Сүүлийн үед Монголын хөлбөмбөгийн холбоонд үүсээд буй нөхцөл байдлаас шалтгаалан МХБХ-ны ерөнхийлөгч Б.Болд болон МХБХ-ны ерөнхий нарийн бичгийн дарга Т.Дагвадорж нар ажлаа хүлээлгэн өгсөн.
Үүнтэй холбоотойгоор МХБХ-ны Ерөнхийлөгчийн болон Зөвлөлийн гишүүний сул орон тооны нөхөн сонгуулийг явуулахаар болсон.
МХБХ-ны дүрэмд зааснаар:
МХБХ-ны дүрмийн 38-р зүйлийн 4 дэх хэсэгт заасны дагуу 18-аас дээш настай, МХБХ-ны дүрмийн хавсралт 3-т заасан шударга байдлын мэдэгдлийг бөглөж хангасан, сонгууль эсвэл дахин сонгуулиас өмнө сонгуулийн хороонд материалаа шалгуулсан, хөлбөмбөгийн спортод дөрвөөс доошгүй жил идэвхтэй оролцсон Монгол улсын хууль тогтоомжийг зөрчиж, гэмт хэрэгт холбогдоогүй, Монгол улсын нутаг дэвсгэрт байнга оршин суудаг эрхэм байна.
гэж заасан байдаг.
Монголын хөлбөмбөгийн холбооны ерөнхийлөгчид 6 хүн нэр дэвшихээр саналаа хүргүүлжээ.
1. Б.Гарьдмагнай
Монголын хөлбөмбөгийн бүх цаг үеийн шилдэг тамирчин бөгөөд МХБХ-ны Техникийн хэлтсийн захирал
2. Г.Дашням
G-Mobile компанийн ТУЗ-ийн дарга, “Jet sharing Mongolia”-г үүсгэн байгуулагч
3. Ө.Алтай
“Ховдын хүлэгүүд” клубийг үүсгэн байгуулагч, клубийн менежер
4. Н.Болор-Эрдэнэ
Нийслэлийн газрын албаны мэргэжилтэн
5. С.Жаргал
Монголын Спортын Корпорацын спорт хариуцсан захирал, МХБХ-нд тоглолт зохион байгуулагчаар ажиллаж байсан
6. Ц.Анандбазар
“Сод Монгол Групп”-ийн ерөнхийлөгч, УИХ-ын гишүүн асан
МХБХ-ны сонгуулийн хороо 4 сарын 4-нд нэр дэвшигчдийг зарлах ба 4 сарын 28-нд сонгууль болох болно.
