Сэргээн босголтоо хийж буй Брүүклин Нетс улирлыг сайн эхлүүлсэн ч харамсалтай нь тэдний гол тоглогч болох Кэм Томас гэмтсэн байна. ESPN-ийн Шэймс Чараниагийн хэлснээр Нетсийн шилдэг оноо түүгч, өсч яваа од Кэм Томас зүүн шөрмөс нь сунасны улмаас гурваас дөрвөн долоо хоног талбай дээр гарахааргүй болжээ.

Томас энэ улирал 24.7 оноо, 3.2 самбар, 3.4 оновчтой дамжуулалт дунджилж 46.1 хувьтай довтлохын хажуугаар алсын зайнаас 38.9 хувьтай шидэж байсан юм. Мөн энэ улиралд Нетсээс 20 оноо дунджилж байсан цорын ганц тоглогч байлаа.

Брүүклиний аялан тоглолтын үеэр Томасын шөрмөс нь сунасан гэнэ. Учир нь Брүүклин нэлээн ачаалалтай аялан тоглолтыг өнгөрүүлсэн. Дваа гарагт Сакраменто Кингс багийг хожсон тоглолтод Томас 34 оноо авсан бол даваа гарагт Голден Стэйт Уарриорс багийг хожиход 23 оноо авсан. Лхагва гарагийн орой Финикс Санс багийг мөн хожсон.  Ийнхүү тэд 9-10 амжилттай бүсийнхээ 8-р байранд явж байна. Улирлын эхлэлд тэднийг 2025 оны драфтын тэргүүн сонголтын төлөө өрсөлдөнө гэж олон хүмүүс таамаглаж байсан ч ахлах дасгалжуулагч Жорди Фернандес залуу тоглогчдоор чамлахааргүй амжилт үзүүлэлт үзүүлж байна.

Харамсалтай нь тэдний гол оноо түүгч Томас багадаа сар талбайд гарахгүй нь тэдний амжилтад нөлөөлж магадгүй болохоор байна.