Монгол улсын Үндэсний шигшээ баг Азийн аваргын урьдчилсан шатны хоёр тоглолт хийх хуваарийн дагуу Дээд лиг 11-р сарын 07-оос 11-р сарын 26-ны өдөр хүртэл завсарласан. Тэгвэл энэ хугацаанд олон шилжилт хөдөлгөөн, шинэ наймаа, багийн бүрэлдэхүүнд гарсан өөрчлөлтүүдийг хүргэж байна. 

Хасын Хүлэгүүд

Одоогоор лигт нэг ч хожигдол амсаагүй Хасын Хүлэгүүд багийн хувьд лигийн завсарлагаагаар хоёр импорт тамирчин авчирсан сурагтай. Бэлтгэлдээ аль хэдийн хамруулаад эхэлсэн ба тэдэнтэй хамт Жордан Толбертийг оролцуулаад хоёр тамирчныг үндсэн багтаа дуудна гэнэ. Харин үлдсэн тамирчинг хөгжлийн лигийн багтаа авч үлдэнэ гэх шуум гараад байна.

BCH Knights

BCH Knights баг дасгалжуулагчийн багтаа томоохон өөрчлөлт орууллаа. Өмнөх дасгалжуулагч Ц.Эрдэнэбаясгалан ажлаа хүлээлгэн өгсний дараа шинэ дасгалжуулагчийн эрэлд гарсан. Улмаар NCAA-н 1-р дивизонд туслах дасгалжуулагч, видео аналист, Филиппин, Индонез болон Вьетнам улсуудын мэргэжлийн лигт ахлах дасгалжуулагчаар, Вьетнам улсын шигшээ багийн ахлах дасгалжуулагчаар ажилласан туршлагатай John "Todd" Purves тэдний ахлах дасгалжуулагчаар ажиллахаар болжээ. Мөн туслах дасгалжуулагчаар Серби улсын мэргэжилтэн Petar Šešlija-г багтаа нэгтгэсэн байна. 

Мөн тэдэнд хэрэгтэй байрлал болох төвийн тоглогч хайсан ба OD Anosike хэмээх тоглогчтой гэрээ байгуулж удалгүй явуулахаар болсон бол саяхан Byron Mullens хэмээх NBA-д данстай тоглогчийг багтаа нэгтгэлээ. Англи-Америк гаралтай тэрбээр 2009 оны драфтын 1-р тойргийн 24 дэх сонголтоор Далласт сонгогдож, түүнээс хойш ОКС Тандер, Шарлотт Бобкатс, Лос Анжелес Клипперс, Филадельфиа 76ерс зэрэг багуудад тоглож явсан туршлагатай тамирчин байна.

SG Apes

Тэд лигийн завсарлагаагаар Стефен Хартыг нутаг буцааж өмнөх Айпс Кайри Уокерийг дахин эргүүлж багтаа нэгтгэлээ. Үүнд ч Кайри Уокер сэтгэл хангалуун байгаа харагдсан. Мөн SG Apes багт энэ жил драфтлагдсан оюутны лигийн MVP Н. Эрдэнэ ирэх тоглолтуудаас багийн үндсэн бүрэлдэхүүнд багтаж, талбай дээр гарахаар болсон байна.

Сэлэнгэ Бодонс

Улирлын өмнө багтаа нэгтгээд байсан Брэндое Францисаа тэд нутаг буцаав. Харин түүний байрлалд өмнөх жил Бишрэлт Металл багийн хамт финалын утаа үнэрлээд амжсан Жэйнтал Силлатай гэрээ байгуулжээ. Ийнхүү Ахмад Гилберт, Жэйнтал Силла гэсэн хослол Бодонсд бүрдээд амжив.  

“ИНҮТ YES” TLG

Inut Yes TLG багийн импорт тоглогчид болох Маркус Хэммондс, Энтони Харрис нартай гэрээгээ цуцлав. Энтони Харрис нутаг буцсан бол Маркус Хэммондс Yes TLG багийн хөгжлийн лигийн баг болох Ундрага Найтс багт тоглохоор болжээ. Харин тэдний оронд Kenny Wooten Jr хэмээх 26 настай, 206 см өндөртэй NBA-д тоглож байсан тоглогчтой гэрээ байгуулсан байна. Тэбээр довтлогчийн байрлалд тоглодог, NCAA-ийн 1-р дивизионд Орегон Дакс багт 2 жил тоглохдоо Pac-12 Conference-ийн бүх хамгаалалтын багт 2 жил дараалан нэрлэгдсэн тухайн 2 улиралдаа тус бүр 2+ хаалт дунджилсан ба Замналдаа Никс, Рокетс багуудын бүрэлдэхүүнд багтаж байснаас гадна Унгар, Израйл улсын лигт тоглож байсан туршлагатай.

Завхан Бродерс

Завханы ах дүүс Монголд нэг л дасаж өгөхгүй байгаа Орландо Жонсонг нутаг буцаахаар шийдсэн сурагтай. Харин түүний оронд багийн найруулга хийх чадвартай импорт тоглогч хайж байгаа гэнэ.

Налайх Бизон

Налайх Бизон баг Elijah Thomas-ыг нутаг буцаалаа. Харин түүний оронд өнгөрсөн жил Хасын Хүлэгүүд багийн хамт аварга авахад том үүрэг гүйцэтгэсэн Жастин Мосстой гэрээ байгуулжээ.

Бишрэлт Металл

Бишрэлт Металл багийн ахлах дасгалжуулагч Б. Ганхөлөг өөрийн хүсэлтээр үүрэгт ажлаа хүлээлгэн өгсөн. Мөн Маккензи Мүүртэй байгуулсан гэрээгээ цуцалсан байна. 

Эрдэнэт Майнерс

Эрдэнэт Майнерс улилрын эхлэлд авчирсан Тайрел Тэйттийг нутаг буцаав. Харин Бишрэлт Металл багтай гэрээгээ өндөрлүүлсэн Маккензи Мүүрийг багтаа нэгтгэжээ.