Английн хөлбөмбөгийн Премьер лигийн “Манчестер Сити” багийн норвег довтлогч Эрлинг Холанд багийнхаа түүхэнд лигт хамгийн цөөн тоглоод 20 гоол оруулсан дээд амжилт тогтоожээ. Тэрбээр өнгөрсөн шөнө “Лидс”-ийг 3:1-ээр хожиход хоёр гоол оруулсан юм. Ингэснээр тэрбээр лигт 14 тоглоод 20 гоол оруулсан сүрдэм амжилтын эзэн болж байна. Хааланд 2-р хагаст буюу 51, 64 дэх минутад Жек Гриалишийн хоёр гоолын дамжуулалтыг амжилттай гүйцэтгэжээ. Тоглолтын дараа өгсөн ярилцлагадаа “Гоол оруулах нь зорилгодоо хүрэх алхам болохоос зорилго биш. Би хувцас солих өрөөнд ч хэлж байлаа. “Бид таван гоол ч оруулж болно оо. Гэхдээ хамгийн гол нь хожих хэрэгтэй” гэж. ДАШТ-ийг гэрээсээ үзсэн, бас их шар хөдөлсөн. Бусад тоглогчид гоол оруулж, хожиж, дэлхийн аварга болж байхыг хараад эрч хүч авсан, бас эсрэг мэдрэмжийг ч амссан. Яг одоо бол урьд урьдаас илүүтэй амжилтаар өлсөж байна” хэмээн ярьжээ. Хааландаас өмнө Кевин Филлипс АПЛ-д 20 гоол оруулсан хамгийн хурдан тоглогч болж байсан юм. Филлипс 1999/2000 оны улиралд Сандерлэндтэй тоглож Премьер лигийн карьерийнхаа эхний 20 гоолыг оруулахын тулд 21 тоглолт хийж байжээ.