Ази тивийн аварга шалгаруулах сагсан бөмбөгийн тэмцээн Саудын-Арабын Жедда хотод хөшгөө нээлээ. Нийт 16 улсын шигшээ багууд 4 хэсэгт хуваагдаж хэсгээ тэргүүлсэн шигшээ багууд шууд шөвгийн 8-д шалгарах бөгөөд хэсгээс хоёр болон гуравдугаар байранд шалгарсан шигшээ багууд хоорондоо өрсөлдөж шөвгийн 8-д шалгарах эрхээ авна.

A хэсгийн эхний тоглолт Азийн хошой аварга хүчирхэг Австралийн шигшээ баг болон БНСУ-ын шигшээ багуудын хооронд болж өнгөрлөө. Тоглолтын эхний хагасыг аваргаа хамгаалж буй Австралийн шигшээ баг 48:31 харьцаатай илт илүүрхсэн бөгөөд үндсэн цагт ч хэмнэлээ алдахгүй явсаар 97:61 харьцаатай бут ниргэж эхний хожлоо авч чадлаа. Тус тоглолтод Австралийн шигшээ багийн талбай дээр тоглосон бүх тоглогчид оноо авсан бөгөөд Jack McVeigh 20 оноо авч багаа тэргүүллээ. 

А хэсгийн хоёр дахь тоглолт Азийн хошой хүрэл медальт Катарын шигшээ баг болон өнгөрсөн Азийн аваргын дэд байрт шалгарсан Ливаны шигшээ багуудын хооронд сонирхолтой тоглолт болж өнгөрлөө. Тоглолтын эхний хагаст хоёр багийн хамгаалалт маш сайн байж 35:35 харьцаатай тэнцсэн бол гуравдугаар үед Ливаны шигшээ баг довтолгоон дээр илүү байж Катарын багаас 10 оноо илүү гарав. Гэсэн ч Катарын шигшээ багаас тэр дундаа багийн лидер Goodwin бууж өгөхийг хүссэнгүй ээлж дараалан оноог авч тоог ойртуулсан ч үндсэн цагт 84:80 харьцаатай Ливаны шигшээ баг маш чухал хожил байгууллаа. Ливаны шигшээ баг багаараа маш сайн жигд тоглосон бөгөөд багийн хүчний довтлогч Dedric Lawson 12 оноо 7 самбар авч багаа тэргүүллээ. Харин Катарын шигшээ багаас Brandon Goodwin онцгой байж 33 оноо 5 самбар 7 оновчтой дамжуулалт гүйцэтгэсэн ч харамсалтай нь хожигдол хүлээлээ.

B хэсгийн эхний тоглолт Азийн чансааны #2 Японы шигшээ баг болон Сирийн шигшээ багуудын хооронд болж өнгөрлөө. Тоглолтын эхний хагаст Сирийн шигшээ багийн хамгаалалт маш сайн байж эсрэг багаасаа 9 оноо илүү гарч 41:32 харьцаатай илүүрхэв. Гэсэн ч Японы шигшээ баг гурав болон дөрөвдүгээр үеүдэд илүү гэдгээ харуулж довтолгоо болон хамгаалалт нь маш сайн ажиллаж үндсэн цагт 99:68 харьцаатай бут ниргэлээ. Тус тоглолтод Японы шигшээ багаас Joshua Hawkinson тун сайн байж 26 оноо 13 самбар авч багаа тэргүүллээ.

B хэсгийн хоёр дахь тоглолт манай шигшээ багийг урьдчилсан шатанд буулгаж авсан Гуамын шигшээ баг болон хүчирхэг Ираны шигшээ багуудын хооронд болж өнгөрлөө. Тоглолтын эхнээс Ираны шигшээ баг довтолгоо болон хамгаалалтад жигд сайн байж 41:20 харьцаатай илт илүүрхэв. Улмаар тоглолтын үндсэн цагт Ираны шигшээ баг 77:52 харьцаатай илүүрхэж хэсгийн эхний хожлоо авлаа. Тус тоглолтод Ираны шигшээ багаас Matin Aghajanpour 19 оноо авч багаа тэргүүлсэн бол Гуамын шигшээ багаас Tai Wesley 18 оноо 9 самбараас бөмбөг авч багаа тэргүүлжээ.

C хэсгийн хоёрдугаар тойргийн эхний тоглолт БНХАУ-ын шигшээ баг болон Энэтхэгийн шигшээ багуудын хооронд болж өнгөрлөө. Тоглолтын эхнээс БНХАУ-ын шигшээ баг илүүрхэж эхний хагаст 53:31 харьцаатай илүүрхсэн бөгөөд үндсэн цагт ч энэ үр дүнгээ хадгалж 100:69 харьцаатай ялалт байгуулж хэсгийн хоёр дахь хожлоо авч чадлаа. Тус тоглолтод БНХАУ-ын шигшээ багаас Jiayi Zhao болон Mingxuan Hu нар тус бүр 17 оноо авч багаа тэргүүллээ.

С хэсгийн хоёрдугаар тойргийн хоёр дахь тоглолт талбайн эзэн Саудын-Арабын шигшээ баг болон Йорданы шигшээ багуудын хооронд тоглолт болж өнгөрлөө. Тоглолтын эхний хагаст талбайн эзэн Саудын-Арабын шигшээ баг маш сайн байж 48:31 харьцаатай илт илүүрхсэн бөгөөд хоёрдугаар хагаст Йорданы шигшээ баг оноог дөрөв болгон ойртуулсан ч талбайн эзэд тайван байж 77:73 харьцаатай хэсгийн эхний хожлоо авч чадлаа. Тус тоглолтод талбайн эздээс Muhammad-Ali Rahkman онцгой байж 25 оноо 8 самбар 7 оновчтой дамжуулалт гүйцэтгэж багаа хожилд хөтөллөө.

D хэсгийн хоёрдугаар тойргийн эхний тоглолт Иракийн шигшээ баг болон Хятадын Тайваны шигшээ багуудын хооронд болж өнгөрлөө. Тоглолтын эхнээс Хятадын Тайваны шигшээ баг довтолгоо хамгаалалтад багаараа тун жигд байж 87:60 харьцаатай ялалт байгуулж хэсгийн хоёр дахь хожлоо авч чадлаа. Тэдний хувьд Шинэ-Зеландын шигшээ багтай хэсгийн сүүлийн тоглолтоо хийх бөгөөд хожсон баг нь хэсгээ тэргүүлэх нь тодорхой боллоо.

D хэсгийн хоёрдугаар тойргийн хоёр дахь Филлипинийн шигшээ баг болон Шинэ-Зеландын шигшээ багуудын хооронд болж өнгөрлөө. Тоглолтын эхний хагаст Шинэ-Зеландын шигшээ багийн довтолгоо зогсоогдошгүй байж 55:41 харьцаатай илүүрхсэн бөгөөд үндсэн цагт ч энэ үр дүнгээ хадгалж 94:86 харьцаатай буулган авч хэсгийн хоёр дахь хожлоо авч чадлаа. Тус тоглолтод Шинэ-Зеландын шигшээ багаас Jordan Ngatai 22 оноо авч багаа тэргүүлсэн бөгөөд тэд хэсгийн сүүлийн тоглолтоо Хятадын Тайваны шигшээ багтай тоглоно.