NBA-ийн Плей-оффын тоглолтууд үргэлжлэн явагдсаар байна. Өнөөдөр өрнөд бүсийн 2-р байраар шалгарсан Денвер Наггетс, 7-р байраар шалгарсан Лос Анжелес Лэйкерс багуудын хооронд цувралын 5 дахь тоглолт болж өндөрлөлөө. 3-1 харьцаатай тэргүүлж явсан Денверчүүд эхний шатаа давахад ганц хожил хэрэгтэй байсан бол 3-0 гэсэн хар нүхнээс нэг хожил аваад амжсан Лэйкерс багийнханд хожигдох эрхгүй тоглолт болсон юм. 

Денверийн талбайд болсон тус тоглолтын эхний хагаст 53-50 харьцаатай Лэйкерс баг тэргүүлж эхэлсэн бол гуравдугаар үед талбайн эзэд онооны зөрүүг арилгаж бүр 2 онооны тэргүүлэлтэй 4-р үед орж ирэв. Улмаар тоглолт дээр доороо өрсөлдөж сүүлийн мөчид 106-106 дээр оноо тэнцэхэд 26 секунд үлдсэн байлаа. Денвер завсарлага захиалалгүй шууд довтолсон ба цувралын хоёр дахь тоглолтод хожлын шидэлт гүйцэтгэсэн Жамал Мөррэй дахин дундын зайнаас довтолж 108-106 харьцаатайгаар Денвер Наггетс баг ялалт байгууллаа. 

Цувралын 𝟓 дахь тоглолтод

Жамал Мөррэй 𝟑𝟐 оноо, 𝟑 самбар, 𝟕 оновчтой дамжуулалт

Майкл Портер Жр 𝟐𝟔 оноо, 𝟒 самбар

Никола Йокич 𝟐𝟓 оноо, 𝟐𝟎 самбар, 𝟗 оновчтой дамжуулалт тус тус гүйцэтгэсэн байна. 

Ийнхүү өнгөрсөн жилийн аваргууд эхний шатандаа Леброн Жэймсээр удирдуулсан Лос Анжелес Лэйкерсийг 4-1 харьцаатай төвөггүй давав. Одоо тэд хоёрдугаар шатанд Миннесота Тимбервулвс багтай бүсийн аваргад шалгарахын төлөө өрсөлдөх болно.