг тэмцээний хасагдах шатны шөвгийн найман багийн өрсөлдөөн маргаашнаас эхэлнэ.

Өрнөд бүсээс шалгарсан дөрвөн баг:

Бүсийн аварга цолоо хамгаалагч Даллас Мавериксийн эсрэг бүрэлдэхүүнээ Хартенштейн, Карусо нараар зузаатгасан Оклахама Сити Тандер (түрүү улирлын Плейоффд учраа таарсан хоёр багийн тулаан эхний шатны хамгийн сонирхолтой тоглолт нь болох байх)

Стефен Көрригөөр ахлуулсан Алтан мужийн дайчид болон бүсийнхээ хоёр дугаар байр хүртэл амжилтаараа ахисан залуу цуст Хьюстон Рокетс нарын тулаан. Хамгийн сонирхолтой нь энэ хоёр баг 2020 оны 2-р сараас хойш нийт 16 удаа улирлын тоглолт хоорондоо хийхэд бүх тоглолтод Уарриорс хожиж байсан байна. Саяхан энэ хоёр баг таарахад Стеф, Грийнгүйгээр хүртэл Рокетсийг 99-93 харьцаатай хожсон гэдгийг санаж байгаа биз ээ. Хасагдах шатанд Рокетсийн залуус энэ дарангуйлал, хар цувралыг зогсоохын тулд байгаа бүхнээ дайчлах нь тодорхой.

Харин Дорнод бүсийн тулаанд:

Эмиратын нэрэмжит цомын тэмцээнд нэг ч ялагдалгүй яваа эрхэм бол экс Лэйкерсийн дасгалжуулагч Дервин Хам билээ. Тэрээр түрүү жил уг тэмцээнд Лейкерс багтайгаа түрүүлээд (7-0) энэ жил Баксд туслах дасгалжуулагчаар ажиллаж байхдаа хэсгийн шатны тоглолтууддаа 4-0 гэсэн амжилттай хэсгээ тэргүүлэн хасагдах шатанд шалгараад байна. Харин тэдний эсрэг тоглох Орландо Мэйжикийн хувьд багийн гол хоёр довтлогч Паоло Банкеро болон Франз Вагнер нар яг адилхан бэртлийн улмаас (ташуу хэвлийний булчингийн урагдал) харамсалтай нь тоглох боломжгүй болсон билээ.

Харин нөгөө талд КАТ-аар цус сэлбэсэн гарааны тавтаа тултал нь нухдаг Том Тибедоу дасгалжуулагчийн удирдлаган дор өрсөлдөх Нью Йорк Никс багийн эсрэг энэ улиралд Кавальерс, Бостон хоёрыг хожиж чадсан цор ганц баг болох Трей Янгаар ахлуулсан Алтанта Хавкс. Энэ улирлын эхний учраанд Хавксчууд 121-116 харьцаатайгаар талбай дээрээ Никсийг буулгаж авсан бол Лас Вегасд болох тус тоглолтод аль баг нь ялалт байгуулж цааш тэмцээнээ үргэлжлүүлэх бол?

Манай цагаар 12-р сарын 11нд:

08:00 цагаас Орландо Мэйжик vs Милаукий Бакс

10:30 цагаас Даллас Маверикс vs Оклахама Сити Тандер

12-р сарын 12нд:

08:00 цагаас Атланта Хокс vs Нью Йорк Никс

10:30 цагаас Голден Стэйт Уарриорс vs Хьюстон Рокетс

Тус тус тоглох хуваарьтай байна. Тус тэмцээнд түрүүлсэн багийн тоглогч, арын албаны ажилчид, дасгалжуулагчийн баг гэх зэрэг бүх албаны хүмүүс тус бүр 500,000 ам.доллар авах тул илүү хичээл зүтгэл гаргах баг нь илүү залуу багууд байх болов уу.