Өнгөрсөн жилээс хэрэгжиж эхэлсэн НБА-ийн улирлын эхлэлийг тэс өөр түвшинд авчирсан НБА-ийн цомын тэмцээний хасагдах шатны тоглолтууд өнөөдөр Милаукий Бакс болон Орландо Мэжик багуудын өрсөлдөөнөөр эхэллээ. Дорнод бүсийн финалд шалгарах эрхийн төлөөх тоглолтод Wild Card-аар шалгарсан Орландо Мэжик баг Пауло Бэнкеро, Франц Вагнер зэрэг шилдэг тоглогчид нь байгаагүй ч гайхалтай өрсөлдөөнийг үзүүллээ. 

Милаукий Баксийн талбайд болсон тоглолтын эхний үеэс Орландо Мэжик илүүрхэж, тоглолтын эцсийн мөч хүртэл оноо ойрхон тоглосон юм. Харин нөгөө талд лигийн MVP, аварга авсан туршлагатай Яаннис Антетокоунпмо бас нэгэн гайхалтай тоглолтоо үзүүлж, 37 оноо, 7 самбар, 2 таслалт, 4 хаалт гүйцэтгэсэн бол Дамиан Лиллард 28 оноо, 9 дамжуулалт, 2 самбартайгаар багаа тэргүүллээ. Харин нөгөө талд Жэйлен Сагс зогсоогдошгүй гэмээр байлаа. Тэрбээр 32 оноо, 9 самбар, 4 таслалт, 46.2 хувьтай довтолсон ч баг нь эцсийн мөчид харамсалтайгаар ялагдал хүлээлээ. Ийнхүү үндсэн цагт 114-109 харьцаатай Милаукий Бакс НБА-ийн цомын тэмцээнд ялалт байгуулж, дараагийн шатанд Нью Йорк Никс, Атланта Хокс багуудын аль ялсантай Дорнод бүсийн аваргын төлөө тоглох юм.