"Парис 2024" олимпийн технологи хариуцсан захирал Бруно Мари-Роуз Украины дайнаас болж Олимпийн сүлжээн дэх кибер халдлага нэмэгдэх магадлал өндөр байгааг анхаарууллаа. Тэрбээр Парис 2024-д болох сүлжээний халдлагууд Токиод тохиолдсон халдлагаас 8-10 дахин их байж магадгүй гэж таамаглаж байна. "Олимп бол дэлхийн хамгийн их халдлагад өртдөг үйл явдлуудын нэг бөгөөд технологийн тэргүүний хувьд хамгийн том хар дарсан зүүд байдаг аж. Парис 2024 кибер түншүүд болох Atos Technology компанийн Мадрид дахь төв байранд Интеграцийн туршилтын лаборатори нээгдсэн байна. Энэ нь олимпийн бүх системийг хамгаалахад туслах зорилготой бөгөөд үүнд үр дүн, өрсөлдөгчийн мэдээлэл болон бусад мэдээллийг хадгалдаг их хэмжээний мэдээллийн сан багтжээ. Олимп, Паралимпийн наадамд чухал ач холбогдолтой 150 программ дээр туршилт хийж эхлэхээр одоогоор 60 хүний бүрэлдэхүүнтэй баг ажиллаж байна. 250,000 цаг орчим туршилт хийх төлөвтэй байна. 1988 оны Олимпийн 4х100 метрийн буухиа уралдааны хүрэл медальт Мари-Роуз "Эрчимжүүлсэн болон сахилга баттай байдлын хувьд удахгүй болох туршилтын ажиллагаа нь элит тамирчдын бэлтгэлийн хуваарьтай төстэй" гэж хэлжээ. Парис 2024 олимпод зориулж ийм кампанит ажлыг удирдагчийн хувьд Атос-ийн туршлагад бүрэн итгэлтэй байгаа гэнэ. Энэ оны долдугаар сараас эхлэн туршилтад Парис 2024 оны олимп, паралимпийн эрх олгох тэмцээнүүдийн мэдээллийг багтааж эхэлнэ.
"Токиогийн наадамд бид 450 сая халдлага, 4.4 тэрбум буюу секундэд 800 аюул заналхийлэл кибер сүлжээнд авч байсан" гэж "Парис 2024"-ийн интеграцчлалын ахлах ажилтан Кристоф Тивет хэлж байна. Гэхдээ олимпод тэрхүү халдлагууд ямар ч нөлөө үзүүлээгүй бөгөөд бүх гадны нэвтрэх гэсэн урсгалыг хааж чаджээ. Дараагийн олимпийн хувьд сүлжээнүүд нь наадамд оролцох сайн дурынхны бүх магадлан итгэмжлэл, порталуудыг хариуцах болно. Тэд мөн Олон Улсын Олимпийн Хорооны хуралдааны үеэр санал өгөх, ОУОХ-ны Тамирчдын комиссын сонгуульд оролцох хүсэлтийг хүргүүлэх юм. Хакердах гэмт хэргийн хамгийн ноцтой тохиолдол 2018 оны Пёнчан хотод болсон Өвлийн олимпийн үеэр гарсан байна. Нээлтийн ёслолыг дамжуулах үеэр системүүд эвдэрсэн байна. Гэмт этгээдүүд нь Хятад, Хойд Солонгосын хакеруудын дүрд хувирахыг оролдсон Оросын цэргийн хүчний кибер ангийн гишүүд болох нь хожим тодорхой болж байжээ. Дараа нь тус хүчний гишүүдийг АНУ-ын Хууль зүйн яамнаас шийтгэжээ.
