Чөлөөт, сонгомол бөхийн насанд хүрэгчдийн ДАШТ энэ сарын 16-нд эхэлсэн бөгөөд Сербийн Белград хотын “Штарк арена” спортын ордонд бүх жингийн барилдаанууд амжилттай болж өндөрлөлөө. Уг тэмцээнд манай тамирчид амжилттай оролцож дахин хоёр мөнгөн медаль хүртлээ. Тодруулбал 72 кг-ын жинд барилдсан ОУХМ Энх-Амарын Даваанасан Польш, Болгар, Казахстаны тамирчдыг буулган авч Дэлхийн аваргын төлөө өрсөлдөх эрхтэй болсон билээ. Улмаар АНУ-ын залуу бөх Дэлхийн аварга Амит Элорт 8:2 оноогоор ялагдаж мөнгөн медалийн болзол хангалаа. 

Харин түүний дараачаар 68 кг-ын жинд Энхсайханы Дэлгэрмаа зодоглосон ба өмнө нь Серб,Казахстан, Франц, АНУ бөхчүүдтэй барилдан ялалт байгуулж аваргын төлөөх барилдаанаа өнөөдөр хийсэн юм. Алтан медалийн төлөөх барилдаанд дэлхийн аваргын хошой хүрэл медальт Туркийн бөх Бусе Тосунд ялагдаж дахин нэг мөнгөн медалийн эзэн боллоо. Улмаар манай улсын эмэгтэйчүүдийн баг амжилттай оролцож багаараа ДАШТ-ий гуравдугаар байрт шалгарсан байна.

Белград ДАШТ 2023 - 9 сарын 16-21-ний хооронд зохиогдсон чөлөөт бөхийн дэлхийн аварга шалгаруулах тэмцээнд манай улс бүтэн багаараа буюу эрэгтэй эмэгтэй нийт 20 жинд хүчээ сорьж амжилттай өндөрлөлөө. Эмэгтэй шигшээ баг маань гурван мөнгөн медаль хүртэн 80 оноо цуглуулж гуравдугаар байрт орсноор чөлөөт бөхийн дэлхийн цомд өрсөлдөх эрхтэй болов. Мөн энэ жил олимпын эрх олгогдож байгаагаараа онцлогтой бөгөөд эмэгтэй тамирчдаас 50кг-ын жинд  мөнгөн медаль хүртсэн МУГТ Д.Отгонжаргал, 68кг-ын жинд мөнгөн медалийн эзэн болсон ОУХМ Э.Дэлгэрмаа нар тус тус олимпын эрхийг эх орондоо авчирлаа.