Олон улсын шатрын холбоо буюу FIDE-ээс жил бүр уламжлал болгон зохион байгуулдаг “FIDE Women’s Grand Prix” 2024-2025 цувралын тав дахь тэмцээн Энэтхэг улсын Пуна хотод 04-р сарын 14-өөс 24-ны хооронд үргэлжилж байна. Тус тэмцээнд саяхан цахим спортын “The MongolZ” багт нэгдсэн Олон улсын Мастер МУГТ Б.Мөнгөнтуул өрсөлдөж байна.

Тэрбээр эхний өдөр Гүржийн ОУ-ын мастер Салом Мелиаг ялсан бол өчигдөр БНХАУ-ын Их Мастер дэлхийн чансааны 11-т эрэмбэлэгддэг Жу Жинерт ялагдал хүлээлээ.

Тоглолтыг Б.Мөнгөнтуул Найдорф Сицилийн нүүдэл болох 6.Bd3 хувилбараар эхэлсэн. Түүний эхлэл сайн байсан ч бодит ахиц гарахгүй байсаар тоглолтын дундаас Хятадын их мастер байдлыг гартаа авав. Улмаар 30 дахь нүүдлээс тоглолт эргэж хоёр тэрэгний халц тулаанаар Жу ялжээ.

Ийнхүү 23 настай Хятадын их мастер хоёр дараалж хожсоноор Энэтхэгийн Дивия Дэшмухын хамт тэмцээнийг тэргүүлж эхлэв. Харин Б.Мөнгөнтуул 1-1 амжилттай болж хүснэгтийн 4-р байрт Энэтхэгийн Конеру Хумпитай оноо тэнцлээ.

38 настай, дэлхийн чансааны 88-т эрэмбэлэгдэж буй Б.Мөнгөнтуул өнөөдөр гурав дахь өрөгоо 17:30 цагаас Польшийн Алина Кашлинскаяатай тоглоно. Дэлхийн чансааны 16-т жагсдаг Олон улсын Мастер Алинатай өмнөн нь 1 тэнцэж, 1 хожигдоод байгаа юм.