18 настай талбайн теннисний тамирчин охин Канзас мужийн Манхаттан хотын “Kansas State University”-д 100 хувийн тэтгэлэгтэй суралцаж эхэлсэн билээ. Тус их сургууль теннисээрээ муждаа нэгт ордог. Ч.Маралгоо 1-р сард Америкт очиж, их сургуульдаа суралцаж эхэлснээр ийнхүү эхний семестрээ амжилттай дүүргэжээ.

Ч.Маралгоог 7 настайгаас нь аав, ээж нь талбайн теннисээр хичээллүүлж эхлүүлсэн. Тэрбээр Монголоос анх удаа энэ спортоор АНУ-ын коллежид тэтгэлэгтэй суралцахаар болоод байгаа юм.

Ч.Маралгоо анх багштайгаа ярилцаад "Монголд бэлтгэл хийхэд хэцүү байна. Талбай байхгүй, тэмцээн байхгүй байна гэжээ". Гадаад явъя гэхээр мөнгө байхгүй болохоор их сургуульд гадагшаа явбал илүү боломжтой гэж хэлсэн. Мөн Америк улсад их сургууль нь өрсөлдөөнтэй байдаг учир Америк явах талаар боджээ. Улмаар NCAA-д бүртгүүлсэн юм. Бүртгүүлсний маргааш өглөө нь “Hi Маралгоо. Манайх ийм сургууль. Чи коллежид теннис тоглохыг хүсч байна уу” гэсэн мессеж түүнд ирсэн гэдэг. Тэрбээр хариуд нь сурахыг хүсч байна гэдгээ илэрхийлж, “whatsup”-аар холбогдож шууд ярьснаар түүний хүсэл мөрөөдөл биеллээ олсон юм.

Монголын талбайн теннисчин Ч.Маралгоод Канзасын их сургуулиас 100 хувийн scholarship тэтгэлэг өгч байна гэдгээ хэлсэн байдаг. NCAA-д бүртгүүлсний дараа ахиад ч дөрөв, таван их, дээд сургуулиуд холбогдсон юм. Тэр дундаас Канзасын их сургуулийг тэрбээр сонгож, ийнхүү их сургуулийнхаа эхний семестртээ амжилттай суралцаад байна. Түүний араас олон Монгол хүүхэд залуучууд өөрийн хүссэн спортын төрлөөр NCAA-д бүртгүүлэн, их гүрэнд суралцах боломж нээгдэх нь дамжиггүй ээ.