Испанийн Ла Лиг өндөрлөх дөхөж байна. Аваргын хувь заяа тодорхой болсон ч жинхэнэ драм хүснэгтийн доод хэсэгт өрнөж эхэлжээ. Энэ бол цомын төлөө биш амьд үлдэхийн төлөөх дайн. Хэдхэн сарын өмнө Европын эрхийн тухай ярьж явсан багууд өнөөдөр Сегунда дивизион руу унах аюултай нүүр тулчихсан байна. Ла Лигийн түүхэнд ховор тохиохоор ширүүн өрсөлдөөн энэ улиралд бий болжээ. Хоёрхон тоглолт үлдсэн байхад 8-с 19-р байрны багууд доош унах магадлалтай байгаа нь Испанийн хөлбөмбөг ямар галзуу түвшинд хүрснийг харуулна. 

Sevilla, Valencia, Girona, Mallorca, Alavés, зэрэг Испанийн хөлбөмбөгийн уламжлалт том нэрс хүртэл айдаст автсан байна. Өмнө нь Европын тавцанд өрсөлдөж байсан клубүүд өнөөдөр нэг онооны төлөө эцсийн мөч хүртэл тэмцэж буй нь энэ улирлын хамгийн том шок юм. Энэ улиралд хамгийн аймшигтай зүйл нь хүснэгтийн нягтрал. Наймдугаар байрнаас унах бүс хүртэл ердөө хоёр ялалтын зайтай болсон. Нэг баг амжилттай долоо хоног өнгөрөөвөл Европын эрхийн бүс рүү орж мэднэ. Харин хоёр хожигдол дараалан авбал шууд унах бүсэд орчихно. 

Өмнө нь Ла Лигт “40 оноо авбал аюулгүй” гэсэн бичигдээгүй хууль байдаг байлаа. Харин энэ жил тэр ойлголт нуран унажээ. 40 оноотой багууд хүртэл тайван унтаж чадахгүй байна. Доош унах нь зөвхөн спортын асуудал биш. Энэ нь мөнгө, нэр хүнд, ирээдүйн асуудал. Телевизийн орлого буурна, шилдэг тоглогчид явна, клубийн төсөв нуран унана. Зарим клубийн хувьд энэ нь олон жилийн уналтын эхлэл болдог. Тиймээс улирлын сүүлийн тойргууд финал шиг болно.

Нэг алдаа бүхнийг сүйрүүлж мэднэ.

Нэг гоол бүхэл бүтэн хотыг аварч мэднэ.