Парис 2024 паралимпын наадам өндөрлөж, манай баг тамирчид 1 алт, 3 мөнгөн медальтай эх орондоо ирлээ.

Монгол Улсын Ерөнхийлөгч асан Ц.Элбэгдорж 2012 онд №151 дүгээр зарлиг гаргаж олимп, паралимп, олимпын төрөл, жингийн ДАШТ-ээс медаль хүртсэн тамирчдад насан туршид нь сар бүр мөнгөн урамшуулал олгож эхэлсэн. /ЗГ-ын тогтоолоор шинэчлэн найруулсан/

Тамирчдад сар бүр олгох урамшуулал:

• Олимп, паралимпын наадмаас алтан медаль хүртсэн тамирчинд 4 сая төгрөг,
• Олимп, паралимпын наадмаас мөнгөн медаль хүртсэн тамирчинд 3 сая төгрөг,
• Олимп, паралимпын наадмаас хүрэл медаль хүртсэн тамирчинд 2 сая төгрөг,
• ДАШТ-ээс олимпын төрөлд багтах зай, жинд алтан медаль хүртсэн тамирчинд 2 сая төгрөг,
• ДАШТ-ээс олимпын төрөлд багтах зай, жинд мөнгөн медаль хүртсэн тамирчинд 1 сая төгрөг,
• ДАШТ-ээс олимпын төрөлд багтах зай, жинд хүрэл медаль хүртсэн тамирчинд 500,000 төгрөгийг сар бүр олгодог.

Хамгийн өндөр урамшуулал сар бүр авахаар болсон 10 тамирчинг танилцуулж байна.

№1 Г.Болор-Эрдэнэ /Таеквондо/ 13.5 сая төгрөг

ДАШТ-ээс 5 алт, 1 хүрэл медаль хүртээд байсан МУГТ Г.Болор-Эрдэнэ Парис 2024 паралимпын наадмаас мөнгөн медаль хүртсэнээр энэхүү жагсаалтыг тэргүүлж байна.

№2 Э.Содномпилжээ /Пауэрлифтинг/ 13 сая төгрөг

Парис 2024 паралимпын наадмаас МӨНГӨН медаль хүртсэнээр 3 паралимп дарааллан медаль хүртсэн, АЛТ, МӨНГӨ, ХҮРЭЛ багц медалийн эзэн болсон зэрэг түүхэн амжилт гаргасан тэрээр ДАШТ-ээс 1 алт, 2 мөнгөн медальтай.

№3 З.Ойдов /Чөлөөт бөх/ 7.5 сая төгрөг

Нэгэн цагт чөлөөт бөхийн ертөнцөд гайхалтай амжилтуудыг гаргаж өөрийн нэрээр мэх хүртэл бий болгож байсан тэрээр ДАШТ-ээс хошой алтан медаль хүртсэн эрэгтэйчүүдийн ганц төлөөлөл билээ. Олимпын 1 мөнгө, ДАШТ-ны 2 алт, 1 хүрэл медальтай гайхалтай нэгэн билээ.

№4 Х.Баянмөнх /чөлөөт бөх/ 7 сая төгрөг

Зууны манлай бөх, Үндэсний бөхийн Дархан аварга, харишгүй хүчит 6 арванд барилдсан бидний дунд 2 Мөнх хэмээн алдаршсан 2 Мөнхийн нэг тэрээр олимпын 1 мөнгө, ДАШТ-ээс 1 алт, 2 мөнгөн медаль хүртэж байсан юм.

№5 Д.Сумъяа /Жүдо/ 6 сая төгрөг

Олимпын наадмын түүхэнд МУ-д авч ирсэн 2 дахь мөнгөн медалийн эзэн, эмэгтэй бөхийн түүрэнд олимпын наадмаас анхны мөнгөн медалийг эх орондоо авч ирсэн гээд түүний амжилт гэвэл их. Тэрээр олимпын наадмаас 1 мөнгө, ДАШТ-ээс 1 алт, 2 хүрэл медальтай.

№6 М.Уранцэцэг /Жүдо/ 6 сая төгрөг

Геннисийн амжилтанд нэрээ мөнхөлсөн тэрээр эмэгтэйчүүдийн жүдо бөхийн түүхэн дэх анхны Дэлхийн аварга цолыг эх орондоо авч ирж байсан юм. Олимпын наадмаас 1 хүрэл, ДАШТ-ээс 1 алт, 1 мөнгө, 2 хүрэл медальтай. ДАШТ-ээс авсан медалийн тоогоор багаа тэргүүлдэг нэгэн юм.

№7 С.Батцэцэг /Чөлөөт бөх/ 5.5 сая төгрөг

Чөлөөт бөхийн эмэгтэйчүүдийн анхны Дэлхийн аварга цолыг эх орондоо авч ирж, З.Ойдов гуайгаас хойш анх удаа ДАШТ-ээс хошой алтан медаль хүртэж байсан тэрээр олимпын хүрэл, ДАШТ-ны 2 алт, 1 мөнгө, 1 хүрэл медальтай. /ДАШТ-ээс хүртсэн 1 алтан медаль нь олимпын бус жин/

№8 П.Сэрдамба /Бокс/ 5.5 сая төгрөг

Бээжингийн олимпид бэртлийн улмаас финалд тоглож чадалгүй Мөнгөн медаль хүртсэн ч дараа жил нь ДАШТ-ээс Алтан медаль хүртэж байсан манай боксын тамирчдын томоохон төлөөллүүдийн нэг тэрээр олимпын наадмаас 1 мөнгө, ДАШТ-ээс 1 алт, 1 хүрэл медальтай.

№9 Э.Бадар-Ууган /Бокс/ 5 сая төгрөг

2007 оны Чикагод болсон ДАШТ-нд луйвардуулчихлаа, ирэх олимпод илт давуу ялж алтан медаль хүртэнэ хэмээн ярьж байсан тэрээр амлалтандаа хүрч 2008 оны олимпоос МУ-ын анхны 2 алтан медалийн нэгийг эх орондоо авч ирсэн тэрээр олимпын 1 алт, ДАШТ-ны 1 мөнгөн медальтай.

№10 Х.Цагаанбаатар /Жүдо/ 5 сая төгрөг /Энэхүү жагсаалтын 9-р байрт бичигдсэн Э.Бадар-Уугантай ижил урамшуулал авдаг/

МУ-ын жүдо бөхийн түүхэн дэх хамгийн анхны ДАШТ-ний алтан медалийг 2009 онд эх орондоо авч ирсэн төдийгүй 2004 оны Афины олимпоос цорын ганц медалийг эх орондоо авч ирсэн тэрээр олимпын наадмаас 1 хүрэл, ДАШТ-ээс 1 алт, 2 хүрэл медальтай.

Энэхүү жагсаалтын 3-р байрт /7.5 сая/ бичигдэж байсан хэдий ч 2023 оны БТСтХуулийн өөрчлөлтөөр хасагдсан Н.Түвшинбаяр.

2008 оны Бээжингийн олимпын наадмаас МУ-ын хамгийн анхны алтан медалийг, тэр дундаа бөхийн хүнд жинд хүртэж Монголчуудынхаа магнайг тэнийлгэж, 2012 оны Лондонгийн олимпид мөн финалдаж бэртэлийн улмаас Мөнгөн медаль хүртэж байсан гээд түүний амжилт агуу. Түүнд ДАШТ-ний медаль дутуу байсан бөгөөд 2017 онд харьж яваа насандаа, Жүдо бөхийн хамгийн хүнд жин болох +100 кг-ын жинд хүрэл медаль хүртэж дутуугаа гүйцээж байлаа.

Хуулийн шинэчилсэн найруулгаар эрүүгийн хэрэгт холбогдсон тамирчдад урамшуулал олгохыг хориглосон учраас түүний урамшуулал хүчингүй болсон юм.

Нийтэлсэн: Н.Энхмандах